Ejai 7 - Maktub Ta Kumkajir

Bɨraɓe la Ejai ngekelta kɨ ta Luwaht ro ngar Akajt

¹ Kaglot lo Akaj ngon Jotam, ngon Ojias, ngar kɨ Juda, Resin ngar kɨ Siri, kɨ Pekah ngon Remalia ngar kɨ Israel aw ɗɔɔn kɨ Jerusalem, na asɨ teta al.

² Ɔrrɨn hoia ngékɨɓe lo Dabid anan: Siriag lan kɔd nat kɨ Epraimag. Kamla kam Akaj kɨ kam deg loa dad ta pa tit'n nel a yeen kagg kɨ kam kút be.

³ Bɨraɓe el Ejai an: Aw i ndɔd Akaj, ĩ kɨ ngoni Sear Yajub ko dɔboi ɗob mankaart kɨ dõ, ta ɗob kaw lo tugo nyat.

⁴ A ela an: Oo go roi maj, i ndɨ lom, ot ɓool. Ot kad kami gang man kɨta gind ta kir horr kɨ su sa kɨjoo nõ, ad i wong kɨtɨngabil lo Resin kɨ Siri, kɨ ngon Remalia.

⁵ Kɨtɔ Siri kɨ Epraim kɨ ngon Remalia ɔjɨn na ta kad kɨ n'ɗan sei majal anan:

⁶ J'aw, kɨ nda Juda, kɨ ndaa ɓoolt, a tetɨna ɗɔɔ, na kɨ nda ngon Tabeel ngart.

⁷ Titbe kel Bɨraɓe Luwah: Ta'n non a to kari, a ɗa nya al tɔ.

⁸ Kɨtɔ ɓebo lo Siriag tɔa i Damasɨ, na Resin i ngar kɨdɔ ɓebo Damasɨt. Nãi ɓal dɔkɨbojidet gidaimi a ne, a tetɨn ɗɔɔ Epraimag kad in girrdeg gog al ta.

⁹ Na ɓebo lo Epraimag tɔa i Samari. Ngar kɨ ɓebo Samarit i ngon Remalia. Ĩla i ɗan bijir dɔ kadkamt losɨ al a ne, a i ndɨn londɨsɨt al ho.

Hoita lo Emanuel

¹⁰ Bɨraɓe tel el Akaj gog tɔ an:

¹¹ I ndɨje nyakɔj mad Bɨraɓe Luwah loi, i ndɨja ke kam nya kɨwo kɨɓing, ke tasom logt kɨ dõ.

¹² Akaj tur an: M'a m'ndɨje al, m'ndig nã Bɨraɓe al tɔ.

¹³ Kamla Ejai el an: Oon dɔ, in ngékɨɓe lo Dabid. I nya kɨ tẽbe rosɨt kad i ndan deg kɔrt, i ndɨ ndan Luwah lom kɔrt tɔ a?

¹⁴ Kɨtɔ 'nten Bɨraɓe kɨdɔn a adsɨ nyakɔj oon. Ngomand a ndan ngon, a ooj ngon kɨdɨngã, na i ndah tɔa Emanuel.

¹⁵ Mba mang kɨ yib tej, a in nyasaa, mbã a ger mbet majal, na kɔt maj.

¹⁶ Kete lon ngon ger mbet majal, na kɔt maj al ɓaitɔ ye, dɔning lo ngarg kɨjoo'n ndɨ i ɓoold, a tel gootɓe.

¹⁷ Bɨraɓe a ad ndɔg kɨmajal ɗen dɔit, kɨ dɔ degt loi, kɨ dɔ ngékɨɓet lo bɔwi. Maɗi nu lon Epraimag gangɨn na kɨ Judag, ngar kɨ Asiri.

¹⁸ Ndɔt'n non Bɨraɓe a kɔrr ngol ad kongg ɓain lo lagɨr bahbog kɨ Ejipt, kɨ tejg kɨ dɔning Asiri.

¹⁹ A ɗen tube kad hɔn londɨ kam hol mbalgt kɨ to kari, kɨ kam mbalgt kɨ riya, kɨ dɔ kongt tube, kɨ kam lokulnyagt tube tɔ.

²⁰ Ndɔt'n non Bɨraɓe a ngisa kɨ yinga kɨ ndɨma ko gid baht, kɨ ngar kɨ Asiri, kad ngise bisɨ dɔa kɨ bĩ nja; a ngɨse mbaita kɔ tɔ.

²¹ Ndɔt'n non dekɨɗen a ul kõ mang kɨɗa kɨ kõ batg joo,

²² Na kɨta mba kɨ a i ngãi, deg a ãin yiba. Kɨtɔ ndeg deg tube'n nãin dɔningt'n nõn a ãin yib mang ho, a ningɨn tej ho.

²³ Nya'n a ɗa nya ndɔt'n non la ten, lo kɨɗen kɨ dĩndu kɨ asɨ dub i tit maɗi kɨ gata i nar dub a ne, a tel lo ɓa kõng kɨ ngarg.

²⁴ A awɨnt kɨ kɨrãg kɨ gã kɨta dɔning tube a i kõng kɨ ngarg koon.

²⁵ Na mbalg tube'n maɗi ndɔɔn kɨ kɔsɨ, a teen tit al, kɨta ɓoolɨn kõng kɨ ngarg. A i lo kul mangg, batg tɔ a ndiant.