Ejai 6 - Maktub Ta Kumkajir

Ejai oo kunj Bɨraɓe kɨɗangeɗeng, kamla Bɨraɓe kuna

¹ Ɓal koi ngar Ojias ye, m'oo Bɨraɓe ndɨ dõ dɔ pong ngar kɨ ngal kɨ dõ, ta kub loa ɗoosɨ kuj ndub Luwah.

² Serapẽg ɗan dõ dɔat, kɨɗen aw kɨ bɔgɨn kɨbojidet: Bɔga kɨjoo utɨn takumɨn, bɔga kɨjoo utɨn njan, bɔga kɨjoo ndɨ ɓain.

³ Serapẽ kɨɗen ko kɨdɔ madɨnt an: Ngekunjɗang, Ngekunjɗang, Ngekunjɗang la i Bɨraɓe Ngetɔg tube. Kunja kɨɗangeɗeng ɗoosɨ dɔning kɨtaagbe.

⁴ Girr tabitg yeen kɨtakul ndi ta kɨ ko nõ, na kuj ndub Luwah ɗoosɨ kɨ sahorr.

⁵ M'el m'an: Beto lom. M'asɨ kelta mad al, kɨta mĩ de'n tam i kɨyerr, m'ndɨ dan degt'n tad i kɨyerr tɔ, na kumm oo Ngar, Bɨraɓe kɨ Ngetɔg tube.

⁶ Kɨkɨɗa ku Serapẽgt ɓai kɨ bɔgɨn ɗe kɨ dɔmt, kɨ yalhorr kɨ un dɔ dɨngɨrt kɨ saw jint.

⁷ Ɔdɨn tam, na el an: Lon nya 'nten ɔd tai, bɔrr majalg loi kɔ, ɗagootal loi tɔ i kɨ nyàgo kɔ.

⁸ Kamla m'oo dɔ ndi Bɨraɓe an: Nõ m'a m'laa a? Nõ a aw kɨtɔj a? M'tur m'an: Mĩ ne, i lam.

⁹ Elɨm an: Aw el deg'n ɗan an: Koo dɔ taa, a oon dɔ, na i gerɨn girra al. Koo kɨ kum taa a oon, na a oon jeje al.

¹⁰ Ad ngarkamd nder kongkong, ad mbid ɔi dɨrɨr, ut kumd mbukɨ tɔ, na ɓeta a oon kɨ kumd, na oon dɔ kɨ mbid, kad gerɨn girra kɨ ngarkamd, kad tɔrrɨn ndid al, kad yootd al.

¹¹ Kamla m'el m'an: Mbã ndɔ ɗit nya 'nten a ɗa nya a Bɨraɓe? Na tur an: Mbã kad ɓebog telɨn gootɓeg, kɨ de gotot, dɔning tel gootɓe de gotot.

¹² Bɨraɓe a la deg ko sãi ad deg a nya'n, gootɓe dɔning kɔ dan ɓogt.

¹³ Na ĩla gaj deg, kɨkɨɗa ku kɨkɨlaht'n nãi kamt ɓet a ne, a nujɨna kɨ horr, Tit kag dilg kɨ kagg kɨ ngang ngangg kɨ gangɨnd. Na ginda kɨ nai ɓa gog. Dɔgɨnda'n non la i koh deg kɨjaɓat'n a ɓa ye.