Hebreg 13 - Maktub Ta Kumkajir

Ɗob ɗa nya kɨ nel Luwah

¹ Ot nyan ta tarna. Kɨtɔ i nya kɨmaj kad ngankõna kam Krist't tarɨn na.

² Ot kadɨn kamsɨ oi dɔ ɗa mbah. Kɨtɔ deg madg go ɗa mbaht hɔn ne malaikag kɨ rodt kɨkanj ger.

³ I gaan dɔ ngankõsɨgt'n ĩn kam dangait tit'n dangaig nat sed be. I gaan kamsɨ dɔ ngankõsɨgt'n deg ndɨ ɗand majal tit'n ndɨ ɗan sesɨ majal ye be ho.

⁴ Sumba kad taana i nya kɔsɨgon kusɨt tube. Maj kad ngaw kɨ nẽn ngomɨn rod kɨkanj yerr kɨta na. Kɨtɔ Luwah a gangta dɔ ngeɗa kayat kɨ dekɨdɨngãg kɨ ngésah dekɨdẽg kɨ dekɨdẽg kɨ ngéɗangaw tɔ.

⁵ Ot kadɨn ɗa ta nar dum dɔsɨ kɨ tɔi kam nyaɗasɨt. Adɨn kamsɨ sokɨber dɔ nyat'n i ndɨn ne kam jisɨt. Kɨtɔ Luwah ĩ kɨɓe el an: M'a m'nyagoi al bat, m'a M'nyai al bat tɔ ho.

⁶ Kɨtɔ 'nten la, j'asɨ kelɨn ta 'nten kɨ kam kɨsokɨber j'an: Bɨraɓe i ngeɗasem m'a m'ɓool nya mad al, de kɨ asɨ ɗa sem nya mad goto.

⁷ I gaan dɔ degt kɨ maɗi'n ĩn ngékɔrrsɨ ta ɗob, ĩgɨn ulsɨn kɨ ta lo Luwah. I gaan dɔ ɗob nyaɗadt kɨ dɔ koit'n oin. I ndajɨn kadkam lod.

⁸ Jeju Krist ndɨ lo ndɨnt kɨkanj mbel, tagbe, kɨ ɓone kɨ mbãkɨnõt.

⁹ Ot nyan ta ɗob kadɨn nyandoog kɨ dang dang kɨ kɨjg usɨn mut. Maj kad kamkẽ lo Luwah ad tɔg dekɨɗen ngarkamat, na kɨ i kɨtakul mberkɨndag dɔ nyasat al, kɨta mberkɨndag kɨ titbe ɗan kɨ deg kɨ ngétel rod gootal.

¹⁰ J'aw kɨ dɨngɨr kadkari janyamosɨ loj nõ, ĩn Juipg kɨ ngéɗakɨlaɓer kam kujkub-londɨt asɨn kad san nya dɔt al.

¹¹ Kɨtɔ bɨra ngejanyamosɨ kadkari lo Juipg un mosɨ dãg'n jan kɔd ɗen kam lot kɨjaɓat kɨtɔ majal kɨ ɗa, na lan dãro dãgɨ'n non horrt gid ɓet.

¹² Kɨtɔ 'nten la, Jeju daiyo'n gid ɓet kɨ Jerusalem kɨtakad n'tel deg kɨjaɓat kɨtakul mosɨn kɨ kɔsɨ dɔn.

¹³ Kɨtɔ 'nten ad kɨ teen kɨ roat gid ɓet, kɨ ngahn rosɔl kɨ kɨɗa'n non ĩn Jeju ngah.

¹⁴ Dɔningt ne, j'aw kɨ ɓe loj kɨ a ɗa lo ɗant al, na ndɨ kɨ sahn go ɓe mad kɨ ndɨ ɗe.

¹⁵ Kɨtɔ 'nten tɔ, ad kɨ lan kadkari jadɨn Luwah kɨta Jeju Krist kɨkanj nyata. Ad kɨ ndubɨn tɔa kɨ ta kɨ tajt.

¹⁶ Na ot kadɨn kamsɨ oi dɔ ɗa kɨna dɔ nya geegt lo na. Kɨtɔ kadkari kɨ titbe kɨ lan adɨn Luwah ye, i nya kɨ nela dum.

¹⁷ I telɨn rosɨ go ngékɔrrsɨ ta ɗobt, i lan dɔsɨ girr tɔgt lod. Kɨtɔ ngékɔrrsɨ ta ɗob ndɨ ndan kumd gosɨt. Ĩn kɨɓeg a ɔrrɨn girr kɨla ɗad nõ Luwaht. Ĩla i telɨn rosɨ go tat lod a ne, a ɗan kɨla lod kɨ ronel, ĩla i ɗan titbe al a ne, kamkil a ɗad, na maja a goto kɨtatɔsɨ.

¹⁸ I hɔn kelta kɨ Luwah kɨtaj. Jĩ kɨ ger ɓet kamj hɔj kɨ ta dɔ nya madt al, kɨ ndig kad nya ɗaj i kɨmaj kɨndɔgndɔg.

¹⁹ M'ndɨ m'kɔsɨ kɨ rotĩm kad i ɗan nya 'nten kɨtakad Luwah tel sem kɨ rosɨt gog kanangbe.

Kelta kɨ Luwah

²⁰ Luwah tee kɨ Bɨraɓe loj Jeju ku ngékoigt. Jeju i ngengom batg kɨbo, kɨta mosɨ koia ɗa ad kunkɔ kɨ tokɨnõt to kɨɗubagt tɔ.

²¹ Kɨ Luwah kɨ Ngekad deg lapia adsɨ nya kɨmaj kɨɗen kɨtakad i ɗan ne go ndigt loa. Kɨ Luwah ɗa kɨla kɨɗen kɨ nelɨn kamjt kɨtakul Jeju Krist. Kɔsɨgon kɨ dɔ Jeju Krist't mbã koght lo kohg.

Dɔboi tag

²² Ngankom m'ndɨ m'kɔsɨ kad i ndɨn dɔt sem, kad oon dɔ takɔj lom'n m'ɔjsɨ, kɨta ta'n m'ndang m'adsɨ kam maktubt 'nten i ta kɨ tẽbe.

²³ Mad i gerɨn hoi ngonkõj Timote ĩn ɔrrɨna dangait. Ĩla ɗe romt nderbe a ne, m'a m'aw sia nat kad m'oosɨ.

²⁴ I ɗan lapia ngékɔrrsɨ ta ɗob admɨn kɨ deg kɨjaɓat lo Luwah. Ngankõjg kɨ dɔning Italit ɗasɨn lapia tube.

²⁵ Kɨ majkurr lo Luwah i nat sesɨ tube.