Galatiag 6 - Maktub Ta Kumkajir

Maj kad ngétaata lo Krist ɗan kɨ na

¹ Ngankom, ĩla i teen dɔ det mad kɨ tɔidɔta a ne, ĩgɨn Ndil Luwah i kamsɨt ye, i ɗan sia, kɨ hal kɨ sayelɨl kad tel kɨ ro Bɨraɓet. Kɨ dekɨɗen kusɨt oo go ron maj, na ɓeta ĩ kɨɓe kɨ dɔn náana.

² I taan na dɨlalot dɔ nyat kɨɗen'n ndɨ ɔisɨ, ĩla i ɗan titbe a ne, i ndɨ telɨn rosɨ go mberkɨndat lo Krist.

³ Na ĩla de mad oo ron nya madt, na i nya mad al a ne, ndɨ gool ron ta gool.

⁴ Kɨ dekɨɗen nder girr kɨlaɗan maj oo, ĩla maj a ne, kɨ ɗa ronel dɔt, na i kɨtakad ɔjɨn ron kɨ de mad al.

⁵ Kɨtɔ dekɨɗen a la bar girr nya tot lon kɨ kɔsɨdɔn.

⁶ Na kɨ de'n ndɨ ndoona Hoita kɨmaj sumba kad gan na dɔ nyamajgt lon kɨ ngendoon.

⁷ Dɔ tat 'nten: Ot kad udɨn mut, de kɨ asɨ gool Luwah goto, kɨta nya kɨ ɗi'n de ndɨ dub a ne, nya'n non la a tet ye.

⁸ Ĩla de ndɨ duw nya kɨgo nyurkõt kɨmajal lo dãro a ne, a ngah koi kamt; na ĩla duw nya kɨgo Ndilt kɨkunjɗang a ne, a ngah kumkajir kɨ mbãkɨnõt kɨtakul Ndil Luwah.

⁹ Ot kadɨn roj oi yelel dɔ ɗamajt. Kɨtɔ ĩla roj oi yelel al a ne, lon kaglo asɨ woi, j'a kɨ tet nya kɨmaj'n hã kɨ dub nõ.

¹⁰ Kɨtɔ 'nten, ĩla kɨ ngah kaglo sĩ ɓaitɔ a ne, ad kɨ ɗan kɨla kɨ maja i kɨta deg tube, na kɨ tɔi 'nten, ad kɨ ɗan maj kɨ ngankõ ngétaata lo Krist.

Kɔjtag kɨ dɔboit kɨ lapia kɨ ɗa

¹¹ Oon maktub kɨbo dodo'n m'ndang kɨ jim mĩ kɨɓe m'adsɨ.

¹² Deg'n ndɨ hɔsɨn kɨ lo ngetɔgt kad i jan gaj ye, ndɨ ɗan titbe kad deg oond deg kɨjarawt kɨgo kɔjtaɗat lod. Na ndigɨn kad i jan gaj, na ɓeta n'ngahn kõ kɨta la mber koi Jeju Krist kagdosɨt.

¹³ Deg'n ndɨ jan gaj ye, ndɨ ngomɨn go mberkɨnda lo Moij al, na ndigɨn kad j'asɨn gaj kɨtakad ngan ne buro dɔ jat'n j'asɨn gaj.

¹⁴ Na mĩ Pol taa ne, m'ndig gaburo dɔ nyat kɨɗabe. M'ndɨ m'gaburo dɔ kagdosɨt lo Bɨraɓe loj Jeju Krist tã. Kɨtakul koia kagdosɨt, nyag kɨ duniat telɨn nya kɨ kari pãbe takum'mt tit gand dɔ kagdosɨt be. Mĩ tɔ, gamɨn kagdosɨt ad mĩ kɨ koi dɔ nya kɨ duniat.

¹⁵ Gaj kɨja, ke gaj kɨja al i nya mad al, na nyan ndaa i tit, i kad de tel nyandah kɨ kij.

¹⁶ Na deg tube'n ndɨ awɨn kɨ ketekete go ɗob nyandoot 'nten ye, kɨ Luwah ad'd lapia, kɨ kookumtondo i nat sed ho, kɨ i nat kɨ girrdeg lo Luwah tɔ.

¹⁷ Labekɨnõt, kɨ de mad ndam dɨlalot al ta, kɨta m'aw kɨ ndɨna doog kam dãromt ad i kuro do'n manaj takĩm ɓer lo Jeju.

¹⁸ Ngankom, kɨ majkurr lo Bɨraɓe loj Jeju Krist i nat sesɨ. Amin.