Hebreg 2 - Maktub Ta Kumkajir

Maj kad kɨ kid kaj kɨbobe'n Luwah adj nõ al

¹ Luwah elj ta kɨtakul Ngonɨn, kɨta 'nten sumba kad kɨ hɔ go nyandoo'n hã j'oo dɔ nõ sem, na ɓeta kɨ ndom ɗob kaj ad kɨ tuj.

² Kɨ ger maj, ta'n Luwah el kɨ ta malaikag ye, to kɨɗubagt, deg'n oon dɔ al ho, telɨn rod goot al ho ye, ngahn nyabaji kokɨro Luwaht kɨ asɨ ta nyaɗad kɨgoot al.

³ Na jĩ taa ne, j'oo ta mber kaj kɨ tɔi ta'n hã malaikag elɨn, ye ĩla kɨ tur go kaj kɨbo 'nten al a ne, ɗi j'a kɨ ɗa kad j'ajɨn roj a? Bɨraɓe Jeju Krist ĩ kɨɓe kɨ dɔn la lamber ta kaj'n non dasabang, kamla deg'n oon dɔ ta loa ye, man naj kad kɨ ger jeje.

⁴ Luwah manaj kɨɗubagt dɔ tat lod, ad'd tɔg kad ɗan ne nyakɔjg kɨ nyaɗag kɨ tɔg kɨ dang dang. Luwah ad'd kadkarig lo Ndil Kɨkunjɗang kɨgo ndigt lon tɔ.

Jeju i ngekɔrrj ta ɗob kaj

⁵ Kɨtɔ kɨ ndɨ kɨ j'elta lo dɔning'n Luwah ɗa lo ndaa kij, na Luwah laa girr tɔgt lo malaikag al.

⁶ Na tit'n ndangɨn ne lot mad kam maktubt lo Luwah an: De i ɗi kad i ga kami dɔat a? Ke ngon de i ɗi tɔ kad oo goa a?

⁷ I tel de dɔkaglot kɨ tẽbe ad du go malaikagt, i la maj kɨ tɔitɔi kɨ kɔsɨgon dɔat kamla i ndaa dɔ kɨlagt'n jii ɗa.

⁸ I la dɔ nyag tube girr tɔgat, na el an: Luwah la nyag tube girr tɔgat ye, girra i titbe: Nya mad kɨ i girr tɔgat al goto. Na be kaa ne, tajigla j'oo nyag tube ĩn kɨ la girr tɔg det al ɓaitɔ.

⁹ Na kɨ ger kad i Jeju la ndɨ ɔrr nõ nyag tube, ĩ la telɨna ad nãi tẽbe kad asɨ kɨ malaikag kɨgo kamkẽt lo Luwah kad oi kɨta deg tube kɨtakul dai yog'n dai kɨ koia tɔ, la Luwah lan maj kɨ tɔitɔi kɨ kɔsɨgon dɔat tajigla ye.

¹⁰ Nyag tube ye, i Luwah la ndahd kɨ jin, ĩn kɨtatɔa ho, ĩn kɨtakula ho, ad Jeju asɨnatap kɨtakul daiyog kɨ kõ kɨtakad Jeju ɗe kɨ ngang ngãibe kad gan na sen dɔ kɔsɨgont lon kɨta i ngekɔrrd ta ɗob kɨ kam kajt.

¹¹ Jeju ĩ kɨɓe tel deg kɨjaɓat't takum Luwaht. Na deg'n ard ye, ĩn tube bɔwd i kɨɗa, i Luwah, kɨta 'nten, Jeju ɗa rosɔl al kad kund ngankõn kɨ jeje.

¹² Kɨtɔ 'nten la Jeju elɨn Luwah an: M'am m'lamber tɔi ngankõg ho, m'a m'ɗa dan ngékawnat m'ɔsɨ pa m'ndubɨn.

¹³ Jeju el tɔ an: M'a m'ɓakul Luwah. El tɔ an: Oon mĩ kɨ ngang'n Luwah adɨm.

¹⁴ Deg'n ɗa kund nganɨn ye, awɨn kɨ dãro kɨ mosɨ. Kɨtɔ 'nten Jeju kɨ dɔn tel titd ho, ad gan na sed dɔ dãt kɨ mosɨ tɔ. Jeju ɗa titbe kɨtakad koia tuj tɔg Sɨtan'n aw kɨtag nuj deg.

¹⁵ Jeju ɗa titbe kad kɨ n'ɔrrɨn deg tube'n ndin girr tɔgt lo Sɨtan. Maɗi ɓool koi hɔd tit ɓerg, na Jeju ɗe ug ɔrrd kɔ.

¹⁶ Kɨtɔ i nya kɨ to kɨ tɨga wakɨsɨ, ɗe kɨta ɗa kɨ malaikag al, na ɗe kɨ n'ɗa kɨ ngaka Abraham.

¹⁷ Girra i titbe, sumba kad Jeju tel titna kɨ ngankõn kam nyagt tube, kɨtakad i bɨra ngejanyamosɨkadkari kɨ nõ Luwaht kad nyàgo majal lo deg'n ɗan nõ kɔ ho, la deg nooj nat kɨ Luwah ho.

¹⁸ Tajigla Jeju asɨ kad ɗa kɨ deg tube'n nánd, kɨta maɗi ĩ kɨɓe daiyo'n, na nána ho.