Hebreg 3 - Maktub Ta Kumkajir

Jeju i kɨbo tɔi Moij

¹ Kɨtɔ 'nten, ngankõ, ĩgɨn Luwah kunsɨ kad ĩn girrdeg lon ye, ad kumsɨ i dɔ Jejut maj, ĩn hã i ngon ngekɨla'n Luwah laa, i bɨra ngejanyamosɨkadkari, laj nooj nat kɨ Luwah, kɨgo ndahkamdɔt'n ndɨ kɨ la mbera kɨ tɨga wakɨsɨ.

² Jeju i ngeɗanya kɨro nõ Luwaht kam kɨlaɓert tit kɨ Moij'n i de kɨro kam kɨlaɓert ku ngékɨɓet lo Luwah.

³ Kɨtɔ 'nten, asɨ ta kɔsɨgon kɨbo tɔi Moij tit'n de kɨ ngeɗakuj a ngahn kɔsɨgon tɔi kuj ĩn hã ɗa; titbe tɔ Jeju ngahn kɔsɨgon ngãi tɔi Moij.

⁴ I rota, kuj kɨɗen de kɨ ngeɗaa i nõ, na ĩn hã ɗa nyag tube ye, i Luwah.

⁵ Moij taa ne, i ngeɗa nya kɨro ku ngékɨɓet lo Luwah tube; i ngekɨlaɓer lo Luwah kɨ ngekelta kɨ tɨga wakɨsɨ dɔ nyagt'n ɓet Luwah a ela gid ko gog.

⁶ Na tajigla Krist i ngeɗanya kɨro kɨta i Ngon'n Luwah ndaa kad oo go ngékɨɓe lon. Jĩ ngékɨɓe lo Luwah, ĩla kɨ hɔtɔgjba kɨ kam kɨ misɨmisɨ, na kɨ ɓakul nya'n kɨ ndahkamj dɔt kɨ ronel a ne, jĩ girrdeg loa.

Luwah ad taakò girrdeg lon

⁷ Kɨtɔ 'nten, Ndil Kɨkunjɗang el an: Ɓone, ĩla i ndɨ oon dɔ ndɨ Luwah a ne,

⁸ ot kadɨn kamsɨ kongkong. Tit'n maɗi bɔwsɨg taamɨn ne ɗɔɔ ho ndoormɨm ne ho, tit'n ɗan ne ndɔt'n namɨn ne kam dɨlalot.

⁹ Luwah el an: Lon bɔwsɨg namɨn ye, oon kɨlaɗamg kɨbobo asɨ ɓal dɔsɔɔ.

¹⁰ Kɨtɔ 'nten, wong kɨ tɨngabil ɗamɨn dɔ girrdegt'n non, ad m'an: Ngarkamd ud mut kɨndɔgndɔg, gerɨn ɗobg lom al.

¹¹ Kɨtɔ 'nten la, wong tɔlɨm sɔkɨr dɔdt, ad m'un kɔm kɨ yokɨnda m'an: Deg'n non a andɨn lotaakòt lom al bat.

¹² Ngankom, oon go rosɨ maj. Na ɓeta, de mad kusɨt kɨtakul kama kɨ kongkong, ndahn kamɨn dɔ Luwaht al ad mbet Luwah kɨ ngekumkajɨr.

¹³ Na sumba kad i ɗan kɨ na kɨndɔgndɔg, ad i ndɔg tube'n maktub lo Luwah kuna ɓone nõ, na ɓeta de mad kusɨt kama kongkong ad so kam majalt.

¹⁴ Kɨtɔ ĩla i hɔn nya ndahkamdɔt losɨ sem mbã dɔboit a ne, jĩ tube j'a jĩn madna kɨ Krist.

¹⁵ Titbe la maktub kɨkunjɗang lo Luwah an: Ɓone, ĩla i ndɨ oon dɔ ndɨ Luwah a ne, ot kadɨn kamsɨ kongkong, tit'n maɗi bɔwsɨg taamɨn ne ɗɔɔ ho, ndoorɨmɨn ne ndɔt'n namɨn ne kam dɨlalot nõ.

¹⁶ Deg'n oon dɔ ndɨ Luwah na taanɗɔɔ ndoorɨna ne ye, ĩn nõg a? I deg tube'n teen dɔning Ejipt't kɨtakul Moij.

¹⁷ Deg'n Luwah ɓa sed wong ɓal dɔsɔɔ ye, ĩn nõg a? Luwah ɓawong kɨ deg'n ɗan majal kam dɨlalot.

¹⁸ Luwah un kɔn kaglot'n non kɨ yokɨnda dan dɔ nõg a? Elta dan dɔ deg'n telɨn rod go tat al.

¹⁹ Kɨtɔ 'nten, ad j'oon maj, deg'n non asɨn kand lotaakòt al kɨta kam kongkong lod.