Ester 3 - Maktub Ta Kumkajir

Haman sah ɗob tɔl Juipg

¹ Go nyagt 'nten ngar Asuerus tɔi Haman, ngon Hamedata kɨ Agagia, kɨ dõ ada londɨ kɨbo tɔi mbaiɓeg tube kɨ ndɨn nat sen.

² Ngékɨlaɓerg lo ngar tube'n ɗan ta ndogt lo ngar lan dɔd ber ɔsɨn ningt nõ Hamant kɨta titbe la ngar ndamber dan dɔa ye, na Mardoke la dɔn ber al.

³ Kamla ɓerg lo ngar ngeɗa ta ndogt lo ngar ndɨjen Mardoke anan: Kɨtɔɗi i tɔi dɔ mberkɨnda lo ngar a?

⁴ Tit'n elɨna ta'n non kɨndɔgndɔg na tur go al ye ɔrrɨn hoia Haman kad n'oon ke ta lo Mardoke a to lo tont a, kɨta el an: Nĩ Juip.

⁵ Na lon Haman oo Mardoke la dɔn ber al ye, wong ɗoosɨ kamm Haman.

⁶ Hɔ Mardoke kɨɗabe koon i nya mad al roat kɨta teen dɔ girrdeg lo Mardoke adɨna. Kɨtɔ 'nten Haman sah ɗob nuj Juipg tube kɨ kam kõɓet lo Asuerus kɨtaagbe, ad i girrdeg lo Mardoke.

⁷ Nah kɨdasa, ad i nah Nisan, ɓal kɨ kõkɨlah gidaijoo lo kõɓe lo Asuerus, lan Purim, ad yan yuk, kɨ nah nah. Lan kɨ nah nah mbã nah kɨ kõkɨlah gidaijoo, ad i nah Adar.

⁸ Kamla Haman el ngar Asuerus an: Girrdeg madg ndɨ nõ, tĩn na kɨ dan girrdegt kɨ dang dang kam nusɨ dɔninggt ɓekõt loi tube. Mberkɨndag lod i tadang kɨ kɨlo girrdeg kɨɗang tube na ngomɨn go mberkɨndag lo ngar al. Kɨtɔ 'nten a maj kɨta ngar kad nyad kari al.

⁹ Ĩla ngar oo maj ad ndamber kad nujɨnd na m'a mad nar arjã dub kɨlah ji ngékoogo nyag lo ngar kad ũn kam kujngom nyamajgt lo ngar.

¹⁰ Kamla ngar ɔr ngon ninga lon jint ad Haman ngon Hamedata kɨ Agagia, madngéta Juipg.

¹¹ Ngar el Haman an: M'nya nar arjã kɨ girrdeg'n non tu jiit kad i ɗa sed nya kɨ kami ndig.

¹² Ndo kɨkɨlah gidaimɨta lo nah kɨdasa ye, kunɨn ngéndang maktubg lo ngar ad ndangɨn nyag tube kɨ Haman eltaa ad Prepetg lo ngar kɨ ngekõɓeg kɨ ndɨn nusɨ dɔninggt tube kɨ mbaiɓeg lo deg tube. Ndangɨn kɨgo ɗob ndang maktub lo nusɨ dɔning kɨɗen kɨ taɓe lo girrdeg kɨɗen tɔ. Ndàngɨn tɔ ngar Asuerus dɔt na ɔsɨn kɨ kase kɔsɨdɔnya lo ngar.

¹³ Adɨn maktubg ji ngékawkɨlagt kɨ awɨn ne kɨ nusɨ dɔningg tube lo ngar kad nujɨn kɨ tɔlɨn Juipg ad goton de kɨ dɔdug kɨ ngahtɔgg, ngan kɨdug kɨ dekɨdẽg kam ndɔt kɨ kɨɗabe. I ndɔ kɨkɨlah gidaimɨta kam naht kɨkɨlah gidaijoo, ad i nah Adar. A tirɨn nyag lod purpur.

¹⁴ Ta kɨ ndàng kɨ mberkɨnda lan mbera kam nusɨ dɔningt kɨɗen na elɨn deg tube kad ɗan rod oi kɨta ndɔ'n non.

¹⁵ Ngekawkɨlag awɨn kɨdõt kɨgo tat lo ngar. Lan mbera kam ɓebot kɨ Sus. Ngar kɨ Haman ndɨn ber kɨta kãi nya na kam deg kɨ ɓebot kɨ Sus dad tapa.