Hebreg 10 - Maktub Ta Kumkajir

¹ Mberkɨnda lo Moij ɔj go ndil nyag kɨmajg'n ndɨ ɗen nõ. In ro nyag kɨ jeje al. Mberkɨnda lo Moij el deg kad kɨ lan kadkarig kɨjamosɨ kɨ ɓal kɨɗen kad lan kadkarig kɨ kɨɗa'n non kɨ ɓal ɓal. Kɨtɔ 'nten la mberkɨnda lo Moij asɨn kad tel deg'n ndɨ ndɔt'n kɨro Luwaht, ad asɨn na tap kɨtakul kadkarig'n non al.

² Ĩla i be al a ne, ni deg'n ndɨ ɗan kɨla ndub Luwah, a ĩn kɨ kar dɔ majalgt lod nja kɨɗabe parkɨnõt ho, kamd a hɔd kɨ ta gog al ta, na a nyan ta la kadkarig kɨjamosɨ.

³ Na i titbe al, kɨta kadkarig'n non ndɨ ɗan ad kam deg gah dɔ majalgt lod kɨ ɓalg tube.

⁴ Kɨtɔ mosɨ bɔw mang kɨ bal bĩã asɨ kɔrr majal lo deg kɔ al bat.

⁵ Kɨtɔ 'nten, lon kaglo asɨ kad Krist ɗe dɔningt ye, el Bɔwɨn an: I ndig kadkari kɨ lahor kɨ kadkari kɨ la kɨ kam ndig al, na i pel dãro adɨm kad m'tel m'laa kadkarit m'adi.

⁶ Kadkari kɨ la horr dɔ dɨngɨrt, kɨ kadkari kɨta majalg adɨn ronel al tɔ.

⁷ Taa ne, m'eli m'an: Mĩ la m'ɗan, m'ndig ɗa nya kɨgo ndigt loi Luwah, kɨgo tat'n ndangɨn maktubgt kɨkunjɗang.

⁸ Dasabang el an: I ndig kadkarig kɨ la horr dɔ dɨngɨrt, kɨ kadkarig kɨtɔ majal kɨ ɗa al, kɨta adɨn ronel al bat.

⁹ Kamla Krist el Luwah an: Oo m'ɗe kad m'ɗa kɨgo ndigt loi Luwah. Krist ɔrr kadkarig kɨdasa'n non kɔ, kad gagootd kɨ kadkari lon, ad i koi Krist.

¹⁰ I kɨta Jeju Krist'n ɗa kɨgo ndigt lo Luwah, ad ron kadkarit kɨ jamosɨ nja kɨɗabe parkɨnõt la, Luwah teljɨn degt kɨjaɓat kad majalt kɨ ɗa.

¹¹ Ngejamosɨ kadkari kɨɗen taa, a ɗa dõ kɨndɔgndɔg kad ɗa kɨla ndub Luwah, ɗa jamosɨkadkari kɨ kɨɗa'n non kɨ kaglog tube kɨ njanatnatbe, ad Luwah, be kaa ne, kadkarig kɨjamosɨ'n non asɨn kɔrr majal kɨ ɗa lo deg kɔ al.

¹² Na Krist taa, la kadkari nja kɨɗabe do ad Luwah kɨtɔ majal lo deg, kamla ndɨ ber ko jikõ Luwaht.

¹³ Labekɨnõt, Krist ndɨ ngoo kad Luwah la madngétaag girr tɔgaat.

¹⁴ Titbe, Krist la kadkari nja kɨɗabe koon kad deg arɨn ne dɔ majalt ho kad teld ad asɨnatap mbãkɨnõt.

¹⁵ Ndil Kɨkunjɗang ndɨ manaj kɨ tɨga wakɨsɨ an: Kadkari lo Krist kɨɗabe do asɨ.

¹⁶ Bɨraɓe Luwah el an: Oon kunkɔ'n m'a m'un m'adsɨ go ndɔgt'n non laten, kel Bɨraɓe. M'a mad mberkɨndag lom i kamdt, m'a m'ndang mberkɨndag lom ngar kamdt.

¹⁷ Kamla Ndil Kɨkunjɗang elta tɔ an: Kamm a gah dɔ majalgt kɨ ɗagootalg lod gog al.

¹⁸ Na lon majalg ĩn kɨ nyàgo kɔ ye, ndaa kadkarig kɨjakɔ kɨta majalg goto ta.

Ad kɨ ndɔt'n kɨ ro Luwaht

¹⁹ Kɨtɔ 'nten, ngankõ jĩ kɨ kam kɨ ger ɓet kad kɨ ngahn ta ɗob kand kam lot kɨjaɓat kɨ tɔitɔi, kɨkanj kad nya mad ɔgj dɔ, kɨtakul mosɨ koi lo Jeju.

²⁰ Jeju tee ta ɗob kɨ kij kɨ kumkajir adj kad kɨ tɔin kɨ gid kub gang lot. Girra i titbe: J'andɨn kɨtakul dãroa'n gan kagdosɨt.

²¹ Kɨ ndɨ kɨ bɨra ngejanyamosɨkadkari ĩn hã ndɨ oo go nyag kɨ kam kujt lo Luwah.

²² Kɨtɔ 'nten, ad kɨ ndɔt'n kɨ ngarkam kɨro, kɨ kam kɨ ndah dɔ Jejut kɨtaagbe, kɨ ngarkamj kɨ kar dɔ majalt kɨ nyag tube'n ndɨ hɔj kɨ ta, kɨ roj kɨ tugo kɨ man kɨjanjoi.

²³ Ad kɨ hɔn go nya ndahkamdɔt loj jɔgum ad i nya'n Luwah un kɔ'n adj kɨ tɔ, maj kad kɨ ɓad al.

²⁴ Ad kɨ ndan kumj go nat kad kɨ ɗa kɨ na, kɨtakad j'ɔjɨn na tar ho, kɨ ɗan maj kɨ na ho.

²⁵ Ot kad kɨ nyan ta kawj na kɨnat tit'n deg madg ndɨ ɗan ne. Na i soot kad kɨ ɗan kɨna kad j'awɨn kɨ ketekete, tit kan hã i ndɨ oon ne ndɔ lo Bɨraɓe i nderbe.

²⁶ Ĩla kɨ ger rota maj, na kɨ tel ndɨ kɨ hɔ majal kɨ ɗa kɨgo kam ndigt loj a ne, kadkari mad kɨɗang kɨta kɔrr majalg loj kɔ goto.

²⁷ Na jĩ taa, nya mad kɨɗang kɨtatɔj goto, na ndɨ kɨ ngoo kɨ rondad wong kɨ tɔl sɔkɨr kɨ takɨgang lo Luwah kɨ tit horr kɨ õ giling giling'n a õ madngéta Luwah mugɨj.

²⁸ Lon de mad mbet tel ron go mberkɨndat lo Moij a ne, kɨgo tat lo ngémanaj joo ke mɨta'n lan ta dɔat ye, a tɔlɨna kɨkanj kookumtondo.

²⁹ Ĩla i titbe a ne, de'n ndɨ oo Ngon Luwah nya madt al a ne asɨ ta takɨgang lo Luwah kɨkootɓool. Ĩla mbet a ne, ndɨ oo mosɨ kunkɔ'n tela kɨjaɓat't nya kɨ karit, ndɨ taj Ndil Kɨkunjɗang'n ad kɨ ger kamkẽ lo Luwah.

³⁰ Ã kɨ ger Luwah'n el an: Ndangɨra i lom, m'a m'baji dekɨɗen kɨgo kɨlaɗaat. Kɨ ger kad el tɔ an: Bɨraɓe a gangta dɔ degt lon.

³¹ I nya kɨkootɓool ngãi kad de so ji Luwaht kɨ Ngekumkajɨr.

³² I gaan dɔ nyat'n ɗa nya maɗi lon i ngahn ne ta lo Luwah dasabang, kaglot'n non i ngahn kõ ngãibe ji degt, na i hɔn tɔgsɨ bá kam ɗɔɔt kɨ ngang ngãi.

³³ Ndɔ madg deg tajsɨn, ɗan sesɨ nya kɨ to takum degt; kaglo madg i ndan rosɨ nat kɨ ngankõsɨg'n deg ɗan sed nya kɨmajal kɨ titbe tɔ.

³⁴ Kɨtɔ i dain yosɨ nat kɨ ngankõsɨg kam dangait kɨtakul Jeju Krist. Lon hɔsɨn dangait ye, ɔin nyaɓetrog losɨ kaa ne, i ɗan ronel be; kɨta oo i gerɨn ɓet kad i ndɨn kɨ nyaɓetro kɨmaj tɔi kɨ a tokɨnõt.

³⁵ Kɨtɔ 'nten, ot kadɨn rosɨ oi siw. Kɨtɔ ĩla i hɔntɔgsɨba a ne, a i ngahn nyabaji kɨbobe.

³⁶ Ĩla i hɔntɔgsɨ bá kad i ɗan ndig lo Luwah a ne, a i taan nya'n Luwah unɨn kɔ'n adsɨ.

³⁷ Kɨtɔ Maktub el titbe an: Nãi kaglo tẽbe ɓaitɔ, nãi ngãi al ta, kad ĩn hã ndɨ ɗa lo ɗe a ɗe, a ɗe nderbe.

³⁸ Titbe kaa ne, de kɨdenesew, kɨtakul kadkam Luwah la, a ndɨn kɨ dɔn dõ ye, na ĩla de mad tel kɨgog a ne, rom a nelɨm sia al.

³⁹ Na jĩ taa, jĩ ngétel kɨ gog kad kɨ nuj kɔ al, na kɨ ndɨ kɨ jad kamj Luwah kad kɨ j'ajɨn.