Ejai 8 - Maktub Ta Kumkajir

Ngon Ejai i nyakɔj

¹ Bɨraɓe elɨm an: Un bar kɨbo, i ndang tit dodo: I ɓai dõ Kanag ad kɨ tirɨn nyangahg lod.

² M'un ngémanajg kɨrota joo, ad i Uri ngejamosɨkadkari, kɨ Jakari ngon Berekia.

³ M'aw ro dekɨdẽ ngekelta kɨ ta Luwaht, na ndan ngon, ooj kɨdɨngã. Kamla Bɨraɓe elɨm an i nda tɔa: I ɓai dõ Kanag ad kɨ tirɨn nyangahg lod.

⁴ Kɨtɔ kete lon ngon'n non ger kun bɔwɨn kɨ kõn al ɓaitɔ ye, a kɨ ɗen nyamajg kɨ ɓebo Damasɨ, kɨ nyatetɗɔɔ kɨ ɓebo Samari awɨn ne nõ ngart kɨ Asiri.

Samariag taan lo

⁵ Bɨraɓe elɨm ta gog tɔ an:

⁶ Kɨtɔ deg'n mbetɨn man kɨ Siloe kɨ ãi jan jan be, na ɗan ronel dɔ Resint, kɨ ngon Remalia.

⁷ Kɨtɔ 'nten, Bɨraɓe a ad man bah kɨ aw kɨ tɔg kɨbobe ɗe dɔdt, i ngar kɨ Asiri kɨ tɔko kɨ tɔg loa tube, a ɓai kam ngɔnt kɨ dõ, na a tɔi dɔ kõngɨrg lon kɨ dõ.

⁸ A aw mbã kɨ dɔning Juda, a tɔi dɔ kõngɨg, a õ mbã hɔ kɔ de, a tee bɔgɨn, a ɗoosɨ tat dɔning loi, A, Emanuel.

⁹ I ndadɨn, in girrdeg kɨ dang dang, na ad rigɨjɨsɨn, i nelɨn mbisɨ. In girrdeg kɨ ngéndɨ logt kɨsãi, I dɔn ɓoosɨ kɨ nyakatg losɨ, na a rigɨjɨsɨn. I dɔn ɓoosɨ kɨ nyakatg losɨ, na a rigɨjɨsɨn.

¹⁰ Ɔjɨn na ta dɔ kɔjtaɗag, na ta a to kari. Elɨn ta kɨ kam ndig, na nya mad a ɗa nya al, kɨta Luwah i nat sej.

Maj kad deg ɓoolɨn Bɨraɓe

¹¹ Titbe la Bɨraɓe elɨm, ta lon jia hɔmɨn, na ug elɨm kad kɨ m'ndia go ɗobt lo deg'n non al an:

¹² Ot kun tɔ ta kɨla ɓer nyag tube'n deg ndɨ kunɨn ta kɨla ɓer. Ot ɓoolɨn nya'n deg ndɨ ɓoolɨna. Ot kad kɨngasa gai.

¹³ Na i Bɨraɓe Ngekoosɨg la i kɨkunjɗang. I ĩla a i ɓoolɨna ye, a i kɨkootɓool rosɨt tɔ.

¹⁴ A i kuj ndub Luwah; na i mbal gagigt kɨ mbãg kɨ ga de ad so, kɨta kuj kɨjoo lo Israel, a i band kɨ gum kɨta ngéndɨ Jerusalem.

¹⁵ Deg ngãibe a gan njad gigt, a son, na a tetɨn. A hɔnd kam band kam gumt,

¹⁶ I ɓir najkɨma 'nten, i ɔsɨ kɨ kaset ta kɨ tee dɔn non kam ngéndoogt lom.

¹⁷ M'a m'ngoo Bɨraɓe in yaro takumɨn ro ngékɨɓe lo Jakob, m'a m'nda kamm dɔat.

¹⁸ Mĩ kɨ ngang'n Bɨraɓe adɨmd, jĩ nyakɔjg kɨ ngeɗa deg nya kam Israelt, kokɨro Bɨraɓet kɨ Ngekɔg tube, Ngendɨ dɔ mbalbo Siõt.

¹⁹ Ĩla elsɨn anan: i ndɨjen ta deg kɨ ngekoo kɨdɔ ndil ngékoigt kɨ ngéndõte; ngekɔjta girr kɔdt, ngékelta mũmũ; Sumba kad deg ndɨjen ta luwahg lod ale? A sahn kɔj ro ngékoigt kɨta ngékumkajɨrg a?

²⁰ J'oo kam ta nyandoot kɨ najkɨma, ĩla elɨn ta titbe a ne, bijalo i kɨ tɔd al.

²¹ A awɨn dɔningt, kɨ jarobãi kɨ ɓo, lon ɓo a õ, wong a ɗe ad, de a ndɔl ngar lon kɨ Luwah lon, a turɨn kam kɨ dõ.

²² Kamla a oon lo kɨber dɔningt, na oon. Kamkɔl kɨ lo kɨ diw til, lo kɨ il kirir kɨ ad ɓool, lo kɨ diw kɨ a ɔsɨnd kɨ kamt.

Kooj ngar kɨ sɔl lom kɨ kõɓe loa

²³ Na i lo kɨ il kirir kɨta dɔning kɨ ndɨ kam ɓoolt al. Dasa Bɨraɓe a ut dɔ ɗamajal. Dɔning lo Jabulon kɨ dɔning lo Neptali, got gog ad kɔsɨgon dɔ lot kɨ kaw ta bahbot gid bah Jurdẽt kɨ gaj ɓe mad.