Hebreg 1 - Maktub Ta Kumkajir

Luwah elta kɨtakul Ngonɨn

¹ Maɗi nu, Luwah elta bɔwjg kɨtakul ngékelta kɨ tant. Luwah eld ta kɨ nja natbe, kɨgo ɗob kɨ dang dang nja ngãibe tɔ.

² Na tajigla kam ndɔg kɨ dɔboit 'nten, Luwah elj ta kɨtakul Ngonɨn'n ndaa ngekõnduba dɔ nyagt tube. Luwah ɗa nyag tube kɨ kam dɔrãt kɨ kɨ kam dɔningt kɨtakula.

³ Ngon Luwah'n non, i nyẽr kunj majkoo Luwah kɨɗangeɗeng, i ɓakumta Luwah jeje, i ngendɨna nyag tube'n Luwah ndah kam duniat kɨtakul tɔg ta kɨ tant. Lon tɔlkon kɨla karj dɔ majalgt woi ye, got gog tel aw dɔrãt, aw ndɨ ber ko jikõ Luwaht kɨ ngetɔg kɨ tɔitɔi dõ dɔrãt.

Ngon Luwah i kɨbo tɔi malaikag

⁴ Ngon Luwah'n non i kɨbo tɔi malaikag tube. Kɨtɔ Luwah ada tɔ kɨbo tɔi tɔg tube.

⁵ Kɨtɔ Luwah el malaika mad an: Ĩ Ngonɨm, ɓone m'tel Bɔwi. Luwah elta kɨ titbe malaika an: M'a mĩ Bɔwi, ĩ tɔ a i Ngonɨm nja kɨɗa al. Luwah elta kɨ titbe malaika lon mad nja kɨɗa al.

⁶ Na lon kaglo asɨ, ad Luwah ndɨ ɗa lo kad Ngon derr'n ɗe dɔningt ye, el an: Kɨ malaikag lo Luwah tube ɔsɨn dɔd ber nõat.

⁷ Luwah elta dan dɔ malaikag an: Luwah ad malaikag lon ĩn tit nélg kɨ la be, ad ngékɨlaɓerg lon awɨn kɨla Kanag tit ndõhorrg be tɔ.

⁸ Na Luwah elta dan dɔ Ngonɨn an: Ĩ Luwah, pong kõɓe loi ndɨ londɨnt mbãkɨnõt, a õɓe dɔ girrdegt loi,

⁹ kɨ goɗob nyaɗat kɨdenesew, na i mbet ɗagootal kɨta 'nten la Bɔwi Luwah, Luwah loi kɔtɨn, na urrɨn yib ronel, tɔi mad tɔgig.

¹⁰ Luwah elta 'nten tɔ an: Lo yaɓoodat nu, ĩ Bɨraɓe la i ndah girr dɔning ye, dɔrã tɔ i kɨlaɗa jii.

¹¹ Nyag'n non tube a tɔin kɔ, na ĩ taa i ndɨ londiit mbãkɨnõt, na nyag'n non tube a ngisɨn tit kub be.

¹² A i ɓird tit pal be, nyag'n non a mbelɨn tit kub, na ĩ taa i ndɨ gootit mbãkɨnõt, ɓalig kaa ne, a tɨgan al bat.

¹³ Nõ ku malaikagt Luwah ela an: I ɗe i ndɨ ko jikõmt, mbã kad m'tel madngétaig mad ĩn girr tɔgit a?

¹⁴ Na malaikag ye, ĩn nõg a? Malaikag ĩn ndilg kɨ ngéɗakɨlaɓer lo Luwah, Luwah ndɨ lad kɨ ro degt kɨ a ngahn kaj kɨtakad ɗan sed.