Ejai 62 - Maktub Ta Kumkajir

¹ Kɨtatɔ Siõ m'a m'ndɨ tam mbo al, m'a m'taakò al kɨtatɔ Jerusalem, mbã kad kɔrrtadɔt'n Luwah a ɔrr ta dɔit i tit nyẽr kunj be, kaj kɨ m'a maja tɔ tit horr ngel kɨ õ.

² Girrdeg kɨ dang dang a oon denesew loi, ngarg tube a oon tɔko loi tɔ. A ndan tɔ kɨkij dɔit, ad i tɔ kɨ Bɨraɓe a nda.

³ A ĩ kadmul kɨmaj ngãi ji Bɨraɓet, a ĩ jɔg ngar ji Luwaht loi.

⁴ A kunɨn dekɨdẽ kɨ nya kɔ gog al ta, a kunɨn tɔ dɔning loi Gotɓe gog al tɔ, na a kunɨn Ronel lom i kamit, a kunɨn dɔning loi Ngengaw, kɨta Bɨraɓe ngah ronel kamit, na dɔning loi a ta ngaw.

⁵ Tit'n kɨ basa taan na kɨ ngomand kɨ ger ngaw al ye, titbe tɔ ngani a tain dekɨdẽt. Tit'n ngeɗa lo taa dekɨdẽ kij ɗan ronel kɨta nẽn kɨkij ye, titbe tɔ Luwah loi a ɗan ronel dɔit ho.

⁶ M'nda ngéngomlog dɔ ndogbɔrrgt loi, ĩ Jerusalem. A ndɨn tad mbo kada ke ndɔ al. Ĩn ngékad kam Bɨraɓe gah dɔt ye, ot taan kò.

⁷ Ot nyan kad Bɨraɓe taakò mbã kad nda Jerusalem bijir gog, ad tel nya kɔsɨgon dɔningt.

⁸ Bɨraɓe nda yo kɨ jikõn kɨ tɔg jin, an: m'a mad nyako loi kad i nyasa lo madngétaig gog al, na mbahg a ãin kasɨnduu loi gog al tɔ, kɨta ɔrr ngãi kɨtɔi.

⁹ Na ngembõ nyako kɨnat a san, na a ndubɨn Bɨraɓe. Ngékaw kand nduu kɨnat a ãin kam natlog lom kɨjaɓat tɔ.

¹⁰ I teen, i teen tabitg kɨtɨga. I ɗan go ɗob kɨta deg. I ɓan, i ɓan ɗob. I ɗad kɨ wong. Unɨn kub drapo dõ nõ degt.

¹¹ Oon Bɨraɓe la mber ta 'nten mbã kɨ dɔngoi dɔning: Elɨn ɓebo Siõ, anan: Oo kaj loi ndɨ ɗe nõ, oo nyabaji i jiat, na nyagakɨra i nõat.

¹² A kunɨnd girrdeg kɨjaɓat, kɨbadɔg lo Bɨraɓe. Na a kunɨn ɓebo kɨ deg ndɨg sahna. Ɓebo kɨ deg nyan kɔ al.