Esdras 9 - Maktub Ta Kumkajir

Esdras elta kɨ Bɨraɓe dɔ taanat kɨ goɗobat al

¹ Lon ɗan nyag'n non tɨga woi ye, mbaiɓeg ndɔt'n kɨromt anan: Israelag kɨ ngéjanyamosɨ kɨ Lebiag jan rod ɓat ro deg kɨ dɔningt'n ɗan al. Ndɨ ɗan nyag kɨyerr lo Kananag, Hetiag, Perejiag, Jebusiag, Ejiptiag, Amoniag.

² Kɨtɔ taan kɨ madg ku ngandgt kɨdẽ nẽdgt kɨta rod na kɨta ngandg kɨdɨngã tɔ. Ɗan titbe mbã ad girrdeg lo Luwah kɨjaɓat burɨn na kɨ deg kɨ dang dang kɨ dɔningt'n ɗan. Rota mbaiɓe kɨbog in ngéɗamajalg tɔi ndeg deg dɔ majalt 'nten.

³ Lon m'oo nyag 'nten ye, m'til kubg lom kɨ kubji lom, m'ret bisɨ dɔm kɨ mbaitam tube kɔ, m'ndɨ ber but, ta yam biw.

⁴ Kɨtɔ majal kɨɗa lo deg'n telɨn ɓeɓert, deg tube kamd dad ta paa kɨta ta lo Luwah lo Israel ye, kawɨn na kɨromt, ndɨn ber, ta yam mbã kaglo la kadkari kɨ lokɨsɔle.

⁵ Dɔkàd la kadkari kɨ lokɨsɔle ye, m'ɓai dõ lo hɔndo lom kɨ kubg lom kɨ kubji lom kɨ til, na m'ɔsɨ gojɨm ber, m'la jim kɨ ro Bɨraɓe Luwaht lom,

⁶ na m'el m'an: Luwah lom, mĩ kɨ rosɔl, ta yam biw, m'asɨ kad m'un kum kɨdõroit al kɨta ɗagootal loj ɗen kɨdɔtdɔt mbã tɔin dɔj tɔidɔtag loj, tɔidɔtag loj awɨn mbã teen dɔrãt.

⁷ Mba girra kaglot lo bɔwjg mbã ɓone, tɔl dɔ tag loj in kɨbo. Kɨtɔ majalg loj, lo ngar loj, lo ngéjanyamosɨ loj, lajɨn ji ngargt kɨ dɔninggt kɨ dang dang. Tɔljɨn, awɨn sej ɓert. Taan nya loj na nyàjɨn kam rosɔlt kɨbobe mbã ɓone.

⁸ Tajigla kɨta kaglo kɨ tẽbe'n ɗan Bɨraɓe loj ɔj'j kamkẽ. I nya ndeg girrdeg loj ad telɨn ɓeɓert, na adj loyaro kam lot lon kɨjaɓat, kad Luwah loj ad takumj unj, na adj tɔg sĩ kam kɨlaɓert loj.

⁹ Ke jĩ ɓerg kaa ne, Luwah loj nyàj al, na ɗa sej ad kɨ ngah majkurr takum ngargt kɨ Perse. Adj tɔg sĩ kad kɨ ɗan kuj lo Luwah loj kɨ dõ gog, kɨta ɗa gotlo kɨ tuj, na adj loyaro kam Judat kɨ Jerusalem.

¹⁰ A Luwah loj, tajigla ka j'an ɗi go nyagt 'nten a? Kɨtɔ jĩ kɨ tur go mberkɨndag loi al,

¹¹ mberkɨndag'n i nda kɨtakul ɓerg loi, ngékelta kɨ tait, an: Dɔning'n a i ndɨnt, a i taan nyakagɓet losɨ, i dɔning kɨyerr kɨta nyaɗakɨyerr lo deg kɨ dang dang, kɨ kɨta nyaɗa kɨ majal lod in ɗan ad dɔning ɗoosɨ kɨyerr kɔtko mad mbã teen ko lot mad kɨɗang.

¹² Kɨtɔ 'nten ot kadɨn ngansɨg kɨdẽ taan ngandg kɨdɨngã, ot taan ngandg kɨdẽ kad ngansɨg kɨdɨngã, a i sahn ɗa sed kad ngahn tɔg kad i san nyag kɨmaj tɔi kɨ dɔning'n ɗan, na i nyan dɔning'n ɗan ad tel nyanduba lo ngansɨ mbãkɨnõt

¹³ Go nyagt tube'n tee dɔjt asɨ kɨta kɨlaɗaj kɨmajal kɨ tɔidɔta kɨbo loj, in Luwah loj, i gangta dɔjt asɨ kɨgo ɗagootal loj al, na i ngom ndeg deg kɨ telɨn ɓeɓert adj

¹⁴ J'a kɨ tel kɨ tɔi dɔ mberkɨndag loi kad kɨ taana kɨ girrdeg kɨ ngéɗa nyag kɨyerr 'nten ɓaitɔ? A i ɓawong sej mbã kad i tuj'j ad ndeg deg kɨnãi goto, ad de mad kɨɗa tee al e?

¹⁵ Oo Bɨraɓe Luwah lo Israel ĩ kɨdenesew kɨta ɓone ndeg deg loj teen ɓeɓert. Oo jĩ kɨnõit kɨ tɔidɔta loj kɨta de kɨɗa kɨ asɨ duba ɗa nõit goto.