Esdras 6 - Maktub Ta Kumkajir

Darius ɗa go kɨgo mberkɨndat lo Sirus

¹ Kamla ngar Darius ndamber kad sahn kam kuj ngom maktubt, lo ngom nyamajg kɨ Babilon.

² Kam Ekbatan, ɓebo kɨ kam dɔning Medit, ngahn maktub mad na ta kɨndang kamt i titbe.

³ Kam ɓalt kɨdasa lo kõɓe lo Sirus kɨ ngar, ngar Sirus'n non ndamber kɨta kuj lo Luwah kɨ Jerusalem kad kɨ ɗan kuj'n non gog, lon a lan kadkari kɨjakɔ kɨlahorr tit. Ngala kɨ dõ asɨ metɨr dɔmɨta, tata asɨ metɨr dɔmɨta ho.

⁴ Ndan mbalg kɨbobo njɔrr mɨta, na kag kɨ kij njɔrr kɨɗa, nar kɨ kam kujt lo ngar la a ban ne ngéɗakɨlag ye.

⁵ Titbe tɔ la ta lo jo nar ɔr, kɨ arjã kɨ kam kujt lo Luwah'n Nebukadnesar ɔi kam kuj ndub Luwaht kɨ Jerusalem, awɨn Babilon a tel adɨn gog ad ɗen ne kuj ndub Luwaht kɨ Jerusalem, nya kɨɗen a ndɨ lo ndɨnt. A i ndand kam kuj ndub Luwaht.

⁶ Tajigla ĩ Tetanai ngekõɓe dɔ nusɨ dɔning kɨ gid baht kɨ Setar Bojnai kɨ madkɨlasɨg ngékõɓeg kam nusɨ dɔning kɨ gid baht, ɔrrɨn rosɨ kɔ.

⁷ I nyand ad ɗan kɨla kuj lo Luwah, ad ngekõɓe lo Juipg kɨ kɨbog lod ɗan kuj lo Luwah gog gootat kɨkete.

⁸ Oon, 'nten la i mberkɨnda'n m'adsɨ dɔ kɨlat kɨ sumba kad i ɗan kɨta kɨbog lo Juipg kad ɗan kuj lo Luwah'n ɗan gog. A i ɔin kam nart lo ngar, ad i nar lambo lo nusɨ dɔning kɨtaagbe, a i ban ne gat nyag'n non kɨtaagbe kɨ deg tɔ, na i ɗan tajigla.

⁹ Nya kɨɗen kɨ a i geen, ad i bɔw mangg, bal bĩãg, kɨ bal batg kɨta kadkarig kɨ lahort kad Luwah kɨ Ngedɔrã, geme, kat, kasɨnduu, ke yib, kɨgo tat lo ngejanyamosɨ kɨ Jerusalem a ne, kɨ adɨnd kɨ ndɔ kɨɗen kɨkanj nya ta

¹⁰ kɨtakad lan kadkarig kɨ kootmbĩ adɨn Luwah kɨ Ngedɔrã na a kɔn kɨta ndɨ kɨ dɔdõ lo ngar kɨ ngana.

¹¹ M'ndamber tɔ m'an: Dekɨɗen'n tɔi dɔ 'nten a ne, kɨ deg ɔrrɨn kag kuj loa ɔsɨn ne kama mbutɨn, na gana dõ ad kuj loa tel ɓirɓit.

¹² Kɨ Luwah'n ad Tɔ'n ndɨ dɔ lot'n non tuj ngarg tube kɨ girrdeg tube'n sahn mbel mberkɨnda 'nten ngankodang ke tujɨn kuj lo Luwah non kɨ Jerusalem: Mĩ Darius, m'ndamber kad deg telɨn rod got tentenbe.

Tɔlɨn kon kɨla kuj lo Bɨraɓe

¹³ Dɔtat lo Darius kɨ lan ye, Tatenai ngekõɓe dɔ nusɨ dɔning kɨ gid baht kɨ Setar Bojnai kɨ madkɨlag telɨn rod go tat tentenbe kɨgo tat'n el.

¹⁴ Titbe tɔ la kɨbog lo Juipg ɗan ne kɨla kuj, na kɨla maj jidt kɨtakulndil kɨ ndɔ lo Aje ngekelta kɨ ta Luwaht kɨ Jakari ngon Ido. Ɗan kuj'n ɗan tɨgan kɨgo tat lo Sirus kɨ Darius kɨ Artaserses, ngarg kɨ Perse.

¹⁵ Ɗan kuj'n ɗan tɨgan kɨ ndɔ kɨkõmɨta lo nah Adar kam ɓal kõɓet kɨkõtanãimɨta lo Darius.

¹⁶ Israelag kɨ ngejanyamosɨ kɨ Lebiag kɨ ndeg deg'n telɨn ɓeɓert ngomɨn go ɗa nah kɨta kuj lo Luwah'n ɗan tadang kɨ ronel.

¹⁷ Kam ndɔt'n ndan kuj lo Luwah'n ɗan tadang ye, adɨn kadkari bɔw mangg, bal bĩãg ɓujoo kɨ ngan batg ɓusɔɔ, na kɨta kadkari kutdɔ majal lo Israelag tube, adɨn bal bĩã kɨlah gidaijoo, ad i kɨgo kɔr Israelag kɨgo girrdt.

¹⁸ Ndan ngéjanyamosɨ kɨ Lebiag kɨgo kɨlagt lod kad ɗan kɨlaɓer adɨn Luwah Jerusalemt tit'n ndangɨn ne kam maktubt lo Moij.

Juipg ɗan nah Pakɨ

¹⁹ Deg kɨ ɓeɓert ngomɨn go ɗa nah Pakɨ kam ndɔt kɨlah gidaisɔɔ lo nah kɨdasa, ɗan nah Pakɨ.

²⁰ Kɨtɔ ngéjanyamosɨ kɨ Lebiag arɨn rod nat, tube telɨn kɨ karnyang. Jan kɔ ngon bat kɨta ɗa nah Pakɨ, kɨta deg tube kɨ telɨn ɓeɓert, kɨta madkɨladg, na kɨta rod tɔ.

²¹ Israelag ĩgɨn telɨn ɓeɓert, kɨ deg tube'n ndan rod nat sed, na ɔrrɨn rod nya kɨyerr lo deg kɨ dɔningt'n non kɨta kɔsɨ dɔd ningt nõ Bɨraɓe ad'd ronel na ad kam ngar kɨ Asiri ĩn sed na ɗa sed dɔ kɨla kujt lo Luwah, Luwah lo Israel.

²² Ngomi go ɗa nah kɨkanj berrkasɨ kɨ ronel ndɔ tanãimɨta kɨta Bɨraɓe ad'd ronel, na ad kam ngar kɨ Asirit nda bung sed, na ɗa sed dɔ kɨla kujt lo Luwaht, Luwah lo Israel.