Epesiag 5 - Maktub Ta Kumkajir

Ndia kam kunjt

¹ Kɨ ĩn ngéndaj Luwah, kɨta ĩn ngan tar loa,

² i ndian kam tart, tit'n Krist tarjɨn ye be, ĩ kɨɓe kɨ ron ad ron nyakɨla kadkarit, kɨ kadkari kɨjakɔ, ad Luwah kɨtaj, tit yib kɨ kootmbĩ kɨ sea nel Luwah.

³ Ĩn deg kɨjaɓat lo Luwah, kɨta 'nten ad gan tɔ ɗa dekɨdẽ, ke sah ngaw, kɨyerr kɨ ɗa, kɨ ɗa ta nar kusɨt al bat.

⁴ Ta kɨlikɨt, ta kɨɓod, ta kɨ lo lamt, ĩn tag kɨ sumba kelsɨ al, na maj kad elɨn ta kɨ Luwah kɨ mersi kɨ ɗa tã.

⁵ Kɨ i gerɨn ta 'nten maj: Ngeɗakaya, de kɨyerr, ngeɗata nar ad i ngeɗayo, a õn nduba kõɓe lo Krist kɨ kɨ lo Luwah al.

⁶ Ot kadɨn de mad goolsɨ kɨ tag kɨ kari pãbe: i nyag'n non tube la ndɨ ɔrrɨn wong lo Luwah kɨ dɔ ngédɔngangt ye.

⁷ Ot gon na dɔ nyat mad sed.

⁸ Maɗi ĩn til, na tajigla ĩn kunj kam Bɨraɓet. I ndian tit ngan kunj be.

⁹ Kand kunj i ɗamaj kɨɗen, kɨ ɗadenesew, kɨ rota.

¹⁰ I nulɨn nya kɨ nel Bɨraɓe oon;

¹¹ na ot ndan rosɨ nat dɔ kɨlagt kɨ kanda goto lo til, na maj kad i kɨjand kɨ tɨga wakɨsɨ.

¹² I nya kɨ rosɔl kad de elta nyag'n deg'n non ndɨ ɗan gid tilt,

¹³ na nyag'n kɨjand kɨ tɨga ye, a ton kɨ tɨga wang kɨtakul kunj,

¹⁴ kɨta nya kɨɗen'n to tɨga wang i kunj. Kɨtɔ 'nten la elɨn an: I ndool, ĩ kɨ ngeɓi, i ɓaidõ ku ngékoit, na Krist a unj dɔit.

¹⁵ Maj kad oon go pa ndiasɨ maj: Ot ɗan nya tit deg kɨ dɔd goto be, na kɨ ĩn ngéterrg;

¹⁶ i ɗan kɨla kɨ kaglo'n i ngahn, kɨta ndɔg ĩn kɨmajal.

¹⁷ Kɨ ot kĩn ngékumtɔgalg, na kɨ i gerɨn ndig lo Bɨraɓe.

¹⁸ Ot kadɨn man kand nduu ɗasɨ, kɨta man kand nduu a ndah denyaɗat kɨ papa, na maj kad i ɗoosɨn kɨ Ndil.

¹⁹ Adɨn tɔg na kɨtakul pag, kɨ pa ndubg, kɨ pag kɨgo Ndilt; ɔsɨn pag i ndubɨn ne Bɨraɓe kɨ ngarkamsɨ tube,

²⁰ i ɗan mersi Luwah kɨ Bɔw kɨ ndɔgbe, kɨta nyag tube, kam tɔ Bɨraɓet loj Jeju Krist.

Ji ndɨkɨna lo dekɨdẽ kɨ ngaw

²¹ Ĩn ngéɓool Krist, i lan dɔsɨ girr tɔgt lo na.

²² Ĩn dekɨdẽ ngéngawg, i lan dɔsɨ girr tɔgt lo ngawsɨg tit girr tɔgt lo Bɨraɓe be.

²³ Kɨtɔ ngaw i dɔ dekɨdẽ, tit'n Krist ĩn dɔ ngékawna ye be, ngékawna i dãro Krist, na Krist i ngekaj dãro ad i ngékawna.

²⁴ Na tit'n ngékawnag lan dɔd girr tɔg Krist't ye, kɨ dekɨdẽg lan dɔd girr tɔg ngawdgt ho, kam nyagt tube.

²⁵ Ngawg i tarɨn nẽsɨg tit'n Krist tarɨn ngékawna, na ĩ kɨɓe ad ron kɨ tɔa nõ;

²⁶ Krist ɗa titbe kad n'arɨn ngékawna, n'tela kɨjaɓat't lon tugoan kɨ man, kɨ ta lo Luwah,

²⁷ kɨtakad'n ndah ngékawna takumɨnt, ngékawna kɨ kɔsɨgon, kɨkanj yɨro, kɨkanj kũ ngɨra, ke nya mad kɨ titbe, na i kɨjaɓat, kɨ ta mad goto dɔat.

²⁸ Titbe la maj kad ngaw tarɨn nẽn tit ron be ye, de'n ndɨ tar nẽn a ne, ndɨ tar ron kɨ ron.

²⁹ Kɨtɔ de kɨ ɔsɨta dãron nja kɨɗa goto, na ndɨ ula ho, ndɨ ngoma ngom ngom ho, tit'n Krist ndɨ ɗan kɨ ngékawna ye be.

³⁰ Jĩ nganro dãro Krist ale?

³¹ Kɨtɔ 'nten la dekɨdɨngã a nya'n bɔwɨn kɨ kon, na a tĩnyan na kɨ nẽn, ĩn tujoo telɨn dãro kɨ kɨɗabe.

³² Takɨmund 'nten i kɨbo na ta'n m'ndɨ m'el, girra i ta lo Krist kɨ ngékawna.

³³ Na i ta losɨ ho: Maj kad ngaw kɨɗen tar nẽn tit ron be, na kɨ dekɨdẽ kɨɗen kɨɓol ndil ngawɨn ho.