Ejai 61 - Maktub Ta Kumkajir

Hoita kɨmaj dɔ kaj Jerusalemt

¹ Ndil Bɨraɓe Luwah i dɔmt kɨta Bɨraɓe wurɨm, kɨ m'la mber hoita kɨmaj ngéndog; lam kɨ m'yoot ngékamkɔl, kɨ m'la mber taa nya dõ lo deg'n hɔnd, kɨ m'la mber kɔrr de dangaig,

² kɨ m'la mber ɓal kamkẽ lo Bɨraɓe, kɨ ndɔ ndangɨra lo Luwah loj, kad sɔl kam ngéhɔndo tube;

³ kɨta kad ngéhɔndo kam ɓebot kɨ Siõ nyapare dɔ gan goot buhoor, kɨ yib ronel ga goot ndo kɨ hɔ, kɨ kub ndub ga goot ro kɨ koi yelel, kɨtakad a kunɨnd kag dilg kɨdenesew, in Bɨraɓe hɔd kad ngahn tɔko.

⁴ A ɗan gootɓeg kɨ tuj maɗi gog, a ɗan gootɓeg kɨ tet maɗi dõ gog, a tel ɗan gootɓebog kɨ kij gog, ad i ɓebog kɨ tujɨnd kohgt kɨ kohg.

⁵ Mbahg a ɗan lot'n non, a ngomɨn ɓut nyakulg losɨ. Ngan mbahg a in ngéndɔɔg losɨ, kɨ ngékoogo dĩndug losɨ.

⁶ Na in, a kunsɨn ngéjamosɨkadkarig lo Bɨraɓe, a ndan tɔsɨ ngékɨlaɓerg lo Luwah loj. A i san nyamajg lo girrdeg kɨ dang dang, a i gan buro dɔ nyagaburot lod.

⁷ A i ngahn gajnya dɔnat joo got rosɔlt losɨ, a i ngahn ronel dɔ gajnyat losɨ got tɔsɨt kɨtuj. Kɨtɔ 'nten la a ngahn ne gajnya losɨ dɔnat joo kam dɔningt losɨ, na ronel losɨ a tokɨnõt.

⁸ Kɨtɔ mĩ Bɨraɓe, m'ndig nyaɗa kɨgoɗobat, m'mbet ɓoog kɨ nyaɗa kɨgoot al. M'a m'ad'd nyabajid kɨgo nyaɗamt kɨro, m'a m'un kɔm sed kɨ kunkɔ kɨ tokɨnõt.

⁹ A gerɨn kohd ku girrdegt kɨ dang dang, kɨ ngekad ku degt tɔ. Tubeg'n a ond a gerɨnd, in girrdeg kɨ Bɨraɓe njang dɔd.

¹⁰ M'a m'ɗa ronel ãã, m'a m'ɗa ronel, kɨta Bɨraɓe, ndilɨm ɗa ronel kɨta Luwah, kɨta ut dɔm kɨ kub nyaɗa kɨdenesew Pare rom kɨ kub ɗa denesew, tit dekɨdẽ kɨ a pare ron kɨ medkɔsɨg kɨta ta ngaw kij be.

¹¹ Tit'n dɔning a ad kumnya ɓan, na tit'n ndɔɔ a ad kumnya kɨ dub kamt ɓa ye, titbe tɔ Bɨraɓe Luwah a ad denesew kɨ ndub ɓa kɨ kɔsɨgon takum girrdegt kɨ dang dang tube.