Epesiag 2 - Maktub Ta Kumkajir

Kaj kɨtakul kamkẽ lo Luwah

¹ Na ĩn, maɗi ĩn deg kɨ koi kɨta tɔidɔtag losɨ, kɨ majalg losɨ.

² Majalg'n non maɗi i ndian kamt kɨgo bang duniat ngen ɗan, i ndian girr tɔg ngart kɨ tɔg kõɓe kɨ dõ kam nélt, i Ndilɨn ndɨ ɗa kɨla tajigla kam degt kɨ ngétel rod gotat lo Luwah al.

³ Maɗi jĩ tube jĩ kudt ho, nyaɗaj i kɨgo nyurkõgt lo dãroj, kɨ ɗa nyag kɨgo ndigt lo dãro, kɨ kɨgo tagahjt, ad ji kij kɨ lo kooj'jt, jĩ ngang kɨ wong i dɔjt tit ndeg deg be.

⁴ Na Luwah i Ngekookumtondo kɨ dumbit, kɨtatɔ tar kɨ ngãin ndɨ tarj nõ la,

⁵ lon jĩ kɨ koi kɨta majalg loj ye, adj'n kumkajir kam Krist't. Kɨtakul kamkẽ lo Luwah la ajsɨn ne ye,

⁶ Luwah ad kɨ ɓai ku ngékoit nat kɨ Krist, na ad kɨ ndɨber kam dɔrãt dõ kam Jeju Krist't.

⁷ Luwah ɗa titbe kɨtakul kamkẽ lon kɨtaj kam Jeju Krist't, kad, kam kohg'tn ndɨ ɗen nõ, kɨ n'ɔjɨn ɗamaj lon kɨ ngãi tɔi takɔl'n ɗa sej kam Krist't.

⁸ Kɨtakul kamkẽ lo Luwah la ajsɨn ne kɨtakul kadkamsɨ Krist ye. Kaj'n non i kokɨrosɨt al, i kadkari lo Luwah.

⁹ I ngahn kaj kɨ lo kɨlaɗagt al, kɨta de kɨ asɨ gaburo dɔt goto.

¹⁰ Kɨtɔ Luwah la ɓaj ye; ndahj tɔ kɨtakul Krist Jeju, kɨtakad kɨ ɗa kɨlag kɨmajmaj, ad i kɨlag'n Luwah kɨ dɔn ɗago kete woi, kɨtakad kɨ hɔ ɗa.

Ngékadkamd Krist ĩn kɨɗabe kam Krist't

¹¹ Kɨtɔ 'nten adɨn kamsɨ gah dɔ tat 'nten: Maɗi ĩn deg kɨ ngéger Luwah al kɨgo dãrot, ĩn deg'n Juipg ndɨ kunsɨn ngéjagaj al, kɨta ndɨ kunɨn rod ngéjagaj'n i gaj kɨja kam dãrot kɨ ji de.

¹² I gaan kamsɨ dɔt kad kaglot'n non, ĩn kɨkanj Krist, i ngahn lo ndɨsɨ ku ngan ngéɓet kɨ Israel al, ĩn mbahg kam kunkɔgt'n Luwah un ndɨdɔt, ĩn kɨkanj nya ndahkamdɔt, kɨkanj Luwah kam duniat.

¹³ Tajigla, kam Jeju Krist't, ĩgɨn maɗi ĩn sãi ye, telsɨn nderbe kɨtakul mosɨ Krist.

¹⁴ I Krist la laj nooj nat, ad Juipg, kɨ ĩgɨn ĩn Juipg al telɨn girrde kɨ kɨɗabe. Lon ad dãron koi ye, Jeju tet ndogbɔrr kɔsɨnata kɨ ɗa mbɨnadt.

¹⁵ Krist ɔrr mberkɨnda kɨ ngan mberg kɨ dang dang lo Juipg kɔ kɨtakad Juipg kɨ Juipg al telɨn girrde kɨ kij ho, girrde kɨɗabe nat sen ho, i titbe la ladɨn nooj nat ye.

¹⁶ Kɨtakul koia dɔ kagdosɨt, Krist tujɨn kɔsɨnata'n to dandt; kɨtakul kagdosɨ la Krist ɓoon girrdeg kɨ joo'n non nat kam dãrot kɨ kɨɗabe, na lad nooj nat kɨ Luwah.

¹⁷ Krist ɗe lamber Hoita kɨmaj kɨta la nooj nat kɨ ro degt'n ĩn Juipg al, kɨta maɗi ĩn sãi kɨ Luwah, na lambera kɨ ro Juipgt'n maɗi ĩn nderbe kɨ Luwah ho.

¹⁸ Kɨtakul Krist la jĩn tube, Juipg ke Juipg al j'asɨ ndɔt'n kɨ ro Bɔwt kam Ndilt kɨ kɨɗabe ye.

¹⁹ Kɨtɔ 'nten ĩgɨn ĩn Juipg al ye, ĩn mbahg kɨ ngétɔi kɨ njadõ al ta, na ĩn girrdeg kɨjaɓat lo Luwah, ĩn ngan ngéɓeg.

²⁰ Ĩn kuj kɨ ndah dɔ bagirrat'n ngombangkɨlag kɨ ngékelta kɨ ta Luwaht ndahn, na Jeju Krist kɨɓe kɨ ron i kuɓɨr mbal kɨ dɔkum kujt.

²¹ Ĩla ad kuj kɨ ndah kɨtaagbe ndɨ ngang, na ada ndɨ ɓai kɨ dõ kɨ'n tel kuj ndub Luwah kɨjaɓat kam Bɨraɓet.

²² Kam ro kɨkɨɗat nat kɨ Bɨraɓe tɔ, ĩn kam kujt kɨ ndah ho, kad telsɨn tube nat kɨ kɨmadg kuj ndɨ Luwaht kɨtakul Ndilɨn.