Epesiag 4 - Maktub Ta Kumkajir

Pol sɔkɨ ngékadkamd Krist kad ngomɨn go kĩd kɨɗa kam Ndilt

¹ Mĩ kɨ dedangãi kam Bɨraɓet, m'ndɨ m'kɔsɨ kɨ rotĩm kad adɨn nyaɗasɨ asɨta kunɨn hã kunsɨn,

² kɨ i sɔlɨn dɔsɨ lom, ĩn kɨ sayelɨl, iren kamsɨ njirir dɔ nat kam tart;

³ i tĩn rosɨ kat kad i ngomɨn go kĩsɨ kɨɗa kam Ndilt kɨtakul kam kɨsokɨber'n i kɨla dɔsɨ nat.

⁴ Dãro i kɨɗabe, na Ndil i kɨɗabe ho, titbe la kunsɨn ne kɨ nya ndahkamdɔt kɨ kɨɗabe ho ye;

⁵ Bɨraɓe i kɨɗabe, kadkam Krist i kɨɗabe, Baptem i kɨɗabe,

⁶ Luwah i kɨɗabe, na i Bɔw deg tube, ndɨ õɓe dɔ nyagt tube, ndɨ ɗakɨla kɨ nyag tube, ndɨ kam nyagt tube.

⁷ Na dekɨɗen kuujt ngah majkurr kɨ sumba dɔn kɨgo mbɔj kadkarit'n Krist ada.

⁸ Kɨtɔ 'nten Luwah el kam maktubt lon an: Lon aw dõ ye, ɔi deg'n hɔd taɗɔɔt awɨn; ad deg kadkarig,

⁹ kel kan: Aw dõ ye, kam taa i ɗi a? Kam taa i kan: Krist ɗisɨ kɨ ber kete kam logt kɨ kokɨɓing kɨ girr dɔningt ale?

¹⁰ Ĩn ɗisɨ ye, i roa nõ la aw dõ tɔi dɔ dɔrãg tube kɨ dõ, kad'n ɗoosɨ log tube ye.

¹¹ Na kadkarig'n ad deg laten: Ad kɨmadg ĩn ngombangkɨlag, kɨmadg ĩn ngékelta kɨ ta Luwaht, kɨmadg ĩn ngélamber Hoita kɨmaj, kɨmadg ĩn ngéngom ngékawna kɨ ngéndoodeg,

¹² kɨtakad telɨn deg kɨjaɓat lo Luwah ad asɨn ɗa kɨlaɓer'n ndah dɔdt kad ɗan ne dãro Krist kɨ dõ kam kadkam Krist't,

¹³ mbã kad jĩ tube kɨ teen kij kɨɗa kam kadkam Krist't, kɨ ger Ngon Luwah, kad kɨ tel deg kɨ tɔg gang, mbã kad j'asɨna kɨ kahd Krist kam ɓakot't.

¹⁴ Titbe j'a jĩn ngan kɨdug gog al ta, ngan kɨdug'n hul man ndɨ lad kɨ njad dõ, nel nyandoo kɨɗen ndɨ ɔrrd kɨ log, kɨ yo kɨ ne, kɨ lo goolt lo ngéndandog'n a ndond.

¹⁵ Na jĩ taa, kɨ lo kel rotat kam tart, j'a kɨ tɔgɨn kam nyagt tube kɨ kam Krist'tn hã i bɨradɔ.

¹⁶ I ko roat, na i tambɔra la ngan rog ĩn ne kɨ tɔsɨ tanat, na dãro kɨtaagbe i kɨ lana wur kɨtakul dɔkurg'n Luwah ndah kamt, kɨɗen ndɨ ɗa kɨla kɨ tɔgɨn adɨna. Kɨtɔ 'nten lon ngon ro kɨ ɗen ndɨ ɗa kɨla lon maj a ne, dãro a tɔg, a ɗa ron kɨ dõ kam tart.

Kumkajir kɨ kij kam Krist't

¹⁷ Ta 'nten la m'ndɨ m'el, na m'ndɨ manaja kam Bɨraɓet ye, labekɨnõt, ot kadɨn pa ndiasɨ i kɨgo nyaɗa degt kɨ ngéger Luwah al, ĩgɨn nyaɗad i kɨgo tagahdgt kɨ pãbe.

¹⁸ Tagahd i til, ĩn sãi kɨ kumkajir lo Luwah, kɨta gerɨn nyamad al, kamd kongkong.

¹⁹ Gerɨn rosɔl al bat. Lan rod kɨ kam kayat kɨ ɗa. Hɔn ɗa nyaɗa kɨyerr kɨɗen jɔgum nat kɨ ɗa kumndà kɨkanj hɔ rod kɨ gog.

²⁰ Na ĩn taa, i titbe hã i ndoon ne ger Krist al.

²¹ Ɗuba oon dɔ ta loa, na i ndoon rota i kam Jejut.

²² Titbe, maj kad i nyan nyaɗasɨ kɨ maɗi, ɔrrɨn kõn de rosɨt kɔ; kɨta kõn de'n non, ndɨ tuj kɨ dɔt dɔt kɨta nyurkõg loa'n ndɨ goolɨna.

²³ Maj kad i telɨn kɨ kij kɨtaagbe kam ngarkamsɨt kɨ kam ndilsɨt,

²⁴ i lan kij de rosɨt, kij de'n Luwah ndaa ɓakumta ron kam nyaɗat kɨdenesew kɨ kam nyaɗat kɨjaɓat kɨgo lo rotat.

²⁵ Kɨtɔ 'nten kɨ i nyan ta keltakɨbal, kɨ dekɨɗen el rota madɓen, kɨta jĩ nganro na.

²⁶ Ĩla i ɓan wong a ne, ot ɗan majal, ot kadɨn kàd ud dɔ wongt losɨ.

²⁷ Ot kadɨn lo Sɨtan.

²⁸ De'n ndɨ ɓoog a ne, kɨ nya ta ɓoog ta, na kɨ ɔrr ta ron kɔ balang, ɗa kɨla kɨ jin, kad ngahn nya kɨ kad ɗan kɨ de'n ndɨ nal.

²⁹ Kɨ ta mad kɨ koot tee tasɨt al, na kɨ elɨn ta kɨmaj, kɨ ndaa tot kad ɗa kɨ ngankõg kɨ dõ kam kadkamt lod, kad maj urrɨn ngékoo dɔ.

³⁰ Ot kadɨn kamkil Ndil Kɨkunjɗang, Ndil Luwah'n ndahn kurro rosɨt tit nyakutdɔ be kad gerjɨn ne ndɔ badɔt.

³¹ Kɨ ɔrrɨn halg 'nten tube densɨt kɔ: Kamkat bang, kumkilkirɨr, wong, ndángro kɨ takɨmal, nat kɨ ndàng tube.

³² Kɨ adɨn kamsɨ ẽ kɨ na, adɨn ta õ kamsɨ kɨta na, i nyan go majal lo na tit'n Luwah nyan go majal losɨ kɔ kam Krist't ye ho.