Esdras 8 - Maktub Ta Kumkajir

Tɔ deg'n telɨn nat kɨ Esdras

¹ Tɔ deg 'nten i tɔ bɨradɔ girrnoojg kɨ girrkaa'n ɓain nat sem mĩ Esdras, Babilon kaglo kõɓe lo ngar Artaserses.

² Ku ngan Pinast, Gersom i dɔdt. Ku ngan Itamart, Daniel i dɔdt. Ku ngan Dabidt, Hatus i dɔdt

³ Ngon Sekania mad, ku ngan Pareos kɨ tɔa i Jakari i dɔdt, deg'n in nat sia ye tɨdand ad kɔrd asɨ ɓu kɨdɔmi.

⁴ Eljoenai i ngon Jerahia, i dɔ ngan Palat Moab, deg'n in nat sia asɨn dub joo.

⁵ Sekania ngon Jahajiel i dɔ ngan Jatut asɨn ɓu mɨta

⁶ Ebed i ngon Jonatã i dɔ ngan Adint, deg dɔmi in nat sia.

⁷ Ejai ngon Atalia i dɔ ngan Elamt, deg'n in nat sia kɔrd i dɔtanãimɨta.

⁸ Jabadia ngon Mikael i dɔ ngan Septiat, deg'n in nat sia asɨn dɔjijoo.

⁹ Abdias ngon Jehiel i dɔ ngan Joab, deg'n in nat sia kɔrd asɨ ɓujoo kɨkɨlah gidaijijoo

¹⁰ Selomit ngon Josipia i dɔ ngan Banit't, deg ɓu kɨ dɔkɨbojidet in nat sia.

¹¹ Jakari ngon Bebai i dɔ ngan Bebait, deg dɔjoo gid kɨjijoo in nat sia.

¹² Yohanan ngan Hakatan, i dɔ ngon Ajgadt, deg ɓu kɨkɨlah in nat sia.

¹³ Elipelet, Jehiel kɨ Semaya in ngan Adonikam kɨdu, deg'n in nat sed in dɔkɨbojidet.

¹⁴ Utai, Jakur in ngan Bigbai, deg'n in sed ye kɔrd i dɔtanãimɨta.

Esdras kun ngéɗakɨla kam kujt lo Bɨraɓe

¹⁵ M'kawd kɨ nat kad baht kɨ Ahabat, na kɨ hɔlondɨ nu ndɔ mɨta. M'sah dan degt, kam ngéjanyamosɨt, na Lebia kɨɗa kaa m'ngaa kamdt al.

¹⁶ Kamla m'la m'kun Eliejer, Ariel, Semaja, Elmatan, Jarib, Elnatan, Natan, Jakari, Mesulum, kɨbo madg nat kɨ Jojarib kɨ Elnatan kɨ ngendoo deg.

¹⁷ M'lad kɨ ro Idot, ngar kɨ ɓet'n tɔa i Kasipiat, na m'eld tag kɨ kad elɨn Ido kɨ ngankõa kɨ ngéɗakɨlag kam kujt kɨjaɓat't kɨ ndɨ Kasipia kɨtakad ɗen kɨ ngéɗakɨla kam kujt lo Luwah loj.

¹⁸ Tit'n ji Luwah loj kɨmaj i dɔjt ye ɗen kɨ de mad kɨ tɔa i Serebia, na i de kɨ ngeterr. Kɔtɨna ku ngan Makli kɨ ngon Lebi, ngon Israel. Ɗe nat kɨ nganɨn kɨ ngankõng, in deg kɨlah gidaijoo

¹⁹ na Hasabia ɗe tɔ kɨ Ejai ku ngan Merarit, ngankõa kɨ ngandg, in deg dɔjoo.

²⁰ Ku ngéɗakɨlag kam kujt kɨjaɓat ĩgɨn Dabid kɨ kɨbog ndand kɨtakad ɗan kɨlaɓer adɨn Lebiag, deg ɓujoo kɨ dɔjoo, kunɨnd tube kɨ tɔd.

Deg ɗan rod kɨta tel kɨ Jerusalem

²¹ Nu kad bah Ahabat ye, m'la mber kɔgro nyasa kad kɨ sɔl dɔj nõ Luwaht loj, na kɨ kɔa ɗob kɨmaj kɨtɔj kɨ kɨta nganj, nyaɓetroj tube.

²² Mĩ kɨ rosɔl kad m'ndɨje ngar ngéɗɔɔ kɨ ngesɨndag kad ɗan sej, taajɨn ji madngétajigt dɔ ɗobt kɨta j'el ngar j'an: Jĩ Luwah loj i dɔ degt tube kɨ ngésah goa kad ɗa sed maj, na tɔga kɨ wong loa i dɔ degt tube'n turɨn goa al.

²³ Kamla j'ɔg roj nyasa, kɨ ko kɨdɔ Luwaht loj dɔ nyat 'nten na oo dɔ kɔ loj.

²⁴ Goot gog m'kɔt ngéjanyamosɨ kɨbog kɨlah gidaijoo kɨ Serebia kɨ Hasabia kɨ ngankõd kɨlah nat sed.

²⁵ Mbɔj nar arjã kɨ ɔr kɨ jo ɗakɨlag m'ad'd, ad i kadkari kɨta kuj lo Luwah loj in ngar kɨ ngékɔjtag loa kɨ mbaiɓeg loa kɨ Israelag tube kɨ ndɨn nu adɨn.

²⁶ Mbɔj, m'la jidt nar arjã tõn dɔjoo, nyag kɨ ɗan kɨ nar arjã kɨ gatd i ngãi tõn mɨta,

²⁷ kop nar ɔr dɔjoo kɨ gatd asɨ nar dubkɨɗa kɨ tasa ningakasɨ kɨmaj kɨndulo ngẽingẽi jo kɨ gatd i ngãi tit nar ɔr be.

²⁸ Na m'eld m'an: Ĩn deg kɨjaɓat kɨta Bɨraɓe na jo ɗakɨlag in kɨndakɔt ko kɨɗa. Nar arjã kɨ ɔr i kadkari kamndig kɨta Bɨraɓe Luwah lo bɔwsɨg.

²⁹ Oon god na i ngomɨnd maj mbã i mbɔjd nõ bɨradɔ ngéjamosɨgt kɨ Lebiag, kɨ bɨradɔ girrnoojg lo Israel, Jerusalem, kam ngan kujgt kɨ kuju lo Bɨraɓe.

³⁰ Kamla ngényamosɨ kɨ Lebiag taan nar arjã kɨ ɔr nat kɨ jo ɗakɨlag kɨ mbɔjɨn nõ, awɨn ne Jerusalem kam kujt lo Luwah loj.

Esdras kɨ deg teen Jerusalem

³¹ Ndɔ kɨ kõkɨlah gidaijoo lo nah kɨdasa ye, kɨ ɓai bah Ahabat't j'aw Jerusalem. Ji Luwah loj i dɔjt, ug ɔrrj ji madngétajgt kɨ ĩgɨn ndɨ umɨnj ɗobo.

³² Kɨ tee Jerusalem kɨ taakò ndɔ mɨta.

³³ Ndɔ kɨkõsɔɔ kɨ mbɔj nar arjã kɨ ɔr kɨ jo ɗakɨlag kam kujt lo Luwah loj jad Meremot ngon Uri ngejamosɨ Eleajar ngon Pinẽas i nat sia kɨ Lebiag, Jojabad ngon Jojue kɨ Noadia ngon Binui.

³⁴ Tɨndan na, mbɔjɨn nyag'n non tube na ndangɨn kɔrd tube tɔ.

³⁵ Deg'n non awɨn sed ɓert na telɨn ɓeɓert adɨn kadkarig kɨlahorr kɨta Luwah lo Israel kɨtaagbe, bal batg dɔjikɨɗa gidaitanaimɨta, ngan batg dɔtanãimɨta, na bal bĩãg kɨlah gidaijoo kɨta kadkari kutdɔ majalkɨɗa. Tube in kadkarig kɨlahorrt kad Bɨraɓe.

³⁶ Adɨn mberkɨndag lo ngar mbaiɓeg kɨ ngékõɓeg kɨdɔ nusɨ dɔning kɨ gid baht. In tɔ ɗan kɨ deg kɨ ngéɗakɨla kuj lo Luwah.