Ejai 66 - Maktub Ta Kumkajir

Takɨgang lo Bɨraɓe kɨ majkurr loa kɨ a ɗe dɔ Jerusalemt

¹ Titbe kel Bɨraɓe: Dɔrã i pong kõɓe lom, dɔning i komber nda njam, kuj kɨ ɗi a i ɗan admɨn, ke lokɨɗah a i lo taam kò a?

² Nyag'n non tube jim ɗad, in lom, nyag'n non tube, kel Bɨraɓe. Oon, m'a m'ur kumm kɨ dɔat, de kɨ ngendo kɨ ndɨnga ndo kam ndilɨnt, na roa ndad kɨta ɓool ta lom.

³ De'n tɔl bɔw mang, a tɔl de, de'n la bat kadkari kɨjakɔ a ne, i tit ngetɔl bisɨ, de la kadkari, na i mosɨ boor, de la horr nduj mbikam, na i kɨta ɗan yo. Deg'n non kɔtɨn ɗob lod kɨ kɔsɨ dɔd, na ngahn ronel kam kɨlaɗadt kɨyerr.

⁴ Mĩ tɔ m'a mad kamkɔl kɨ dang dang so dɔdt, na m'a mad nyag kɨkootɓool teen dɔdt, kɨta m'kund, na de mad kɨ tur goto, m'elta, na oon dɔ al, ɗan nya kɨmajal takum'mt, kɔtɨn nya kɨ nelɨm al.

⁵ Oon dɔ ta lo Bɨraɓe, in kɨ rosɨ kɨ ndad kɨta ɓool kɨ i ɓoolɨn ta loa: Ngankõsɨ ngékɔsɨ ta lasɨn kɔ kɨta tɔm anan: kɨ Bɨraɓe ɔj'j kunjɨn kɨɗangeɗeng kamla j'a j'oo ronel losɨ. Na deg'n non a in kɨ rosɔl.

⁶ Kah kɨse kɨ ɓai kam ɓebot, ndi ta mad tee ko kam kuj ndub Luwaht. I ndi Bɨraɓe la ndɨ baji madngétantg ye.

⁷ Kete nõ to koojt, ooj. Kete lon tokooj ɗaa al ɓaitɔ, ooj ngon kɨdɨngã.

⁸ Nõ oo dɔ ta kɨ titbe a? Nõ oo nyag kɨ titbe a? A oojɨn dɔning mad ndɔt kɨkɨɗa a? A oojɨn girrdeg kooj kɨ nja kɨɗa a? Kɨtɔ ɓebo Siõ tõ kooj, tentenbe ooj ngang.

⁹ M'a mad kaglo kooj loa ɗe, na m'a m'ada ooj al a? Kel Bɨraɓe. Mĩ'n m'ada ooj ye, m'a m'ɔga kooj a? Kel Luwah loi.

¹⁰ I ɗan ronel nat kɨ Jerusalem, na i ɗan kamnda kɨtaa, in tube kɨ i tarɨna. I ɗan ronel kɨ kamnda nat sia, ĩn tube kɨ i hɔn ndɔa,

¹¹ kɨtakad ilɨn mbaa i ndanɨn kɨ mba sɔlkam loa, kɨtakad ãin ngãi. Na i ɗan ronel dɔ sɔlkamt loa kɨ ɗoosɨ lo tap.

¹² Kɨtɔ titbe kel Bɨraɓe: Oon, m'a mad lapia aw dɔat tit man bah be, na nyamajg lo girrdeg kɨ dang dang tɔ tit man bah kɨ õ tɔi dɔ kongɨr be. A ilɨn mbaa, a usɨsɨ kadɨnt, na a lasɨ dɔ bɨngɨnt.

¹³ Tit de kɨ kõa a sɔl kama, titbe tɔ la m'a m'sɔlɨn kamsɨ ye, na a sɔl kamsɨ Jerusalemt.

¹⁴ A oon, a in kɨ ronel kamsɨt, kɨngasɨ a i tit mũ kɨmbool be, na tɔg ji Bɨraɓe a ad i gerɨna kɨtakul ɓerg lon, wong a ɗaa dɔ madngétaat.

¹⁵ Kɨtɔ oon. Bɨraɓe a ɗe kam horrt, pusɨɗɔɔg loa tɔ titɨn kɨ nélbarwãi, wong loa tɨngabil, na nyandàng loa i nat kɨ ndõhorr.

¹⁶ Bɨraɓe a gangta kɨtakul horr, kɨtakul kiyaɗɔɔ lon la a gangɨn ta dɔ degt tube ye, kɨtɔlg lo Bɨraɓe a ĩn ngãibe tɔ.

¹⁷ Ĩgɨn ndɨ telɨn rod kɨjaɓat't, ndɨ arɨn rod, awɨn go ɓakumta yo mad kam ndɔɔgt, kad san dã boor, kɨ nyag kɨyerr, kɨ yegg. A nujɨn kɔ ta kɨɗabe, kel Bɨraɓe.

¹⁸ M'ger kɨlaɗad kɨ tagahd. Kaglo ndɨ ɗe kɨta kaw girrdeg tube kɨ taɓeg kɨ dang dang kɨnat, a ɗe oon kunjɨm kɨɗangeɗeng.

¹⁹ M'a m'nda nyakɔj mad kudt. Na m'a m'la ndegd kɨ ajɨn kɨ ro girrdegt kɨ dang dang, ad i Tarsis, kɨ Pul, kɨ Lud, ngékur kɨrã dɔ gãt, kɨ Tubal kɨ Jaban, kɨ doorg kɨsãisãi, ĩgɨn oon kah tɔm kɨ ko al, ke oon kunjɨm kɨɗangeɗeng nja kɨɗa al. A lan mber tɔm kɨ ku girrdegt kɨ dang dang.

²⁰ A ɗen kɨ ngankõsɨ ku girrdegt kɨ dang dang tube, kadkarit kɨ la kad Bɨraɓe. A ɗen dɔ sɨndagt, kɨ pusɨg, kɨ tipoig, kɨ dɔ korrogt kɨ dɔ lukumgt mbã kɨ dɔ mbalbot lom kɨjaɓat kɨ Jerusalem kel Bɨraɓe, tit'n Israelag a ɗen ne kɨ kadkari nduj kam jot kɨkar nyang kuju lo Bɨraɓe ye be.

²¹ Mĩ tɔ m'a m'ɔrr kɨmadg dandt kad in ngéjamosɨ kadkarig, kɨ Lebiag, kel Bɨraɓe.

²² Kɨtɔ tit in dɔrã kɨkij kɨ dɔning kɨkij kɨ m'a m'ɗa a ton kɨnomt godt, kel Bɨraɓe, titbe tɔ kohsɨ kɨ tɔsɨ a ton mbãkɨnõt.

²³ Kij nah kɨ kij nah mad, ndɔ taakò kɨ ndɔ taakò mad, deg tube a ɗe ɔsɨn dɔd ber nomt, kel Bɨraɓe.

²⁴ Lon a teen kɨtɨga, a oon nin deg kɨ taamɨn ɗɔɔ, kɨded a oin al, horr lod a oi al tɔ. Deg tube a unɨn kumd kɔ dɔdt kɨta in kɨyerr.