Ejai 65 - Maktub Ta Kumkajir

Takɨgang dɔ ngétaɗɔɔt

¹ Mĩ kɨ sah ro degt kɨ ndɨjemɨn al, na ngé kɨ sahmɨn al, m'nya mad ngahmɨn. M'el m'an: Aa Mĩ ne, mĩ ne. Ro girrdegt'n ko kunɨn ne tɔm al.

² M'la jim kɨndɔgbe, kɨ ro degt kɨ ngétaɗɔɔ, kɨ ro ngéndia go ɗobt kɨmajal kɨgo kamndigt lod.

³ Deg'n non sɔkɨmɨn kɨndɔgbe takum'mt, jan mosɨ kadkarig kam ndɔɔgt, lan horr nduj mbikam dɔ dɨngɨr brikt.

⁴ Hɔn londɨ dɔɓadgt, ɓin bulombalgt, san dã boor, na tã kɨyerr i kam jogt lod.

⁵ Anan: I ɗa kɨgog nõ. Ot ɗe nderbe romt kɨta m'a m'teli kɨjaɓat. Nyag'n non in tit sahorr kam kõnɨmt, in tit horr kɨ ndɨ õ kɨndɔgndɔg.

⁶ Oon, ta 'nten i kɨndang nomt. M'a m'ndɨ tam mbo al, mbã kad m'nda ngɨra, kamtã, m'a m'nda ngɨra dɔdt,

⁷ kɨta ɗagootalg losɨ kɨ ɗagootalg lo bɔwsɨg tu, kel Bɨraɓe, ĩgɨn lan horr nduj mbikam dɔ mbalbogt na elɨn takɨmal dɔmt dɔ doorlogt. M'a m'mbɔj nyabaji kɨ asɨ ta kɨlaɗadg kɨmaɗi.

⁸ Titbe kel Bɨraɓe: Lon man nduu kɨkij i bɨranduut, a elɨn anan: Ot tuja, kɨta majkurr i kamt. Titbe la m'a m'ɗan kɨta ɓerg lom, kad m'nujd tube al.

⁹ M'a mad ngaka teen ko girr Jakobt, ngékõnduba mbalbog lom tɔ ko girr Judat. Kɨmbedg lom a taan dɔning nyakagɓet, ɓerg lom a ndɨnt.

¹⁰ Dɨlalo kɨ Sarõ a i losanya lo ɓut batg, na hollo kɨ Akɔr a i loto ɓut mangg, kɨta deg lom ĩgɨn sahn gom.

¹¹ Na in kɨ i nyan Bɨraɓe kɔ, in kɨ kamsɨ oi dɔ mbalbot lon kɨjaɓat, ngéɗago tabɨl sanya kɨta yo nõkar ngeɗoosɨ kop kɨ kasɨnduu kɨ burɨna adɨn yo ndõ te.

¹² Mi m'a m'ndasɨ kɨta kiyaɗɔɔ. A ɔsɨn gojsɨ ningt tube kad jan kɔsɨ kɨta m'kunsɨ, na i turɨn al, m'elta, na oon dɔ al. I ɗan nya kɨmajal takum'mt, i kɔtɨn nya kɨ nelɨm al.

¹³ Kɨtɔ 'nten titbe kel Bɨraɓe Luwah: Oon ɓerg lom a san nya, na in a i ndɨn kɨɓo. Oon ɓerg lom a ãin man, na kɨnda a õsɨ. Oon ɓerg lom a ɗan ronel, na in a in kɨ rosɔl.

¹⁴ Oon, ɓerg lom a ɔsɨn pa kɨta ronel kɨ kamdt, na in, a i nõn kɨta kamkil, a i tõ ɗusɨɗusɨ kɨta kamsɨ kɨtuj.

¹⁵ A i nyan tɔsɨ kad i nya kɨndɔl kɨ ro kɨmbedgt lom, kɨta Bɨraɓe Luwah a tɔlsɨ, na a ndah tɔ ɓerg lon kɨ tɔ mad kɨɗang.

¹⁶ De kɨ ndɨg kad maj urrɨn dɔningt 'nten a ne, a ndɨg majkurr kokɨro Luwaht ngerota, na de'n a nda yo dɔningt 'nten a ne, a nda yo kɨta Luwah ngerota, kɨta kamd a oi dɔ daiyogt kɨmaɗi, a in kɨyarɔ takum'mt tɔ.

Dɔrã kɨkij kɨ dɔning kɨkij

¹⁷ Kɨtɔ oon m'a m'nda dɔrã kɨkij kɨ dɔning kɨkij, a gan dɔ nyagt kɨ tɔi maɗi gog al ta, na a in kam tagahsɨt gog al tɔ.

¹⁸ Na i ronel kɨ kamnda kɨ mbãkɨnõt dɔ nyat kɨ m'a m'ndaa. Kɨta oon m'a m'nda Jerusalem kad i nyakamnda, deg loa tɔ kad in nyaronel.

¹⁹ M'a m'ɗa kamnda kɨta Jerusalem, na m'a m'ɗa ronel dɔ degt lom. A oon dɔ kah ndi nõ, ke ko kɨta kamkɔl gog al ta.

²⁰ Lot'n non ngon kɨkasɨ ke de kɨ tɔg bɨga kɨkad tɔlkon ndɔ'n al goto, kɨta ngon a oi kɨ ɓal kɨ asɨ ɓu na ngeɗamajal kɨ ɗa ɓal ɓu a ne, a i kɨ ndɔl.

²¹ A ɗan kujg, a ndɨnt, a hɔn nduu kam ndɔɔgt, a san kanda.

²² A ɗan kuj kad de kɨɗang ndɨt al, a hɔn nya kad de kɨɗang sa kanda al tɔ. Kɨta ndɔg lo deg lom a in tit ndɔg lo kag, na kɨmbedg lom a ɗan ronel dɔ kɨlaɗa jid ndɔg ngãibe.

²³ A ɗan kɨla kari kɨndang al, a oojɨn ngang kɨtakad tuj a tee dɔdt al, kɨta a in girrdeg kɨ ngémajkurr lo Bɨraɓe na ngandg a ĩn nat sed.

²⁴ Kete lon kon al ɓaitɔ, m'a m'turd, lon ndɨ elɨn ta ɓaitɔ a ne, m'a m'oo dɔ.

²⁵ Bisɨkolo kɨ ngon bat a san nya nat, tubo a sa mũ tit bɔw mang be, li a sa buning. A ɗan nya kɨ to, ke a tujɨn nya al dɔ mbalbot lom kɨjaɓat kɨtaagbe. Kel Bɨraɓe.