Ejai 60 - Maktub Ta Kumkajir

Tɔko kɨ a ɗe dɔ Jerusalemt

¹ I ɓai dõ, unj kɨta kunj loi ɗe. Kunj Bɨraɓe kɨɗangeɗeng unj dɔit.

² Oo til a ut dɔning, til diw kirir, a ut dɔ girrdeg kɨ dang dang, na Bɨraɓe a ɓai dɔit dõ. A oon kunja kɨɗangeɗeng dɔit.

³ Girrdeg kɨ dang dang a ɗen kam kunjit, na ngarg a ɗen kam nyẽr kunjit.

⁴ Un kumi kɨ dõ i nɔlɨn lo gug dɔi. A kawɨn na tube ɗen roit. Ngani kɨdɨngãg a ɗen ko sãi, a ton ngani kɨdẽ jidt ɗen sed.

⁵ Kamla a oo, na a i unj ɗang, ronel a tɔsɨ kami mbukɨmbukɨ, kɨta nyag kɨ ton mbuj kɨ tond dɔ bahbot a telɨn loi, nyamajg lo girrdeg kɨ dang dang a ɗen roit tɔ.

⁶ Lukum koosɨg a utɨn dɔning loi kɨ lukumg kɨ Madiã kɨ Epa. Ngé kɨ Saba tube a ɗen, a ton lɔr kɨ nduj kam kɨ kootmbĩ, a lan mber kɨlaɗa Bɨraɓe kɨ asɨ kad deg ndubɨna ne.

⁷ Ɓut nyakulg lo Kedarg tube a kawɨn na roit, bal batg lo Nebajotg a ĩn nya ɗa kɨla loi, a awɨn ne dɔ dɨngɨrt lom kad i nya kɨ m'ndig dɔt, m'a m'la kɔsɨgon dɔ kuj kɔsɨgont lom.

⁸ Ĩgɨn awɨn be tit kilndii ke tit derr kɨ ɗen ta kuj ndɨdt ye, in nõg a?

⁹ Kɨtɔ doorg a ndan kamd dɔmt, na toog kɨ ɓebo Tarsis in kete nõdt. A ɗen kɨ ngani ko sãi, kɨ larjã kɨ lɔr lod, kɨta tɔ Bɨraɓe Luwah loi kɨ Ngekunjɗang kɨ nge Israel kɨ ngekɔsɨgoni.

¹⁰ Mbahg a ɗan ndogbɔrrg loi gog, ngarg lod a ɗan kɨlaɓer adɨn kɨta m'ndai kɨ wong lom, na kɨgo ndigt lom la m'oon kumtondo loi ye.

¹¹ Tabitg loi a ɗan tag kɨndɔgndɔg, a utɨn kàda ke ndɔ al, kɨtakad andɨn goit kɨ nyamajg lo girrdeg kɨ dang dang nat kɨ ngarg lod.

¹² Kɨtɔ girrdeg ke kõɓe kɨ a ɗan kɨlaɓer adɨn al a ne, a nujɨna a nujɨn girrdeg kɨdangdang'n non kɔ.

¹³ Nyatɔko lo dɔning Libã a ɗe ɓe loi, ad i kag sipres, kɨ kag yida, kɨ kag warɨm nat tube, kad ɗan ne lo lom kɨjaɓat; m'a mad lo nda njam i lo kɨmaj dum.

¹⁴ Ngang lo deg'n ɗan sei nya kɨ lo ngetɔgt, a lan dɔd ber nõit, na ngékidg tube a ɔsɨn dɔd ber njait A kunɨn ɓebo lo Bɨraɓe, Siõ lo Ngekunjɗang lo Israel.

¹⁵ Ke neni ĩn nya kɨ la kɔ kɨ kɔsɨta, na de tee roit al kaa, m'a m'teli nya kɨmajkoo dum mbãkɨnõt, kɨ nyaronel kɨ ro ngakat kɨ ngaka.

¹⁶ A il mba girrdeg kɨ dang dang; a i taa nyamajg lo ngarg titbe tɔ. A i ger mĩ Bɨraɓe Ngekaj, kɨ Ngebadɔi, Ngetɔg lo Jakob.

¹⁷ M'a mad lɔr ɗe gagoot ningakasɨ, m'a mad larjã ɗe gagoot hand, kɨ ningakasɨ ga goot kag, kɨ hand gagoot mbalg. M'a mad lapia i ngekõɓe, na ngegangta i denesew.

¹⁸ A oon dɔ ta lo nyaɗa kɨ lo ngetɔgt kam dɔningt loi gog al, ke tel gootɓe, ke nuj kam dɔningt loi. A i ndah tɔ ndogbɔrrg loi kaj, na tabitg loi tɔd i Ndub tɔ ho.

¹⁹ Kàd a i kunj loi lokɨkàda gog al ta, nah a ndah dɔit gog al tɔ, na Bɨraɓe a i kunj loi kɨ mbãkɨnõt, Luwah loi a i nyatɔko loi.

²⁰ Kàd loi a ud gog al ta, nah loi a diw til gog al tɔ, kɨta Bɨraɓe a i kunj loi mbãkɨnõt, na ndɔ hɔndo loi a tɨga.

²¹ Deg loi tube a ĩn deg kɨdenesew, dɔning a i lod mbãkɨnõt. In non la i dɔj kag kɨ m'hɔa ye, i kɨlaɗa jim kad m'ngan tɔko.

²² De kɨdu a tel kɨdub, na kɨdu tɔi a i girrdeg kɨ dum dakɔrd. Mĩ Bɨraɓe, m'a mad ɗa nya 'nten Kanag kɨ dɔkag loa.