Esdras 3 - Maktub Ta Kumkajir

Ɗan dɨngɨr kadkari gog

¹ Lon nah kɨkõtanãimɨta tee, na Israelag tube ĩn kam ɓegt lod ye, deg tube kawɨna Jerusalem tit de kɨɗabe.

² Kamla Jojue ngon Josadak kɨ madag ngéjanyamosɨ kadkarig kɨ Jorobabel ngon Seatiel kɨ ngankõa ɓai, ɗan dɨngɨr lo Luwah lo Israel kɨta la kadkari kɨ lahor kɨgo tat'n ndangɨn kam maktub mberkɨndat lo Moij kɨ de lo Luwah.

³ Ndahn dɨngɨr dɔ girrat kɨ maɗi, na lan kadkari dɔt adɨn Bɨraɓe kɨsĩ, kɨ lokɨsɔle kɨta ɓoolɨn girrdeg kɨ dang dang kɨ dɔningt'n ɗan.

⁴ Ngomɨn go ɗa nah kujkamg tit'n ndangɨn ne, na lan kadkarig kɨ lahort kɨndɔgndɔg kɨgo kɔrat'n gang adɨnd kɨta ndɔ kɨɗen.

⁵ Goot gog lan kadkari kɨlahorrt kɨndɔgndɔg, kɨ kadkarig kɨta kij nah, kɨ ɗa nahg tube lo Bɨraɓe kɨ gangɨn ndɔd kɨ kadkarig'n deg tube adɨn Bɨraɓe kɨ kamndig.

⁶ Ndɔ kɨdasa lo nah kɨkõtanãimɨta lan girr la kadkarig kɨ lahort adɨn Bɨraɓe na ndan girr kuj lo Bɨraɓe al ɓaitɔ.

⁷ Adɨn nar ngegoosɨ tɔsɨ mbalg kɨ kagg, na adɨn nyasa kɨ nyakãi kɨ yib deg kɨ Sidõ kɨ Tir ton ne kag sedɨr kɨ Libãt kɨ ɗen ne ta bahbot kɨ Japo. Ɗan kɨgo tat'n Sirus ngar kɨ Perse ndad mbera.

Israelag mbã girr ɗa kuj lo Bɨraɓe

⁸ Kam ɓalt kɨkõjoo go teldt kɨ kuju lo Luwah Jerusalemt, kam naht kɨkõjoo, Jorobabel ngon Sealtiel kɨ Jojue ngon Josadak nat kɨ ndeg ngankõd madg, ngéjanyamosɨkadkari, kɨ Lebiag kɨ deg tube'n telɨn ɓeɓert, ɗen Jerusalemt, lan girr kɨla.

⁹ Jojue kɨ ngana, kɨ ngankõa, kɨ Kadmiel kɨ ngana, ngan Juda kɨ Henadad kɨ Lebiag kɨ ngand, kɨ ngankõd oon go ngéɗakɨla kuj lo Luwah.

¹⁰ Lon ngeɗakuj ndan girr kuj lo Bɨraɓe woi ye, ngéjamosɨ lan kub lod, ɗen kɨ towmand jidt, na Lebiag kɨ ngan Asap ɔin handg kɨta kɨ ko kengkeng kɨta ndubɨn Bɨraɓe kɨgo kɔjtaɗat lo Dabid ngar kɨ Israel.

¹¹ Kɨmadg ɔsɨn pa, kɨmadg ndigɨn pa kɨ tad ɔsɨngon Bɨraɓe na ɗan oiyo anan: Bɨraɓe kɨmaj, nyaɗakɨro loa kɨta Israel to mbã kɨnõt Deg tube kon kɨ ndid kɨbo ndubɨn ne Bɨraɓe kɨta ndahn girr kuj lo Bɨraɓe.

¹² Ngéjanyamosɨ kɨ Lebiag kɨ girrnoojg ngãibe, bɨga deg'n oon kuj kɨdasa lo Bɨraɓe maɗi ye, nõn kɨ ndid kɨbo lon oon ɗa ndan girr kuj kɨ kij. Kɨmadg ngãibe kon kɨ ronel tɔ.

¹³ Kɨtɔ 'nten de kɨ asɨ kɔrr m'ãi ndɨ ko lo deg, kɨ ndiko ronel lo deg nat al, kɨta deg kon kɨ ndid kɨbo ad de asɨ ko dɔ ndid ko sãi koon.