Ejai 63 - Maktub Ta Kumkajir

Ndɔ ndangɨra lo Bɨraɓe

¹ De'n ɗan i nõ ɓai dɔning Edom, ndɨ ɓai ko ɓebo Bosrat kɨ kubg lon kɨkɨre pirɨr a? Ɔj ron kam kubg kɨmajmaj, ngendia kɨ tɔgɨn ngãi i nõ a? I mĩ, ngekel kan, denesew a tetɗɔɔ, mĩ ngetɔg kaj.

² Kɨtɔɗi kubg loi ĩn kɨkɨre pirɨr, na kubg loi ĩn tit kub lo ngéɓa kand nduu be a?

³ Mĩ kɨ kɨɗambe la m'ɓa kand nduu, ku girrdegt kɨ dang dang, de kɨɗa kɨ i sem goto. Ad m'ɓad girr njamt kɨ wong lom, m'ɓa dɔd mbujmbuj kam wongt lom kɨtɔlsɔkɨr, na mand tal dɔ kubt lom, ad kub lom tube tel kɨyerr.

⁴ Kɨtɔ m'nda kammt kad i ndɔ ndangɨra, na ɓal badɔ deg lom ɗe woi.

⁵ M'nɔl lo, na de kɨ ngeɗasem goto yam biw kɨta de mad kɨ ngedĩm goto. Na tɔgjɨm mĩ kɨɓe la m'tet'n ɗɔɔ ye, na wong lom kɨtɔlsɔkɨr adɨm tɔg tɔ.

⁶ M'ɓa dɔ girrdeg kɨ dang dang mbujmbuj kam wongt lom, na wong lom kɨtɔlsɔkɨr ɗad kasɨt, m'ũ mosɨd ningt.

Ɗamaj lo Bɨraɓe kɨ ro Israelagt

⁷ M'a m'ɔrr hoi nyaɗa Bɨraɓe kɨ lo kamkẽt, kɨ kɨlaɗa Bɨraɓe kɨ asɨ kad deg ndubɨna ne, kɨgo nyagt tube kɨ Bɨraɓe ɗa adj, kɨ ɗamaj lon kɨbobe kɨ ro ngékɨɓet lo Israel, in ɗa kɨgo kõkamt lon, kɨ kamkẽ lon kɨngãi.

⁸ El an: Rota deg'n non in lom, in ngang kɨ a ɗan nya kɨ lo ndokumt al, na Bɨraɓe i ngekajd.

⁹ Kam dayogt lod tube, i de ke ngekɨla mad, na ĩ kɨ dɔn ajd, kam tart loa kɨ kookumtondo loa, ĩ kɨɓe ajd, und kɨ dõ, tod kam ndɔgt kɨmaɗi

¹⁰ Titbe kaa ne, adɨn kamkil Ndila kɨkunjɗang, in kɨɓe tɔ tel madngétad, ɗɔɔ sed.

¹¹ Kamla deg loa gan kamd dɔ ndɔgt kɨmaɗi lo Moij. Nge tee sed kam bahbot kɨtɨga nat kɨ ngéngom ɓut deg loa ye, i ɗah a? In nda Ndilɨn kɨkunjɗang kamat i ɗah a?

¹² In ndia dɔ jikõ Moijt, ɔrr deg ta ɗob kɨ tɔg jin kɨngãi, in gang man dene nõdt kad tɔa kon kɨ mbãkɨnõt,

¹³ in gang sed ɓul bah tit sɨnda kam dɨlalot, kɨkanj kad gan njad gigt.

¹⁴ Ndil Bɨraɓe ad'd taan kò, tit nyakulg kɨ ɗisɨn kɨ hollot. Titbe la ɔrrɨn nõ deg loi kad i ngahn tɔko.

Kɔ kɨta kookumtondo kɨ ɗa sed

¹⁵ In i ndɨ dõ, i nɔl lo kɨber. I ndɨ londɨt kɨkunjɗang kɨmaj tɔitɔi, oo lo. Tĩrokat loi kɨ tɔg loi, kõkam kɨ kookumtondo loi, in ɗah a?

¹⁶ Kɨtɔ bɔwjg, i ĩ Abraham gerj al, na Israel gerj al kaa ne, ĩ Bɨraɓe, ĩ Bɔwj. Tɔi i Ngebadɔj kohgt kɨmaɗi mbã ɓone.

¹⁷ Bɨraɓe, kɨtɔɗi i nyàj ad kɨ ndom ɗobg loi, na ad kamj kongkong, kad kɨ ɓoolɨn al a? I tel kɨrojt kɨta ɓerg loi, kɨ girrdeg nyakagɓe loi.

¹⁸ Girrdeg loi kɨjaɓat ndɨn lot loi kɨjaɓat kaglo tẽbe, na madngétaj ɓan dɔa kɨ njad.

¹⁹ Jĩ kɨ tel tit deg kɨ õɓe dɔdt maɗi al, ĩgɨn kunɨn tɔi dɔdt al tɔ. Aa. Ni i til dɔrã, na i ɗisɨ a ne, mbalbog a yeen nõit.