Epesiag 3 - Maktub Ta Kumkajir

Luwah la kɨla la mber Hoita kɨmaj ku degt'n ĩn Juipg al ji Polt

¹ Kɨtɔ 'nten mĩ Pol, mĩ dedangãi lo Krist Jeju, m'ndɨ m'elta kɨ Luwah kɨtatɔsɨ, ĩgɨn ĩn Juipg al.

² M'oo tit oon hoi kɨla'n maj urrɨm ad Luwah la jimt kam ɗa majt lon kad m'ɗa kɨgo kɔjɗat lon kɨtɔsɨ.

³ Luwah tee dɔ adɨm ger kɔjɗa lon kɨ yaro. M'ndang tag dɔt kete ngonsĩ mad oon,

⁴ na lon i dan tag'n m'ndang nõ oon a ne, a asɨn koo nyager lom'n m'ger dɔ takɨmundt'n ɔj dɔ Krist.

⁵ Kam kohgt kɨ maɗi Luwah tee dɔ takɨmund'n non ad ngan deg madg gerɨn al, na tajigla tee dɔa ad ngombangkɨlag kɨjaɓat lon kɨ ngékelta kɨ tant kad gerɨn kɨtakul Ndilɨn.

⁶ Girr takɨmund'n non la ten: Kɨtakul Hoita kɨmaj la girrdeg'n ĩn Juipg al ĩn ne ngégana kɨ Juipg dɔ nyamajgt'n Luwah ngom kɨta deg lon, ĩn ngan rog kam dãrot kɨ kɨɗa'n non, ĩn ngégana dɔ kunkɔt kɨ kɨɗa'n Luwah un kam Jeju Krist't.

⁷ M'tel ngelamber Hoita kɨmaj'n non kɨtakul kadkari'n Luwah adɨm, kam ɗamajt lon kɨgo kɨlaɗa tɔgɨnt.

⁸ Mĩ kɨ du tɔi dekɨdug tube ku degt kɨjaɓat lo Luwah, na Luwah adɨm majkurr 'nten kad m'lamber Hoita kɨmaj dɔ nyamajgt kɨ dumbit lo Krist, kɨ ro degt'n ĩn Juipg al,

⁹ kɨ mad deg tube gerɨn titbãi Luwah kɨ Ngendah nyag tube a ɗan nya kɨmund'n ngom ront loyarot maɗi nu.

¹⁰ Titbe tajigla kɨtakul ngétɔg kõɓeg kɨ tɔgg kɨ kam dɔrãt dõ asɨn ne ger terr lo Luwah'n ndɨ ɔj kɨ tɨga kɨgo ɗob kɨ dang dang.

¹¹ Luwah ɗa titbe kɨgo kɔjtat lon kɨ tokɨnõt'n tɔl kona kɨtakul Jeju Krist kɨ Bɨraɓe loj.

¹² Kam Krist't kɨ ngah ɗob kaw nderbe ro Luwaht kɨ kam kɨmisɨmisɨ kɨtakul kada kamj.

¹³ Kɨtɔ 'nten m'kɔsɨ kɨ ot kadɨn rosɨ oi siw kɨta kamkɔlg'n hã m'ndɨ m'ngaa kɨtɔsɨ, kamkɔlg'n non ĩn nyakɔsɨgon kɨtɔsɨ.

Krist tarj

¹⁴ Kɨtɔ 'nten la m'ndɨ m'ɔsɨn gojɨm ber nõ Bɔwt,

¹⁵ ĩn girrkooj kɨɗen ndɨ ngah tɔ'n ko roat, kam dɔrãgt kɨ dɔning;

¹⁶ m'kɔa kad adsɨ tɔg kɨtakul Ndilɨn, kɨta kɔsɨgon loa kɨ ngãi tɔi, kad desɨ kɨ keme ngangɨn,

¹⁷ kɨ ad Krist ndɨ kɨ ngarkamsɨt kɨtakul kamsɨ'n adɨna; ngɨrasɨ kɨ bagirrsɨ tu ĩn kɨ ɗabijir kam tart, titbe a i ngahn tɔg,

¹⁸ kad asɨ gerɨn ne, nat kɨ girrdeg kɨjaɓat lo Luwah tube, ɗi i tat tar lo Luwah, kɨ ngala, kɨ ngala kɨ dõ, kɨ koakɨɓing,

¹⁹ na kɨ i gerɨn ne tar lo Krist'n tɔi nyager tube kɨtakad ĩn ne kɨ ɗoosɨ tap mbã kad i ɓankot kɨ nyamajg lo Luwah kɨtaagbe.

²⁰ Kɨ kɔsɨgon i kɨ dɔ Luwaht'n asɨ ɗa nya ngãi, kɨtɔi nyag tube'n ndɨ kɨ ndɨjea, tɔi tagahj sãi, kɨ tɔgɨn ndɨ ɗan kɨla kamjt.

²¹ Kɨ kɔsɨgon i kɨ dɔat kam ngékawnat kɨ kɨ kam Krist Jejut kɨ kohgt lo kohg mbãkɨnõt. Amin.