Esdras 4 - Maktub Ta Kumkajir

Madngéta sah kɔgɨn Juda ɗa kɨla

¹ Lon madngétag lo deg kɨ Juda kɨ Benjami oon hoi deg kɨ hɔnd ɓert maɗi telɨn kɨta ɗa kuj lo Bɨraɓe Luwah lo Israel gog ye.

² Ɗen ro Jorobabelt kɨ bɨradɔ girrnoojgt, elɨnd anan: I nyanj ad kɨ ɗa kɨla kuj lo Bɨraɓe nat sesɨ kɨta kɨ ndulo go Luwah losɨ tit'n i ɗan ne ye be, na kɨ ja mosɨ Jada maɗi nu kaglot lo Esar Hadon ngar kɨ Asiri in ɔij ɗe sej nẽbe.

³ Na Jorobabel kɨ Jojue kɨ ndeg Bɨradɔ girrnoojg lo Israel turɨnd anan: I ta losɨ al kad i ɗan sej kad kɨ ɗa kuj lo Luwah loj, na jĩ kɨɓe j'a kɨ ɗa kuj jad Bɨraɓe Luwah lo Israel tit'n Sirus ngar kɨ Perse ndajɨn mbera.

⁴ Nõbe deg kɨ dɔningt'n non ɗan nya kɨta kɔrr tɔg deg kɨ Juda kɔ, kad ɓoolɨn ɗa kuj.

⁵ Adɨn nya ngékɔjtag kad ɔgɨn Israel dɔ ɗa kɨla. Ɗan titbe kaglo tube'n Sirus ngar kɨ Perse ndɨn kɨ dɔn dõ mbã kɨ kõɓet lo Darius ngar kɨ Perse.

⁶ Kaglo kõɓe lo Asuerus, lon mban girr kõɓe lon, deg ndangɨn maktub kundɔ ngendɨ Juda kɨ Jerusalem.

Ndangɨn maktub adɨn Artaserses

⁷ Ɗan titbe tɔ kaglot lo Artaserses. Bislam, Miteredat, Tabeel kɨ ndeg madkɨladg ndangɨn maktub adɨn Artaserses ngar kɨ Perse. Ndangɨn kɨgo ɗob ndang ta aramea, na mbelɨn kɨta aramea tɔ.

⁸ Rehum ngekõɓe, kɨ Simsai ngendang maktub ndangɨn maktub adɨn ngar Artaserses kɨta kun dɔ Jerusalem anan:

⁹ Rehum ngekõɓe kɨ Simsai ngendang maktub kɨ ndeg madkɨlagdg, ad i Dinag, Aparsatakag, Tarpelag, Aparsag, Erekag, Babiloniag, Suseag, Dehag, Elemag,

¹⁰ nat kɨ deg madg'n Osnapar, de kɨbo kɨ ngetɔko, ɔind ad ndɨn kam ɓebot kɨ Samari kɨ lo madg kɨɗang kɨ gid baht.

¹¹ 'Nten la i ta kɨ ndang kam maktubt'n lan kɨ ro Artaserses kɨ ngar: Ɓerg loi, deg'n ndɨn nusɨ dɔningt kɨ gid baht, ɗain lapia,

¹² na tajigla sumba kad ngar ger, Juipg'n ɓain kokɨroit teen rojt ne Jerusalem, ndɨ ɗan ɓebog'n ĩ ɓe kɨ ngétaaɗɔɔ kɨ ngéɗamajal. Ndɨ ɗan ndogbɔrr na ndan girra kij.

¹³ Kɨ ngar ger girr nya'n non, ĩla ɗan ɓebo'n non gog, ɗan ndog bɔrra tɔ ho a ne, a ban lambo al, ke dɔ nya tirrt, ke lambo lo ngétɔi ɗobo.

¹⁴ Jĩ kɨ sa kat kam kuj ngomɓet, na maj takumjt al kad j'oo rosɔl'n ndig lan dɔ ngart. Kɨtɔ 'nten kɨ lan maktub kad gerɨn hoitag lo bɔwig. A i ngah ta kam maktub hoitag kɨ dɔ ɓebot'n ɗan, na a i ger kad i ɓe kɨ ngétaaɗɔɔ tuj ngarg kɨ nusɨ dɔningg maɗi ye.

¹⁵ Na kɨtakad sahn kam maktub hoitag kɨdɔ ɓebot'n ɗan na a i ger kad i ɓe kɨ ngetaaɗɔɔ. Ta 'nten kɨtitbe la nujɨn ne ɓebo'n ɗan maɗi ye.

¹⁶ Ta 'nten j'el ngar kad ger, ĩla ɗan ɓe'n ɗan gog na ɗan ndogbɔrr a ne, a i ngah nya mad kam nusɨ dɔning kɨ gid baht al bat.

Artaserses ndamber kad nyan ta kɨla

¹⁷ Ngar turta la'n ad Rehum ngekõɓe kɨ Simsai ngendang maktub kɨ ndeg madkɨlag'n ndɨn gid baht an:

¹⁸ lapia, na tajigla maktub'n i lan ne adj ye, ndɨ dan, tit'n i ndang ne nomt.

¹⁹ M'ndad mber kɨ sahn na ngahn ta kɨdɔ ɓebot'n ɗan. Maɗi ɓai ndoor ngarg na sɨla deg kɨtit ad taan ɗɔɔ.

²⁰ Ngarg kɨ ngétɔg ndɨn Jerusalemt kete, na õnɓe dɔ nusɨ dɔningt tube kɨ gid baht. Ban lambo na tirrɨn dɔ nya na taan lambo lo ngétɔi ɗobo tɔ ho.

²¹ Kɨtɔ 'nten i ndan mber kɔgdɔ kad deg'n non nyan ta ɗa ɓe na kɨ m'nda mbera kɨkij kamtã.

²² Oon go rosɨ maj, ot ɗan ndang kɨ ta 'nten na ɓeta nya kɨmajal ɗe kɨdɔtdɔt ad tuj ngar.

²³ Lon tɨdan maktub lo Artaserses nõ Rehumt kɨ Simsai ngendang maktub kɨ madkɨlaagt ye, awɨn kanangbe Jerusalem, hɔn Juipg kɨ lo ngetɔgt kad nyan ta kɨla'n non.

²⁴ Kamla nyan ta ɗa kuj lo Luwah kɨ Jerusalem. Nyan ta kɨla'n non mbã ɓal kɨkõjoo lo kõɓe lo Darius ngar kɨ Perse.