Hebreg 12 - Maktub Ta Kumkajir

I hɔn tɔgsɨbá kam darondot kɨta Luwah i Bɔwj

¹ Jĩ taa ne, koosɨdeg ngãibe ngémanaj gugɨn dɔj. Kɨtɔ 'nten, ad kɨ j'ɔrrɨn nya kɨ ɗi'n ndɨ ɔgj dɔ kaw kɨ ketekete kɔ. Ad kɨ mbetɨn majal kɨɗen'n ndɨ ɓindj kɔ. Na kɨ hɔtɔgba la maj kad j'ãin ngɔd kad kɨ teen lo ndadurot'n lan nõjt.

² Ad kɨ J'urɨn kumj kɨ dɔ Jejut, ĩn hã ndɨ ɔrrj ta ɗob kam kadkam Luwaht loj kad asɨnatap. Ndig kad, gana dɔ kagdosɨt kɨkanj rosɔl. Ke oi koi kɨ rosɔl kɨ titbe kaa ne, Jeju oo rosɔl'n non nya madt al, kɨta oo ronel'n ɓet n'a n'ngah kete nõ woi. Na tajigla ndɨ dɔ pong kõɓet lo Luwah ko kõat.

³ I gaan dɔ Jejut'n ngéɗamajalg ndoorɨna, na hɔtɔgɨn bá kam nyagt tube. Ĩla i gaan dɔat titbe a ne, ɓet a ɗa sesɨ kad nyag'n non dumɨn dɔsɨ al, rosɨ a oi yelel al tɔ.

⁴ Kam ɗɔɔt'n i ndɨ i ɗɔɔn kɨmajal ye, i ɗɔɔn mbã koi al ɓaitɔ.

⁵ Kamsɨ ndɨ oi dɔ takɔj lo Luwah'n adsɨ kɨta ĩn nganɨn an: Ngonɨm, ot koo ndakɔj lo Bɨraɓe nya madt al. Ot kad roi oi siw lon Bɨraɓe ndángi.

⁶ Kɨtɔ de'n Bɨraɓe tara la, nda ɔja ye, ndɨ ndah ndeh girrdegt tube'n gerd kad ĩn nganɨn.

⁷ I kɨta kɔjsɨ la, Luwah ad i ndɨ i ngahn ne kõ ye. Kɨtɔ kõ'n i ndɨ ngahn i ndakɔj kɨ a ad i gerɨn maj, Luwah ndɨ ɗa sesɨ tit nganɨn be. Ngon kɨ ɗa hã bɔwa nda ɔja al a?

⁸ Ĩla Luwah nda ɔj'j tit nganɨn al a ne, jĩ tit ngang kɨ bɔwd goto be, ad jĩ ngan Luwah kɨ jeje al.

⁹ Kam dɔningt ne, j'aw kɨ bɔwjg kɨgo dãrot ĩn hã ooj'jɨn, lon kɨ ɗa nya kɨmajal a nda ɔj'jɨn, be kaa ne, ndɨ kɨ j'ɔsɨgond. Kɨ tɔi 'nten, i soot kad kɨ lan dɔj girr tɔgt lo Luwah kɨ bɔwj kɨtakad kɨ ngahn ne kumkajir.

¹⁰ Bɔwjg'n ooj'jɨn kɨgo dãrot ye, ndɨ nda ɔj'jɨn kaglot kɨ tẽbe kɨta oon tit maj ngãi kɨtatɔj kad ɗan titbe. Na nda ɔj'jɨn kɨtakad ndoojɨn hal kɨkunjɗang.

¹¹ Kaglot'n ndɨ kɨ ngah ndakɔj ye, j'oo tit i nya kamkil, na i nya ronel al, na ndɔ madt deg'n taan ndakɔj ye, a ngahn kam kɨsokɨber kɨtakul nyaɗad kɨdenesew.

Tag kɨ kɔj kɨ tag kɨ kug kel

¹² Kɨtɔ 'nten, ɔin jisɨ kɨ koi yelel kɨ dõ. Adɨn gojsɨ kɨkoi njurur ngang siw.

¹³ I ɗan go ɗobg kad ɗakɨɗɨng sew kɨtakad de'n njaa i kɨ moot a ne, kɨ ɔrr ta nat al, na i soot kad yoot tã.

Nyaɗakɨro kɨgo kunt lo Luwah

¹⁴ I sahn kɨ rotĩsɨ kad ĩn kɨ lapia kɨ deg tube, kad nyaɗasɨ i kɨjaɓat, kɨta kanj nyaɗa kɨjaɓat, de kɨ asɨ koo Bɨraɓe goto.

¹⁵ Oon go rosɨ maj na ɓeta de mad ɔrr ron kɨ gog ta kamkẽt lo Luwah. Oon go rosɨ maj, na ɓeta de mad tel tit kag kɨ kat bang'n mbia i kĩ tɔl deg.

¹⁶ Oon go rosɨ maj, na ɓeta de mad kɨ ngeɗakaya i kusɨt, ke de mad kɨ ngekid nyag kɨjaɓat tit Esaw'n ɗaw nyanduba ngonderr lon kɔ kɨta nyasa kɨ nja kɨɗabe.

¹⁷ I gerɨn ɓet, got lon sah ɗob kad bɔwɨn njang dɔn ye, ɔsɨna kɨ gog; kɨta ngah ɗob mbel nya'n ɗa nõ ye gog al, ke neni sah ɗoba kɨ rotĩn kɨ man nõ kumɨnt kaa ne, i root al ta.

¹⁸ Ĩgɨn, i ndɔt'n tit Israel kɨ ro mbalbot kɨ asɨ kɔd kɨ ji al; ad i mbalbo Sinai kɨ ɗa õ horr, kɨ til dubt al. Ad i til kɨ dub kirir, kɨ nel barwãit al,

¹⁹ kɨ kah brunjt kɨ ko al, kɨ ndɨ tagt kɨ kel al. Lon ngan Israel oon dɔ ndin non ye, ndɨjen kad lad ta mad dɔ tat'n eld nõ al.

²⁰ Kɨtɔ asɨ telɨn rod go mberkɨndat kɨ kel kan: Dekɨɗen kɨ ɔd mbalbo'n non ke i dã kaa ne, a tɨlana kɨ mbal.

²¹ Nya'n Moij oo ye, i nya kɨkootɓool ngãi ad el an: Ɓool tɔlɨm sɔkɨr ad rom ndad yatɨt.

²² Na i titbe al, ĩng taa ne, i ndɔt'n kɨ ro mbalbo Sinait kɨ kam ɓebot lo Luwah kɨ kumkajir, ad i Jerusalem kɨ dõ dɔrãt kɨ koosɨ malaikag ngãibe.

²³ I ɗe i kawɨn na sed nganderg lo Luwah, ngékawna'n tɔd i kɨndang kam dɔrãt dõ, i ndɔt'n kɨ ro Luwaht kɨ ngegangta dɔ degt tube, kɨ ndil deg kɨ nyaɗad i kɨdenesew, kɨ deg'n telɨnd kɨ kasɨnatapt.

²⁴ Tajigla i ndɔt'n kɨ ro Jejut'n i ngeɗambɨna kunkɔt kɨkij, kɨ mosa'n ũ kɔ, ndɨ elta dɔ nyag kɨmaj tɔi nyag'n mosɨ Abel elta dɔt.

²⁵ Oon go rosɨ maj, na ɓeta i mbetɨn koo dɔ ta lo de'n ndɨ elta. Kɨtɔ deg'n non, ĩgɨn mbetɨn koo dɔ ta lo de'n ug el deg kɨ dɔningt ta kɨ ta Luwaht ye, ajɨn rod al; ye ĩla j'unɨn kumj riw dɔ Luwaht'n elj ta ko kɨ dõ dɔrãt a ne, j'a j'ãin wong lo Luwah al tɔ.

²⁶ Maɗi ta kɨ ta Luwaht yee dɔning na tajigla Luwah un kɔn ad deg, an: Nãi njakɨɗa ɓaitɔ m'a m'ye dɔning hã kɨɗabe al, na mbã m'a m'ye dɔrã ho.

²⁷ Ta 'nten, kɨ kan nãi njakɨɗa ɓaitɔ ye ɔj deg ad oon maj nyandahg a yeen kamla a goton kɔ, kɨtakad nyag kɨ dum yee a ndɨn londɨdt.

²⁸ Ad kɨ ɗan mersi Luwah, kɨta kɨ ngahn kõɓe kɨ dum yee. Ad kɨ ndubɨn Luwah kɨ ɗob kɨ nela nat kɨ kɔsɨgon kɨ ɓool.

²⁹ Rota, Luwah loj i tit horr kɨ ngekonya mugɨj be.