Epesiag 1 - Maktub Ta Kumkajir

Pol da ron, na ɗa lapia

¹ Mĩ Pol, ngombangkɨla lo Jeju Krist kɨtakul ndig lo Luwah, m'ndang maktub 'nten mad deg kɨjaɓatg, kɨ deg kɨrog kam Jeju Krist't, ngendɨ ɓebot kɨ Epesɨ.

² Kɨ adsɨn majkurr kɨ ndɨ lom ko ro Bɔwjt, kɨ ko ro Bɨraɓet loj Jeju Krist.

Majkurrg'n Luwah adj kam Krist't

³ Ad kɨ j'ɔsɨn gon Luwah kɨ Bɔw Bɨraɓe loj Jeju Krist, Luwah la ad maj urrj, kɨmajkur kɨɗen kɨgo ndilt kam dɔrãt dõ kam Krist't.

⁴ Luwah kɔtj kam Krist't kete nõ lagɨr dɔningt nu, kad kɨ jĩ deg kɨjaɓat kɨkanj ta dɔjt nõat;

⁵ Luwah ndahj kete woi kam tart lon kad jĩ kumta nganɨn kɨtakul Jeju Krist, kɨgo kamkẽt kɨ ndig lon,

⁶ kɨta ndub, kɨ kɔsɨgon, kɨmajkur loa'n adj ɗan sej kari kɨ nõbe kam ngonɨnt kɨ Ngetar lon.

⁷ Kamat jĩ kɨ badɔ kɨtakul mosa, kɨ ngah nyàgo majalg loj, kɨgo majkurrt loa kɨtombuj.

⁸ Luwah ũ majkurr'n non puki kɨ dɔjt kɨtakul terrkam kɨ dang dang kɨ kumtɔg;

⁹ ad kɨ ger ndig lon kɨmund, kɔj ɗa kamnda loa'n ĩ kɨɓe nda kamɨnt kete,

¹⁰ kad'n ɗa dɔboi kaglogt; kad kaw nyag tube girr tɔgt lo Ngar kɨ kɨɗabe: Krist nya nyag kɨ kam dɔrãgt kɨ kɨ dɔningt.

¹¹ Kam Krist't j'aj, kɨta Luwah kɔtj kete kɨgo kɔjɗat lon, kɨta Luwah a ɗa nyag tube tit'n ɔj ɗan kɨ ndig lon, Luwah ndaj kete woi,

¹² kɨtakad kɨ ndubɨn, kɨ j'ɔsɨgonɨn, jĩgɨn kɨ nda kamj dɔ Krist't kete woi.

¹³ Kam Krist't tɔ la, oon dɔ ta kɨ rota, ad i Hoita kɨmaj'n ajsɨ ye, kamat ɓaitɔ la adɨn ne kamsɨ Krist, na Luwah nda kurro mad rosɨt; ad i Ndil Kɨkunjɗang. Ndilɨn Luwah un kɔ'n kɨ n'adj,

¹⁴ Ndil Kɨkunjɗang i nya hɔdɔ nyanduba'n Luwah un kɔ'n kɨ n'ad deg lon, na j'a kɨ ngah kaglot kɨ dɔboit'n Luwah a ban dɔj. Ad kɨ ndubɨn Luwah kɨta boa kɨ ngãi.

Pol elta kɨ Luwah kɨta ngékadkamd Krist

¹⁵ Kɨtɔ 'nten la mĩ kaa, lon m'oo hoi kadkamsɨ Bɨraɓe Jeju, kɨ hoi tar losɨ kɨta deg kɨjaɓat lo Luwah tube ye,

¹⁶ m'nyanta ɗa mersi Luwah kɨtatɔsɨ al, lon m'ndɨ m'kun tɔsɨ kam keltagt lom'n m'el kɨ Luwah.

¹⁷ Kad Luwah lo Bɨraɓe loj Jeju Krist, Bɔw kɨ ngekɔsɨgon adsɨ ndil terr kad tee dɔ gera ad i gerɨna jeje;

¹⁸ m'ndɨ m'kɔ Luwah kad ad kunja unj kumsɨ kɨ ngarkamsɨt, kad i gerɨn nya ndahkamdɔt'n kunsɨ kɨta, kad i gerɨn nyamajg lo kɔsɨgon loa, kɨ nyamajg lo nyanduba'n Luwah ad i gan na dɔt kɨ deg lon kɨjaɓat.

¹⁹ Kad i gerɨn tɔg loa kɨbo ngãi kɨtɔi'n ndɨ adj, kɨ ngang loa kɨ ngãin ndɨ ɗan sej jĩ ngékada kamj. Tɔg kɨbo ngãin non, i tɔgɨn Luwah ɔj.

²⁰ Lon Luwah ɗan kɨla kam Krist't, lon ada ɓain ku ngékoit, na ada ndɨ kojikõnt dɔrãt dõ,

²¹ Luwah ndaa dõ dɔ bɨradɔgt, kɨ tɔg kõɓegt, kɨ tɔgg kɨngang, Krist i dɔ nyagt tube kam kaglot kɨ ɓone hã kɨɗabe al, na kam kaglot'n a ɗe tɔ.

²² Luwah la nyag tube girr nja Krist't, ndaa ad i dõ dɔ nyagt tube, kad i dɔ Ngékawna.

²³ Ngékawna i dãro Krist, ro Krist kɨtaagbe i kamat, ɗoosɨ nyag tube, ɓa log tube kot kot.