Ejai 64 - Maktub Ta Kumkajir

¹ Tit horr kɨ õ kir kɨtut, tit horr kɨ ad man leg. Kad madngétaig gerɨn tɔi, na girrdeg kɨ dang dang a ndadɨn nõit.

² Ĩla i ɗa nyag kɨkootɓool in kɨ nda kamj dɔt al a ne, i ɗisɨ, na mbalbog a yeen nõit.

³ De oo dɔ al, mbi oo al tɔ, kum de kɨ oo luwah mad kɨɗang goto, na ĩ Ngeɗa nyag kɨta in ngéɓakuli.

⁴ De kɨ ngeɗa ronel dɔ ɗa denesewt kɨ ngenda dɔ ɗobgt loi kɨ ngega kamɨn dɔit, i hɔ de'n non kɨroit. Oo, wong ɗai kɨta kɨ tɔ ɗob, i kam ɗobgt kɨ maɗi nõ, la j'a kɨ j'aj ye,

⁵ Jĩ tube jĩ tit deg kɨyerr, ɗa denesew loj i tit kub kɨ yɨro pikɨrpikɨr. Jĩ tube kɨ ndulo mbaw tit mbikam be, ɗagootalg loj ɔij aw sej kɔ tit nél be.

⁶ De kɨɗa kɨ ko kunɨn tɔi goto, de kɨ ndɔl dɔ ɓit kad in hɔi goto, kɨta i ɓɔ takumi rojt na i laj kɔ kam ɗagootalgt loj, na i nyàj kɨ kamt kad kɨ tuj.

⁷ Titbe kaa ne, Bɨraɓe, ĩ bɔwj. Jĩ tit hanj, ĩla i ngeɓahj, jĩ tube jii kɨlaɗa jii.

⁸ Ot kad wong ɗai kɨ tɔi dɔ, Bɨraɓe. Ot gah dɔ ɗagootalt loj kɨ mbãkɨnõt. Oo. I gah dɔt, jĩ deg loi.

⁹ Ɓebog loi kɨjaɓat telɨn dɨlalo, Siõ tel dɨlalo, Jerusalem tel gootɓe.

¹⁰ Kuj loj kɨjaɓat kɨmaj ngãi, lo kɨ bɔwjg ndubɨnt, horr õa, na nyag loj tube kɨ neljɨn nujɨn kɔ.

¹¹ Bɨraɓe, a i ɔr roi kam nyagt 'nten a? A i ndɨ tai mbo, ad kamkil ɗaj kɨ tɔi dɔ a?