Hebreg 4 - Maktub Ta Kumkajir

¹ Maɗi Luwah un kɔn ad deg kad n'ad'd ɗob kand lotaakòt. Kunkɔ'n non to lo tont ɓaitɔ. Kɨtɔ 'nten ad j'oon go roj maj, na ɓeta de mad kusɨt nãi gog ad ngah lo kand kamt al.

² Kɨtɔ j'oo hoita kɨmaj lo Luwah, tit'n maɗi kaajg oon ne dɔ nõ, kam dɨlalot, na lon oon dɔ ta'n non ye, hoita kɨmaj'n non ɗa sed al; ad andɨn kam lotaakòt al, kɨta taan hoita kɨmaj al.

³ Na jĩ taa, j'a j'and lotaakòt'n non kɨta jad kamj Hoita kɨmaj, kɨgo tat'n el ĩgɨn mbetɨn ta loa, el an: Kɨtɔ 'nten la m'ɓan sed wong kɨ tɨngabil ad m'nda yo m'an: Deg'n non a andɨn lotaakòt lom al. Luwah elta'n non titbe, kɨta adɨn kamd lotaakò'n non al. Na lotaakò to maɗi nu lo mbagɨr duniat, ndɔt'n Luwah tɨgan kɨla ndah girr dunia.

⁴ Kɨtɔ Luwah elta lot mad kam maktubt dɔ ndɔt kɨ kõ tanãimɨta an: Luwah taakò kɨla lon tube kam ndɔt kɨ kõ tanãimɨta.

⁵ Elta lot mad kam maktubt tɔ an: A andɨn lotaakòt lom al bat.

⁶ Deg'n oon dɔ hoita kɨmaj dasa ye, telɨn rod goot al, ad andɨn lotaakòt lo Luwah al. Titbe tɔ, Luwah nya ta ɗob kad deg madg andɨn lotaakòt ɓaitɔ.

⁷ Kɨtɔ 'nten, Luwah tel gang ndɔ mad gog tɔ kɨ kuna ɓone. Elta ndɔt'n non go ɓalgt ngãibe gog, lon elɨn ta kɨ ta Dabid dan dɔ kam maktubt'n el an: Ɓone, ĩla i ndɨ oon dɔ ndɨ Luwah a ne ot kadɨn kamsɨ kongkong.

⁸ Neni Jojue ɔrr ta ɗob bɔwjg aw tee sed lotaakòt tit'n Luwah taankò ndɔ kɨ kõ tanãimɨta ye be ho a ne, neni Luwah a elta dan dɔ ndɔ taakò mad gog al ta.

⁹ Kɨtɔ 'nten taakò mad kɨɗang to nõ ɓaitɔ kɨta deg lo Luwah, tit kɨ taakò'n Luwah taa kam ndɔt kɨkõtanãimɨta.

¹⁰ De'n and lotaakòt lo Luwah a ne, de'n non a taakò dɔ kɨlaɗangt, tit'n Luwah taankò dɔ kɨlaɗangt ye be.

¹¹ Kɨtɔ 'nten, ad kɨ lan roj kɨ nat kad j'andɨn lotaakòt'n non nat kɨ Luwah. Oon go rosɨ maj. Na ɓeta de mad kuujt tɔi dɔ ndɨ Luwah tit'n bɔwjg tɔin dɔ tuson ne kam dɨlalot oin, ad andɨn lotaakòt al kɨta adɨn kamd Luwah al.

¹² Ta lo Luwah i ta kumkajir, i ngeɗa nya'n ndahna kad ɗa. At pepep tɔi kiyaɗɔɔ kɨɗen kɨ kata i ko joo, ndɨ mbut lo mbã tee lot'n ndil de kɨ ro de, ngahn na tit, dɔkurg kɨ mbit ndɔdɨn na tit. Ta lo Luwah ndɨ tɔrr tagahg kɨ kɔjtaɗag kɨ ngarkam det nat.

¹³ Nya mad kɨ lo yarot goto nõ Luwaht. Nyag tube ton kɨ tɨga doo takum Luwaht'n hã j'a kɨ da kɔr nyaɗajg nõat.

Jeju i Bɨra ngejanyamosɨkadkari

¹⁴ Ad kɨ hɔn kadkam Luwah loj'n kɨ manaja kɨ tɨga wakɨsɨ nõ koosɨdegt sem. Kɨtɔ kɨ ndɨ kɨ bɨra ngejanyamosɨkadkari kɨbo ĩn and kam londɨ Luwaht ad i Jeju Ngon Luwah.

¹⁵ Kɨtɔ kɨ ndɨ kɨ bɨra ngejanyamosɨkadkari kɨ ta õ kama kɨtaj kɨta nána kɨ goɗob kɨ dang dang kam nyagt tube tit jĩ be, na ɗa majal al bat.

¹⁶ Kɨtɔ 'nten ad kɨ ndɔt'n kɨ kamj kɨ misɨmisɨ kɨ nõ pong majkurrt lo Luwah'n ndɨ ɗa maj kɨndɔgndɔg kɨ deg, ad kɨ ndɔt'n kɨkanj ɓool kɨtakad oo kumtondo loj, kɨ ɔj'j kamkẽ lon, kad ɗa sej kɨ kaglot kɨ sumba.