Epesiag 6 - Maktub Ta Kumkajir

Ta lo ngang kɨ ngékoojd

¹ Ĩn ngang i telɨn rosɨ go tat lo ngékoojsɨg kam Bɨraɓet, kɨta 'nten i goɗobat.

² Ɔsɨgon bɔwi kɨ kõi la i mberkɨnda kɨdasa'n kunkɔ to dɔt:

³ Kɨtɔkad maj urrɨn, kad i man yo dɔningt nẽ.

⁴ Ĩn bɔwg, ot ndan ndu ngansɨg kad ɗan wong, na i tond kɨ ndáng kɨ nyandoo, kɨ kɔj kɨgo Ndil Bɨraɓet.

Ta lo ɓerg kɨ ngédg

⁵ Ĩn ɓerg, i telɨn rosɨ gotat lo ngesɨg kɨgo dãrot, nat kɨ ɓool, kɨ ɓoolndil, kɨ kam kɨkɨɗa, tit i ndɨ i ɗan kɨla lo Krist be.

⁶ I ɗan kɨla adɨnd ta kumdt kad i nelɨnd ne hã koon al; na i ɗan ndig lo Luwah kɨ ngarkamsɨ tube tit ɓerg lo Krist be.

⁷ I ɗan kɨlaɓer losɨ kɨ kamndig tit i ɗa i ɗan kɨlaɓer lo Bɨraɓe ĩ kɨɓe be, na lo deg al,

⁸ tit'n i gerɨn ne ta kad dekɨɗen, ɓer ke detanyan a ngah bajin ko ro Bɨraɓet kɨgo majt'n ɗa.

⁹ Na ĩn ngéɓerg, i ɗan sed maj titbe ho, i nyan ta mbad; kɨta i gerɨn nged kɨ ngesɨ tu i kam dɔrãt dõ. Kɔrr de dene goto roat bat.

Nyakatg lo ngékadkamg

¹⁰ Ta kɨdɔboit laten: I sahn tɔgsɨ kam ndaronat kɨ Bɨraɓe kɨ kam tɔgat kɨ ngãi.

¹¹ I dɔn nyakatg'n Luwah adsɨ nõ tube rosɨt, kad asɨn ne ɗabijir nõ ndandogt lo Sɨtan.

¹² Kɨtɔ ɗɔɔn ndɨ kɨ ɗɔɔ nõ, ndɨ kɨ ɗɔɔ kɨ deg kɨ awɨn kɨ dãro kɨ mosɨ al, na i ɗɔɔ kɨ ndɨ kɨ ɗɔɔ kɨ tɔg ndilg kɨmajal kɨ dɔrãt, kɨ tɔg kõɓeg, kɨ tɔgg, kɨ bɨradɔg kɨ kam duniat kɨ tilɨn ɗan.

¹³ Kɨtɔ 'nten kɨ ɔin nyakatg lo Luwah tube, kad asɨn ne taaɗɔ madngétasɨg kam ndɔt kɨmajal, na lon i ɗɔɔn mbã dɔboia a ne, i ɗan bijir lo ɗasɨt.

¹⁴ Kɨtɔ 'nten i ɗan dɔ njasɨt. I dɔn ɓosɨ kɨ rota tit ngaland be, i lan denesew gusit tit parhand be,

¹⁵ na kɨ i lan ro kɨ ɗa woi kɨta lamber Hoita kɨmaj lo lapia njasɨt tit sanja be,

¹⁶ Unɨn kadkam i gan dɔ nyagt tube tit der be, kɨtakula la, a i tɔlɨn ne kɨrãg kɨ kõhorr tube lo ngemajal.

¹⁷ I taan kaj tit jɔghand be ho, i taan Ndil tit kiyaɗɔɔ be ad i Ta lo Luwah.

¹⁸ Elɨn ta kɨ Luwah kɨ kaglog tube kɨtakul Ndil, i kɔna kad ɗa sesɨ dɔ nyagt tube, i hɔn kelta kɨ Luwah, i ndɨn dɔgt dɔt. I hɔn rosɨ bá kamt, i kɔ'n kɨta deg kɨjaɓat lo Luwah tube.

¹⁹ I kɔ'n kɨtɔm ho, kad Luwah ndah ta lon tamt, ad lon m'ndɨ m'elta a ne, kɨ m'el kɨkanj ɓool, kɨ m'tee tam mad deg gerɨn girr takɨmund lo Hoita kɨmaj'n

²⁰ mĩ ngombangkɨlaa kam dangait. I kɔn Luwah kɨtɔm kad m'elta dɔt kɨ kam kɨmisɨmisɨ tit'n sumba loa kad m'elɨn.

Pol ɗa lapia deg

²¹ M'ndig kad ĩn kaa i gerɨn ji ndim kɨ kɨla'n m'ndɨ m'ɗa. Tisik ngonkõj kɨ ngetar loj, ngekɨlaɓer kɨro kam Bɨraɓet a ɔrrsɨ hoi nyag tube kɨ dɔmt ad oon.

²² M'laa kɨ rosɨt kad ɔrrsɨ hoij ho, lon a tee kusɨt a ne, a adsɨ ro ngang kɨ kamsɔl ho.

²³ Kɨ Luwah kɨ Bɔw, kɨ Bɨraɓe Jeju Krist adsɨn lapia kɨ tar nat kɨ kam kɨndahdɔt.

²⁴ Kɨ majkurr lo Luwah i nat kɨ deg tube'n ndɨ tarɨn Bɨraɓe loj Jeju Krist kɨ tar kɨ tokɨnõt.