Esdras 7 - Maktub Ta Kumkajir

¹ Go nyagt 'nten, kaglo kõɓe lo Artaserses ngar kɨ Perse, de mad i nõ tɔa i Esdras.

² I ngon Seraja, ngon Ajaria, ngon Hilkija.

³ Ngon Salum, ngon Sadok, ngon Ahitub.

⁴ Ngon Ngongon Jerahia, ngon Uji, ngon Buki.

⁵ Ngon Abisua, ngon Pinẽas, ngon Eleajar, ngon Aarõ kɨ bɨra ngejanyamosɨ kadkari.

⁶ Esdras taa ne ɓai Babilont, i de kɨ ndoo maktub ngãi, kamla ger kɔr girr maktub mberkɨnda lo Moij maj ngãi, mberkɨnda'n Bɨraɓe Luwah lo Israel ad'd maɗi nu, na tit'n ji Bɨraɓe Luwah loa i dɔat ye, nyag tube'n ndɨje ngar a ne, ngar a ɗa ada.

⁷ Israelag madg, ad i ngéjamosɨ kɨ Lebiag kɨ ngékɔsɨpag kɨ ngéngom tabitg kɨ ngéɗakɨla kam kujt kɨjaɓat ɗen Jerusalem kam ɓalt kɨkõtanãimɨta lo ngar Artaserses.

⁸ Esdras tee Jerusalem kam naht kɨmi, kam ɓalt kɨ kõ tanãimɨta lo kõɓe lo ngar.

⁹ Kɨtɔ ndɔ kɨdasa lo nah kɨdasa la ɓai Babilont so ɗobo ye, na kam ndɔt kɨdasa lo nah kɨkõmi la tee Jerusalemt kɨta ji Luwah loa i dɔat.

¹⁰ Kɨtɔ Esdras nda kamɨnt kɨ'n nder girr mberkɨnda lo Bɨraɓe kɨ'n ngomɨn goa, kɨ'n ndoo Israelag Komãdɨmãg kɨ mberkɨndag tɔ.

Mberkɨnda lo Artaserses kɨta Esdras

¹¹ 'Nten i ta lo Artaserses kɨ ngar'n ndang kam maktub ad Esdras, ngéjanyamosɨ kɨ ngendoo maktub, ngéger girr nyag kɨ kam Komãdɨmãgt lo Bɨraɓe kɨ mberkɨndag.

¹² Artaserses ngar lo ngarg kɨ ro Esdras ngejanyamosɨ kɨ ngendoo maktub, ngeger mberkɨndag lo Luwah kɨ Ngedɔrã. Tajigla

¹³ oo, mberkɨnda lom laten: Israelag kɨ ndɨn kam kõɓet lom, ngéjanyamosɨ kɨ Lebiag lod, dekɨɗen'n kɨ kama ndig kaw Jerusalemt gog a ne, i nyàa ad aw nat sei.

¹⁴ Ngar kɨ Ngékɔjtag loa tanãimɨta lan kɨta ndɨje ta dɔ Judat kɨ Jerusalem kɨgo mberkɨndat lo Luwah kɨ to jiit.

¹⁵ Nar arjã kɨ ɔr kɨ ngar kɨ ngékɔjtag loa adɨn Luwah lo Israel kɨ kamndig, a ɔi awɨn adɨn Luwah'n londia i Jerusalem,

¹⁶ nat kɨ nar arjã kɨ lɔr tube'n a i ngah kam nusɨ dɔning kɨ Babilont tube, ad i kadkarig kɨ deg kɨ ngéjanyamosɨ adɨn kɨ kamndig kɨta kuj lo Luwah lod Jerusalem.

¹⁷ Nar 'nten ta i ndugon bɔw mangg kɨ bal bĩãg kɨ bal batg kɨ nduj kɨ nyakãig, i lad dɔ dɨngɨr kadkarit kɨ kuju lo Luwah loi Jerusalem.

¹⁸ Ta kɨ dɔ ndeg nar lɔr kɨ nar arjã taa ne, ĩ kɨ madkɨlaig a i ɗan ne kɨla kɨgo ndigt lo Luwah losɨ.

¹⁹ Ta kɨ dɔ jog'n tɔɔn adɨn kɨta ɗan kɨlaɓer lo Luwah taa ne, a i nda nõ Luwaht kɨ Jerusalem.

²⁰ Nya kɨɗen'n i ge kɨta kuj lo Luwah, na i ngah ɗob kɨta ɗan a ne, nya'n non a i ngah kam kuj ngom nyamajt lo ngar.

²¹ Mĩ ngar Artaserses, m'ndamber ngékoogo nyamajg tube kam nusɨ dɔning kɨ gid bah Eprat't m'an: Nya kɨɗen kɨ Esdras, ngejanyamosɨ, kɨ ngendoo maktub, ngeger mberkɨndag lo Luwah kɨ Ngedɔrã a ndɨjesɨ a ne, a i ɗan tentenbe,

²² a adɨna mbã asɨ talã kɨ nar arjã kɨ kɔya asɨ kɨlo dub mɨta, kɨlo geme dub mɨta, man nduu litɨr dub mɨta, yib litɨr dub mɨta, na kat taa ne kɨ kaj mbɔj.

²³ Nya kɨɗen kɨ Luwah kɨ Ngedɔrã nda mbera, sumba kad i kɨ ɗa tentenbe kɨta kuj lo Luwah kɨ Ngedɔrã, na ɓeta ɓawong dɔ kõɓet lo ngar kɨ ngana.

²⁴ Jad i gerɨn maj kad de taa lambo, ke tirr dɔ nya, ke taa lambo lo de'n ndɨ tɔi ɗobo, ji ngéjanyamosɨt, ke Lebiag, ke ngékɔsɨpag, ke ngéngom tabitg, ke ngéɗakɨla kam kujt lo Luwah'n ɗan.

²⁵ Na ĩ Esdras, kɨgo terrt lo Luwah kɨ to kamit, a i nda ngégangtag kɨbo kɨ kɨdug kɨtakad gangɨn ta ku degt kɨ ndɨn kam nusɨ dɔningt kɨ gid bah Eprat't kɨtaagbe. A ĩn deg kɨ ngéger mberkɨndag lo Luwah loi, na ĩgɨn gerɨn al a ne, i ndood.

²⁶ Na dekɨɗen n'ngom go mberkɨnda lo Luwah loi al ke mberkɨnda lo ngar al tɔ a ne, a i gangɨn ta dɔat kanangbe, ke koi, ke tuɓana kɔ, ke kɔi nyag loa, ke lana dangait.

Esdras ndub Bɨraɓe

²⁷ Kɔsɨgon kɨdɔ Bɨraɓe Luwaht lo bɔwjg'n nda ta kɨtitbe kam ngart kad ɗa nyag kɨmajmaj kujt lo Bɨraɓe kɨ Jerusalem,

²⁸ na ɔjɨm kamkẽ lon nõ ngart kɨ ngékɔjtag loa kɨ mbaiɓeg kɨbobo tube. Kɨtɔ 'nten m'ngan tɔg kɨta ji Bɨraɓe Luwah lom i dɔmt, na m'kaw kɨbo madg ku Israelagt kad awɨn nat sem.