Hebreg 11 - Maktub Ta Kumkajir

Kadkam lo deg kɨ maɗi

¹ Kadkam Luwah, i kam kɨ ger ɓet kad kɨ ngah nyag ĩn kɨ ndahn kamj dɔt, i naj kɨ to kɨɗubagt dɔ nyagt'n de ndɨ oo kɨ kumɨn al.

² Kɨtakul kadkam la deg kɨ maɗi ngahn ne najkɨma kɨmaj nõ Luwaht.

³ Kɨtakul kadkam la ndɨ kɨ gerɨn kɔikɔi kad Luwah ndah kàd kɨ nah kɨ kɨmẽg kɨ dɔning kɨtakul ta kɨ tant, ad nyag'n ndɨ kɨ j'oo kɨ kumj teen ko ro nyagt kɨ ton tɨga wakɨsɨ ta kum det al.

⁴ I kɨtakul kadkam Luwah la, Abel lan kadkari kɨmaj tɔi lo Kain ad Luwah ye. Kɨtɔ kadkari'n non Luwah elɨn ta dɔat an: Abel i de kɨdenesew kɨta Luwah kɨ dɔn ta kadkari loa. Ke Abel oi kaa ne, ndɨ elj ta kɨtakul kadkam lon ɓaitɔ.

⁵ Kɨtakul kadkam la, Luwah unɨn Henok kɨ kam dɔrãt dõ ad oi al, de mad kɨ ngaha gog goto kɨta Luwah una kɨ dõ kad ndɨ ront. Maktub lo Luwah el an: Kete kad Luwah una kɨ dõ ye, Henok i ngeɗanya kɨ nel Luwah.

⁶ De kɨ asɨ nel Luwah kɨkanj kadkamɨn Luwah goto. Kɨtɔ de'n ndɨ ndɔt kɨ ro Luwaht a ne, maj kad adkamɨn kad Luwah i nõ, kamla i ngebaji deg'n ndɨ sahna kɨ rotĩd tɔ.

⁷ Kɨtakul kadkam Luwah la, Luwah elɨn ta Noe dɔ nyagt'n de oo kɨ kumɨn al ɓaitɔ, ad Noe telrongotat lo Luwah, ad ɗa too kɨbo ngãi ajɨn ngékɨɓe lon. Kadkam loa hɔ deg kɨ dɔningt kɨ ta, na Luwah ɔrr ta dɔat, ooa de kɨdenesewt.

⁸ Abraham adkamɨn Luwah ad tel ron go tat lo Luwah, lon Luwah kuna'n kad ɓai dɔning koojɨnt, aw dɔningt mad kɨɗang'n un kɔ'n kad n'ada. Abraham ɓai aw kɨkanj ger lon ndɨ awt.

⁹ Kɨtakul kadkam Luwah la Abraham aw ndɨn tit mbah be kam dɔningt'n Luwah un kɔn kad n'ada, ndɨ kam kuj kubt nat kɨ Isaak kɨ Jakob kɨ ĩn madngékõnduba nat sia dɔ kunkɔt kɨ kɨɗa'n non.

¹⁰ Kɨtɔ Abraham nda kamɨn dɔ ɓebot mad'n girra kɨ ndah i kɨngangngang ho ɗa bijir ho. Kɨtɔ Luwah kɨ dɔn la i ngekɔj go gor ɓe'n non ye, ĩ tɔ la i ngeɗaa ye.

¹¹ Kɨtakul kadkam tɔ la, Sara ke neni tel bɨga bugum kɨta kaglo kooja ngon tɔi kaa ne, Sara ndah kamɨn dɔ nyat kɨɗa: Kad Luwah'n un kɔn ye, i ngetɔl kon kunkɔ lon.

¹² Titbe la kokɨro det kɨ kɨɗabedo, ad i de'n aw ta koit nderbe, deg teent ngãi tit kɨmẽg kɨ dõ dɔrãt be, tit ngár kɨ ta bahbot kɨ dum tɨda.

¹³ Deg'n non oin tube kam kadkam Luwaht. Ke ngahn nyag'n Luwah unɨn kɔn ad'd al kaa ne, oon nyag'n non ko sãi nu, oon dɔd kɨ ronel tɔ, elɨn ta kɨ tɨga wakɨsɨ anan, nĩn mbahg ngétɔi dɔ dɔningt.

¹⁴ Kɨtɔ deg kɨ ngékelta kɨtitbe ye, ndɨ ɔjɨn kɨ tɨga wakɨsɨ kad'n ndɨn sahn ɓe mad kɨmaj tɔi.

¹⁵ Kɨtɔ ni gan kamd dɔ lot'n teent a ne, ni a ngahn ɗob tel tit gog.

¹⁶ Deg'n non ndigɨn ɓe mad kɨmaj tɔi, ad i ɓe kɨ dõ dɔrãt. Kɨtɔ 'nten ro Luwah sɔla'n al kad kunɨnɨn Luwah lod, kɨta ɗa ɓe mad woi kɨtatɔd.

¹⁷ Kɨtakul kadkam Luwah la, Luwah nán Abraham kɨ n'oo ke ɗi a ɗa a? Lon Luwah ndɨjean kad la ngonɨn Isaak kadkarit adɨn. Abraham i de'n Luwah un kɔn ada, titbe kaa ne, Abraham ndig dɔt ad la ngonɨn kadkarit ad Luwah.

¹⁸ Luwah el Abraham an: Kam Isaakt la a i ngah kohit ye, kɨgo kunkɔt'n m'un m'adi.

¹⁹ Na Abraham gaa kamint an: Luwah asɨ kad ad Isaak ɓai ku ngékoigt, ad Abraham tel ngah Isaak gog, tit ɓai lo koit be.

²⁰ Kɨtakul kadkam la, Isaak njangɨn dɔ Jakob kɨ Esaw an: Maj a urd kam ndɔgt'n a ɗen.

²¹ Kɨtakul kadkam la Jakob lon ton ta koit njangɨn dɔ ngan Jojep kɨɗa kɨɗa, kamla ɔsɨ dɔn ber nõ Luwaht, ndɨna ron dɔ kagtɔsɨt lon.

²² Kɨtakul kadkam la Jojep elɨn ta dɔkàd koint, dan dɔ tee Israelag kam dɔning Ejipt't kɨtɨga, eld ta dɔ nyat'n sumba kad ɗan kɨ kɨngang.

²³ Kɨtakul kadkam Luwah la ngékooj Moij yan ne dɔa nah mɨta go koojat, kɨta oon, i ngon kɨmaj dum, na ɓool ɗad al, ad telɨn rod go mberkɨndat lo ngar al.

²⁴ Kɨtakul kadkam la Moij mbetɨn kad'n kun ron ngon ngar Paraõt kɨdẽ lon tɔgɨn gang.

²⁵ Moij kɔt, an: I soot kad ɗan sen nya kɨmajal nat kɨ deg lo Luwah tɔi kad kɨ n'oo maj ron kam majalt kɨ ɗa kaglot kɨ tẽbe.

²⁶ Moij oo kad ngah tajg kɨta Krist i nyakɨmaj ngãi tɔi nyamajg kɨ kam dɔning Ejipt't kɨtaagbe, kɨta ur kumɨn go nyabajit'n a ngah kaglot'n a ɗe,

²⁷ kɨtakul kadkam Moij nya'n dɔning Ejipt kɔ kanj ɓool wong kɨ tɨngabil lo ngar, kɨta hɔ ron ngang tit ndɨ oo Luwah kɨ dum ko kɨ kum be,

²⁸ i kɨtakul kadkam Luwah la Moij nda'n mber kad deg jan kɔ ngon bat Pakɨt, na kad ɗan mosa tabitg, kɨtakad malaika kɨ ngetɔldeg ɗe tɔl nganderg lo Israelag al.

²⁹ Kɨtakul kadkam la, Israelag ndan ne bahbo kɨ kɨrre gangɨn tit dɔning kɨ tut be, na lon deg kɨ Ejipt't sah kɨ ngangɨn bahbo kɨ kɨrre ho ye, man tuw dɔd purum.

³⁰ Kɨtakul kadkam la, ndogbɔrrg kɨ ɓebot kɨ Jeriko tuson ne ye, lon Israelag ndian gugɨn dɔa ndɔ tanãimɨta.

³¹ Kɨtakul kadkam la Rahab kaya dekɨdẽ hɔn ngéndalog lo Israelag kɨront kɨ lapia, ad oi nat kɨ deg kɨ ngételrodgotat lo Luwah al al.

³² Ka m'an ɗi ɓaitɔ a? Kɨtɔ kaglo asɨm al tajigla kad m'elɨn ta dɔ kadkamt lo Jedeõ, Barak, Samsõ, Jepte, Dabid kɨ Samuel kɨ ngékelta kɨ ta Luwaht.

³³ I kɨtakul kadkam Luwah la deg'n non tetɨn ne ɗɔɔ kõɓeg lo girrdeg madg, õnɓe dɔ degt kɨgo ɗob nyaɗat kɨdenesew, ngahn ne nya'n Luwah unɨn kɔ'n ad'd, ndan ne ta tubog nat.

³⁴ Tɔlɨn tɔg horrg kɨkõ giling giling, ajɨn rod ta nyakatgt. Ĩn deg kɨ tɔgd goto, na kadkam Luwah teld degt kɨngang, ĩn gõɗɔɔg, Luwah ad'd tɔg ad tuɓan koosɨdeg ad ãin na.

³⁵ Kɨtakul kadkam la dekɨdẽ madg tel ngahn ne deg lod kɨ oin kɨta adɨnd ɓain lo koit. Deg madg tɔ ɗan sed nya kɨ kokõ, na mbetɨn kad de ɔrrd ta kõtn non. Kɨtɔ ndigɨn ɓai lo koit, kad ngahn ne ndɨ kɨ dɔ dõ kɨmaj tɔi.

³⁶ Kɨmadg ɓaitɔ deg tajɨnd, ndand kɨ ndeh riw riw. Dɔɔn kɨmadg kɨ jinjirg, na ũnd kam dangait.

³⁷ Madngétadg tɨland kɨ mbal tɔlɨnd, tɨja gangɨnd dene joo kɨ sii, tɔlɨnd kɨ nyakatg, kɨmadg ndian kɨgo log kɨkanj la nya mad kɨ kut dɔ rod, na lan ngɨra batg kɨ ngɨra bĩãg tã rodt, danggt ɗad, deg ɗan sed nya kɨmajal.

³⁸ Ĩn deg kɨmaj ngãi, na deg kɨ duniat oon majd al. Ndian kam mut kɨ dɔ mbalbog kɨ yo, kɨ nẽ. Ndan ɓe kam bulo mbalgt kɨ holɓeg kɨ dɔningt.

³⁹ Deg'n non tube adɨn kamd Luwah. Kɨtɔ 'nten la telɨn ne nyandaj kɨta koosɨg. Titbe kaa ne, nya'n Luwah unɨn kɔn ad'd ye, deg'n non ngahn al.

⁴⁰ Kɨtɔ Luwah ɔj nya mad kɨmaj tɔi kɨtatɔj kete woi. Kɨtɔ 'nten, ndig kad deg'n non teen kɨ kasɨnatapt kɨkanj'j al.