Esdras 5 - Maktub Ta Kumkajir

Ngan Israelag unɨn ta kɨla kɨ kij gog

¹ Ngekelta kɨta Luwaht Aje kɨ Jakari, ngon Ido, kɨ Juipg'n ndɨn dɔning Judat kɨ Jerusalem, elɨnd ta kɨ tee ta Luwaht lo Israel'n i dɔdt.

² Kamla Jorobabel ngon Salatiel kɨ Jojue ngon Josadak ɓai mbã girr ɗa kuj lo Luwah kɨ Jerusalem. Ngékelta kɨ ta Luwaht ĩn nat sed tɔ.

³ Kaglot'n Tatenai ngekõɓe dɔ nusɨ dɔningt kɨ gid baht kɨ Setar Bojnai kɨ madkɨladg ɗen rodt, ndɨjend ta anan: Nõ adsɨ ta ɗob kad i ɗan kuj kɨ ndogbɔrr'n ɗan a?

⁴ Ndɨjend ta tɔ anan: Tɔ deg ngéɗa kɨla'n ɗan ĩn nõg a?

⁵ Na Luwah nda kumɨn go kɨbogt lo Juipg ad ɔgɨnd ɗa kɨla'n non al, mbã kad ta tee ko ro Dariust'n ndɨ ngoon ta kɨ tur ko roat.

Tatenai ndang maktub ad Darius

⁶ 'Nten i ta kɨ ndangɨn kam maktubt'n Tatenai ngekõɓe dɔ nusɨ dɔningt kɨ gid baht kɨ Setar Bojnai kɨ madkɨladg, ngékõɓeg kam nusɨ dɔningt kɨ gid baht lan ne kɨ ro Dariust kɨ ngar.

⁷ Ndangɨn ta lan ne kɨroat, ta'n ndangɨn kam maktubt laten: Kɨ ro Dariust kɨ ngar, lapia ngãi.

⁸ Sumba kad ngar ger, jĩ j'aw kam dɔning Judat kam kujt lo Luwaht kɨbo. Juipg ɗan kuj'n non kɨ mbalg kɨbobo, na lan kagg dɔ ndogbɔrrt. Kɨla lod ndia maj ho, ndɨ aw kɨ ketekete ho.

⁹ Kamla kɨ ndɨje kɨbog'n non, na j'eld ta j'an: Nõ adsɨ ta ɗob kad i ɗan ne kuj'n ɗan kɨ ndogbɔrr a?

¹⁰ Kɨ ndɨje tɔd kɨtakad kɨger, kad kɨndang tɔ kɨbog lod'n ndɨn dɔ kɨlat'n non kad kɨ lan jadi.

¹¹ Oo ta'n turɨnj laten: Jĩ ɓerg lo Luwah kɨ Ngedɔrã kɨ Ngedɔning. Ndɨ kɨ ɗa kuj ndub Luwah gog, kuj'n ngar õɓe dɔ Israelt ɗa na tɔl kona maɗi.

¹² Na bɔwjg ɗan nya ad Luwah kɨ dɔrãt ɓawong sed, na lad ji Nebukadnesar ngar kɨ Babilon de kɨ Kalde ad tuj kuj'n ɗan, na ɔi deg aw sed ɓert Babilon.

¹³ Na kam ɓalt kɨdasa lo Sirus ngar kɨ Babilon, ngar Sirus ndamber kad ɗan kuj lo Luwah gog

¹⁴ Tasa nar ɔrg kɨ larjãg kɨ dang dang kɨ kam kujt lo Luwah, Nebukadnesar ɔi kam kuj ndub Luwaht kɨ Jerusalem na nda kam kujyogt kɨ Babilon. Ngar Sirus ɔi nyag 'nten kam kujyogt kɨ Babilon ad de mad kɨ tɔa i Sesbasar'n Sirus ndaa ngekõɓet,

¹⁵ na ela an: Ɔi nyaɗakɨlag 'nten, aw ũ kam kuj ndub Luwaht kɨ Jerusalem, na ad'd ɗan kuj lo Luwah gootat kɨkete.

¹⁶ Kamla Sesbasar ɗe nda girr kuj lo Luwah Jerusalem. Kaglot'n non ɗan kuj mbã ɓola tajigla na tɔlɨn kona al ɓaitɔ.

¹⁷ Kɨtɔ 'nten, ĩla ngar oo maj a ne, ad sahn kam kuj ngomnyat lo ngar kɨ Babilont, oon ke ngar Sirus ndamber kad ɗan kuj lo Luwah'n non Jerusalemt gog a, kamla kɨ ngar la kɨ dɔjt kad kɨ ger tagah loa.