Ejai 9 - Maktub Ta Kumkajir

¹ Deg kɨ ngéndia kam tilt ye, oon kunj mad kɨbobe; dɔ ngéndɨ dɔning ndilt, kunj unj.

² Ad deg ɗan ronel kɨbobe. Ɗan ronel nõit tit'n a ɗan ne ronel kaglo teet nyakot, tit'n deg a ɗan ne ronel, lon a kegɨn na nyatetɗɔɔ be.

³ Kɨtɔ jug ɔi dɔdt, kag i dɔ bɔgat, i tetd tit'n i tetɨn ɗɔɔ Madiãg be.

⁴ Sanja lo ngeɗɔɔ kɨɗen'n ad dɔning ye, kubji kɨɗen kɨ ndusɨ kam mosɨt, horr a õ mugɨj.

⁵ Kɨtɔ ooj ngon adj, adj ngon kɨdɨngã, Kõɓe a i dɔ bɔgat, a ndan tɔa: Kɨmaj ngãi, Ngekogota kɨmaj, Luwah Ngetɔg, Bɔw kɨ mbãkɨnõt, Ngar kɨ sɔl lom.

⁶ Kõɓe loa a aw kɨ ketekete, a ad lapia kɨ dɔboa goto, a ndɨ dɔ pong kõɓet lo Dabid, na kɨta kõɓe loa kɨ a nda a ada ɗa bijir, na ɔsɨ goa kɨ dõ dɔ rotat kɨ denesew, tajigla kɨ mbãkɨnõt. Tĩrokat lo Bɨraɓe Ngetɔg a tɔlkon nya 'nten.

Wong lo Bɨraɓe kɨdɔ Israelagt

⁷ Bɨraɓe la kɨ ta lon ro Jakobt, ad so dɔ Israelt.

⁸ Deg tube kɨ Epraim, kɨ ngéndɨ Samari a gerɨn ɓet. Elɨn ta kɨgo dɔngangt, kɨ burokɨga kamdt, anan:

⁹ Ndogbɔrrg tuson, j'a kɨ ɗa kɨ mbalg kɨ tɔsɨ; kag ɓɔlg in kɨ gang kɔ, j'a kɨ mbeld kɨ kag sedɨrg.

¹⁰ Na Bɨraɓe a sɔkɨ madngétasɨg kɨtakul Resin, a sɔkɨ ngéndoorsɨ kɨ dɔsɨt.

¹¹ Madngétag'n non in Siriag kɨ loɓakàdt, kɨ Pilistiag ko ndidt. Na kam nyagt'n non, wong lo Bɨraɓe a dɨba al, na jia ɗa kɨ dõ kɨta nda ɔjɨnd ɓaitɔ.

¹² Be kaa deg telɨn kɨ ro ngendadt al, sahn Bɨraɓe Ngetɔg tube al tɔ.

¹³ Titbe Bɨraɓe a gang dɔ Israel kɨ ɓonga kɔ, a gang dɔj tumbur kɨ kadnya kam ndɔt kɨ kɨɗabe.

¹⁴ Kɨbo kɨ de'n deg ɔsɨn gona la i dɔ, ngekelta kɨ ta Luwaht kɨ ngomɨn an: ndɨ nelta kɨ ta Luwaht kɨ ndood takɨbalt la i ɓonga.

¹⁵ Ngékɔrrta ɗob deg'n non ũnd mut, deg'n ɔrrɨnd ta ɗob tɔ nujɨn.

¹⁶ Kɨtɔ 'nten la Bɨraɓe a ɗa ronel dɔ basagt lod al. A oo kumtondo lo ngan halg kɨ ngéngawkoig lod al tɔ. Kɨtɔ in tube in ngéɗa nya kɨgo lo Luwaht al, kɨ ngéɗamajal. Takeld tube i kɨɓod na be kaa wong lo Bɨraɓe duba al, jia ɗa kɨ dõ ɓaitɔ.

¹⁷ Kɨtɔ kamkil õ tit horr be, õ kõng kɨ ngarg, na õ mũ kɨnder kɨ kùt. Sahorra su luilui kɨ dõ tit pilie be.

¹⁸ Horr õ dɔning 'nten kɨta wong kɨtɨngabil lo Bɨraɓe Ngetɔg tube. Na deg in tit nya sa lo horr be. De kɨ oo kumtondo lo ngonkõn goto.

¹⁹ A sahn kokõt, na ɓoo a ɗad ɓaitɔ; a sahn kogel, na a ndanɨn al. Dekɨɗen sa dã jin.

²⁰ Manaseag ndoorɨn Epraimag, Epraimag ndoorɨn Manaseag; in tujoo son kɔ Judat, be kaa wong lo Bɨraɓe duba al, jia ɗa kɨ dõ ɓaitɔ.