Ester 1 - Maktub Ta Kumkajir

Murnam kɨbo lo ngar Asuerus

¹ Kaglo'n Asuerus õɓe dɔ nusɨ dɔninggt asɨ ɓu kɨ dɔjoo gidaitanaimɨta, na kõɓe loa ɓai kɨko dɔning Indet mbã tee dɔning Etiopit.

² Kaglo'n non ngar Asuerus ndɨ dɔ pong kõɓet lon ɓebot kɨ Sus.

³ Ɓal kõɓe loa kɨkõmɨta ye, Asuerus ɗa mburnam kɨta mbaiɓeg kɨ ɓerg lon. Bɨraɗɔɔg lo Perse kɨ Medɨ kɨ mbaiɓeg kɨ ngékõɓe dɔ nusɨ dɔninggt kawɨn na kɨ nõat.

⁴ Ɔjd nyamajg kɨbobo kam kõɓet lon kɨmaj kɨtɔitɔi lo londɨn kɨbo, asɨ ndɔ ɓu kɨ dɔjijoo.

⁵ Lon ndɔg tɔin ye, ngar ɗa mburnam asɨ ndɔ tanãimɨta kam ndɔɔt kɨ gug dɔ kuj lo ngar kɨta deg tube kɨ ɓebo Suset, kɨbog kɨ kɨdug.

⁶ Kubg kɨ sɔl lom lom kɨndà ngũng kɨ kɨkɨre wor wor in kɨ ga dõ kɨ kɨla kub lẽ kɨkɨre pirɨr kɨ ngan ninga nar arjãg kad pilie mbal marbɨrt. Tɨra nar ɔrg kɨ arjãg in dɔ dɨngɨr marbɨrt kɨkɨre kɨ kɨkil musɨmusɨ kɨ kɨnda kɨ kɨkil kirir.

⁷ Adɨnd nyakãi kam kop nar ɔrgt kɨ dang dang na kasɨnduu lo ngar i ngãi kɨta i ngar la ad'n kɨ kamndig lon ye.

⁸ Kasɨnduu'n non i kɨgo ndigt lo mberkɨnda, de a ãi kɨ lo ngetɔgt al, kɨta ngar ndamber ngéɗakɨlag lon tube kad ɗan kɨgo ndigt lo dekɨɗen tã.

⁹ Basti ngar kɨdẽ ɗa mburnam kɨta dekɨdẽg kamkuj kõɓet lo ngar Asuerus tɔ.

Asuerus ɔrr Basti kɔ dɔ kõɓet

¹⁰ Ndɔ kɨkõtanãimɨta lon kam ngar nela kɨta ãi kasɨnduu ngãi ye, ndamber Mehuman, Bijta, Harbona, Bigta, Bagta, Jetar kɨ Karkas, kùj dekɨdɨngãg kɨtanãimɨta kɨ ngékɨlaɓer lo ngar Asuerus,

¹¹ kad ɗen kɨ Basti ngar kɨdẽ nõ ngart kɨ jɔg ngar loa dɔat kɨta kɔj deg kɨ mbaiɓeg majkooa kɨta i dekɨdẽ kɨmaj takumɨnt ngãi

¹² Na Basti ngar kɨdẽ mbet kun lo ngar'n lan kùj dekɨdɨngãg. Dɔ tat'n non ngar ɓawong ngãi ad wong tɔla sɔkɨr.

¹³ Ngar elta kɨ ngéterrg kɨ ngéger kaglog, kɨ nyabelɓe, i titbe la a ɗan ne kɨ tubeg'n gerɨn mberkɨndag kɨ tagkɨgang.

¹⁴ Ngéndɨ ro ngart'n Karsena, Setar, Admata, Tarsis, Meres, Marsena kɨ Memukan, mbaiɓeg kɨtanãimɨta lo Perse kɨ Mede. Ĩgɨn non la oon takum ngar na ĩn kɨdasa kam kõɓet.

¹⁵ Asuerus el an: J'a kɨ ɗa bãi kɨ Basti ngar kɨdẽ kɨgo ɗob mberkɨndat a? Kɨtɔ tel ron go tat'n ngar Asuerus lan kùj dekɨdɨngãg al.

¹⁶ Memukan turta el ngar kɨ mbaiɓeg an: Basti ngar kɨdẽ ɗa nya kɨgoot al 'nten nõ ngart hã kɨɗabe al, na nõ mbaiɓegt tube kɨ deg tube kɨ ndɨn kam nusɨ dɔninggt tube lo ngar Asuerus,

¹⁷ kɨta nya'n ngar kɨdẽ ɗa ye, hoia a tĩ kɨ ro dekɨdẽgt tube kad kidɨn ngawdg. A elɨn anan: Ngar Asuerus ndamber kad ɗen kɨ Basti ngar kɨdẽ nont na mbet ɗe.

¹⁸ Ɓone nẽ mbaiɓeg kɨ Perse kɨ Medɨ a oon hoi nyaɗa ngar kɨdẽ a ne, ĩn tɔ a ɗan titbe kɨ mbaiɓeg lo ngar ho. Goot gog i kid kɨ wong kɨngãibe.

¹⁹ Ĩla ngar oo maj a ne, ad ndamber kad ndàngɨn kam maktub mberkɨndat lo Perseg kɨ Medeg kɨ dum mbel, kad Basti a tee nõ ngart gog al, na kɨ ngar un dekɨdẽ mad kɨmajtɔi ɔrrɨn goota.

²⁰ Lon lan mberkɨnda lo ngar kam kõɓet loa kɨtaagbe, dekɨdẽg a ɔsɨn gon ngawdg, kɨbog kɨ kɨdug.

²¹ Takɔj 'nten nel ngar kɨ mbaiɓeg na ngar ɗa kɨgo tat lo Memukan.

²² Ngar la kɨ maktubg ad nusɨ dɔningg lon tube, nusɨ dɔning kɨɗen kɨgo ɗob ndang kɨ taɓe loa, kɨ ro girrdegt kɨɗen kɨ taɓe loa kɨ kan: Sumba kad dekɨdɨngã kɨɗen i kɨbo dɔ kujt lon kɨ kɔsɨdɔn na a elta kɨ taɓe lo deg lon.