Hebreg 5 - Maktub Ta Kumkajir

¹ Bɨra ngéjamosɨ kadkarig tube'n Luwah kɔtd ku degt ye, ndahd kɨtakad ɗan kɨla kɨta deg, na kɨ lan kadkarig kɨjakɔ adɨn Luwah kɨta majalg'n ɗan.

² Bɨra ngejanyamosɨkadkari ĩ kɨɓe kɨ dɔn i de kɨ tõ ho, kɨta 'nten asɨ ndɨdɔt kɨ kõkam ho, ndɨdɔt kɨ deg'n ĩn dai ho, ndɨ ndõmɨn ɗob tɔ ho.

³ Kɨtɔ kiã de kɨ tõ la, kari na kɨ lan kadkari kɨjakɔ kɨta nyàgo majalg lon kɨ kɔsɨdɔn ho, kamla kɨta majalg lo deg ho ye.

⁴ De mad kɨ kun kɔsɨgon 'nten kɨ dɔn telɨn bɨra ngejanyamosɨkadkari goto, na lon Luwah kuna tit'n kunɨn Aarõ ye be tã.

⁵ I titbe tɔ la Krist kɨ dɔn un kɔsɨgon kɨ dɔn telɨn bɨra ngejanyamosɨkadkari al. Be al. Na Luwah el an: Ĩ Ngonɨm, ɓola mĩ bɔwi.

⁶ Elta lot mad kɨɗang tɔ kam maktubt an: A ĩ bɨra ngejanyamosɨkadkari kɨ mbãkɨnõt, tit Melkisedek.

⁷ Kaglo'n Jeju i kɨdɔn dõ kam duniat ɓaitɔ ye, ger kad Luwah asɨ kaj'n ta koit. Kɔ kɨ rotĩn kɨ nõg kɨ dɔ Luwaht nat kɨ kog kɨ mankum kɨta ndig tel ron go tat lo Luwah, na Luwah oo dɔ kɔ loa ada ɓai lo koit, kɨta ɓool Ndil Luwah.

⁸ Jeju i Ngon Luwah rota, be kaa ne, ndoo telrogotat lo Luwah kam daiyot ĩn dai kamkõt.

⁹ Na lon tɔlkon kɨla lon ye, tel ngekaj deg tube ngételrodgotat loa kɨ kaj kɨ tokɨnõt.

¹⁰ Luwah ndaa bɨra ngejanyamosɨkadkari kɨbo tit Melkisedek.

Takɔj dɔ telt kɨ gog

¹¹ J'aw kɨ ta ngãi kad j'el dɔ tat 'nten, na õ ngãi kad j'ɔrrsɨ girr ta 'nten, kad i gerɨn girra kɨta mbisɨ ɔi dɨrɨr.

¹² Maj kad ɓola ĩn ngéndoo deg ta, na kaglo tɔi dɔsɨt kari, i ndɨ i geen kad deg ndoosɨn man dɔ nyandoo kɨ kam tat lo Luwah ɓaitɔ.

¹³ I gerɨn sanya kɨ ngang al, na i telɨn ngégee mba ɓaitɔ.

¹⁴ De'n ndɨ ãi mba ɓaitɔ ye, i ngon kɨɗoi, ger kɔrr m'ãi nya kɨmaj kɨ kɨmajal nat al.