Galatiag 1 - Maktub Ta Kumkajir

Lapia

¹ Mĩ Pol, ngombangkɨla lo Jeju Krist la m'ndang maktub 'nten m'adsɨ ye. Mĩ ngombangkɨla kɨgo ndigt lo de al, ke de hã ɗa sem adɨm m'tel ngombangkɨla al. Na mĩ ngombangkɨla kɨtakul Jeju Krist'n ɔda ɓai ku ngékoigt.

² Ngankõg tube'n ĩn nat sem ndan tad nat kad m'ndang maktub 'nten mad ngékawnag kɨ dɔning Galat't kɨ m'eldɨn m'an:

³ Kɨ Luwah kɨ Bɔwj kɨ Bɨraɓe loj Jeju Krist adsɨn majkurr kɨ kam kɨsokɨber.

⁴ Jeju Krist oi kɨtatɔj kad Luwah nyan go majalg loj kɔ, kɨtakad ug ɔrrjɨn girr tɔgt lo dunia kɨmajal'n ɗan, tit'n Luwah kɨ Bɔwj ndigɨn kad ɗa.

⁵ Kɨ kɔsɨgon i kɨ dɔ Luwaht mbãkɨnõt. Amin.

Hoita kɨmaj i kɨɗabe do

⁶ Ngankõ ta losɨ yam biw, kɨta i ndɨ telɨn gidsɨ kanangbe adɨn ĩn hã kunsɨ kam majkurrt lo Krist kad i ndulon go Hoita kɨmaj mad kɨɗang.

⁷ Hoita kɨmaj mad kɨɗang goto, na ĩn hã m'lasɨ mbera nõ koon. M'elta titbe, kɨta deg madg awɨn nõ, ĩgɨn telɨn dɔsɨ wãri, ndigɨn kad'n mbelɨn hoita kɨmaj lo Jeju Krist ngankodang.

⁸ Ĩla de mad, ke jĩ, ke malaika mad, ɗisɨ ko dɔrãt kad'n lasɨ mber hoita kɨmaj mad kɨdang kɨ ĩn hã kɨ lasɨ mbera a ne, kɨ i kɨ ndɔl.

⁹ Tit'n j'elsɨn kete woi ye, tajigla m'ndɨ m'elsɨ ɓaitɔ. Ĩla de mad lasɨ mber Hoita kɨmaj mad kɨdang, kɨ ĩn hã i taan woi a ne, kɨ i kɨ ndɔl.

¹⁰ Kɨtɔ tajigla m'ndɨ m'sah kɨ m'maj takum degt e? Ke takum Luwaht a? Ã ã. M'ndɨ m'sah kɨ m'maj takum Luwaht koon. Ke m'ndɨ m'sah kɨ m'nel deg e? Ĩla m'ndɨ m'sah jeje kad m'nel deg a ne, m'a mĩ ɓer lo Krist al.

Go ɗob'n Pol telɨn ngombangkɨla

¹¹ Kɨtɔ 'nten m'elsɨ kad i gerɨn maj ngankom, Hoita kɨmaj'n m'lasɨ mbera maɗi ye, ɓai ko ro det al,

¹² i ta kɨ m'taa ko ro det al, ke de mad hã ndoom hoita kɨmaj'n non al, na i Jeju Krist la tee dɔ adɨm ye.

¹³ Kɨtɔ oon hoi nyaɗam kɨ maɗi, lon m'a m'ndulon go nyaɗa kɨgo nyabelɓet lo Juipg. Kaglot'n non m'da kum ngékawnag lo Luwah ndo, kɨkanj kookumtondo, m'ndig kɨ m'nujd kɔ.

¹⁴ I gerɨn maj tɔ kad m'aw kɨ ketekete kam nyabelɓet lo Juipg, ad m'tɔi madmg ngãibe, ĩgɨn ɓalɨm asɨna sed ku girrdegt lom; m'tĩ rom kat kad m'ɗa kɨgo nyabelɓet lo bɔwɨmg tɔ.

¹⁵ Na Luwah kɨgo kamkẽt loa, kete lon oojmɨn ne al ɓaitɔ ye, nela kad kɔtɨm, ndam kɔtkokɨɗa, kamla kunɨm kad m'ɗa kɨlaɓer madɨn.

¹⁶ Na lon Luwah ndig kɨ'n tee dɔ ngonɨn ad m'gera kɨtakad m'la mber hoita loa kɨ ro girrdegt kɨ dang dang ye, kaglot'n non m'sah takɔj ko ro det mad al.

¹⁷ M'aw ɓebot kɨ Jerusalem ro degt'n ĩn ngombangkɨlag kete nõmt al tɔ, na m'ɓai m'aw dɔning Arabit, kamla m'tel m'ɗe gog ɓebot kɨ Damasɨ.

¹⁸ Ɓal mɨta got kamla m'aw ɓebot kɨ Jerusalem kad m'oo Kepas, ad i Pierr; m'aw m'ɗa ndɔ kɨlah gidaimi roat.

¹⁹ Na m'oo de mad kɨɗang ku ndeg ngombangkɨlagt al, na Jak kɨ ngonkõ Bɨraɓe tã.

²⁰ Dɔ nyagt'n m'ndɨ ndang m'adsɨ ye, oon maj m'ndɨ m'elsɨ kɨ tɨga wakɨsɨ nõ Luwaht: I takɨbal hã m'ndɨ m'elsɨ al, na i rota.

²¹ Kamla m'aw dɔning Sirit, kɨ dɔning Silisit ye.

²² Kaglot'n non ngékawnag lo Krist kɨ kam dɔning Judet oon takum nja kɨɗa al.

²³ Na oon hoitag'n deg elɨn dɔmt ta koo anan: De kan maɗi dakum ngétaata lo Krist ndo ye, tajigla ndɨ la mber hoita kɨmaj lo Krist kan tĩ ron kat kɨ'n nuj kɔ nõ.

²⁴ Ɔsɨngon Luwah dɔ tat lom.