Ejai 59 - Maktub Ta Kumkajir

Girrdeg kɨ Juda tɔn tad dɔ majalgt lod

¹ Jag, ji Bɨraɓe du al kɨta kajɨn deg, mbia ɔi dɨrɨr dɔ koo dɔ tat al tɔ,

² na ɗagootalg losɨ la gangsɨ nat kɨ Luwah losɨ, majalg losɨ tɔ ut kuma dɔsɨt, ada oo dɔ al ye.

³ Kɨtɔ jisɨ i kɨyerr kɨ mosɨ, ngan jisɨ tɔ in kɨyerr kɨ ɗagootal, tasɨ ndɨ el takɨbal, ndõsɨ nyur ta kɨgoot al.

⁴ De kɨ un dɔ namɨn lo gangtat kɨ ta kɨgoɗobat goto. De kɨ elta kɨrota lo gangtat goto tɔ. Ndɨ ɓan kul nyag kɨpãbe, ndɨ elɨn tag kɨbal. Ndenɨn ɗagootal, na oojɨn ndang.

⁵ Deg'n non tɔn kaw li pir, joo'n dundo lo su; de kɨ sa kawd a ne, a oi kɔ; ĩla de ɓa tɔ a ne, li a teet.

⁶ Jundo lod asɨ ɗa kub al, asɨ kut dɔ rod kɨ nyaɗad al. Kɨlaɗad in kɨlag kɨgoot al, nyaɗa kɨ kokõ i jidt.

⁷ Ɓan nja ngɔd kad ɗan majal, Ɗan Kanag kad ũn mosɨ kɨkanj ta kɔ, tagahd i tagah kɨmajal, tuj kɨ nuj i dɔ ɗobgt lod.

⁸ Gerɨn ɗob kam kɨsokɨber al, ɗa denesew goto ɗob kawdt. Ɗob lod ɗugɨn gɔligɔli, de kɨ ngendiat a ne, a ger kam kɨsokɨber al.

⁹ Kɨtɔ 'nten la takɨgang kɨgoɗobat i sãi sej ye, nyaɗa kɨdenesew ɔdj al. Kɨ nda kamj dɔ kunjt, na oon. Lo diw til. Kɨ nda kamj dɔ lokart, na kɨ ndia kam lot kɨ diw dĩ.

¹⁰ Kɨ mom lo kad bɔrt tit mundog be, kɨ mom lo tit deg kɨ kumd goto, kɨ ga njaj gigt kàd kɨ ɗa dan ɓet tit lo kɨ to pitpit be. Jĩ tit ngékoig be dan degt kɨ rod ngang.

¹¹ Jĩ tube kɨ ko tit tubog be, kɨ ko ngãi tit derrg. Kɨ nda kamj dɔ takɨgangt kɨgoɗobat, na goto, kɨ nda kamj dɔ kajt tɔ, na i sãi sej.

¹² Kɨta tɔidɔtag loj ĩn ngãi nõit, majalg loj man naj dɔjt, tɔidɔtag loj in rojt, kɨ ger ɗagootalg loj.

¹³ Kɨ taɗɔɔ, na kɨ maj ta ger Bɨraɓe, kɨ nya Luwah loj, na kɨ tɔ ɗob kɨɗang. J'elta kɨ lo ngetɔgt, kɨ taɗɔɔ, j'ɔj takɨbal kamjt, na kɨ ga kamj dɔt tɔ.

¹⁴ Ɔsɨn ta takɨgang kɨgoɗobat kɨ gog, ad denesew ɗa sãi, nda rota goto ta kum degt, ad nya ɗa kɨdenesew ngah lo ku degt al.

¹⁵ Rota goto, de kɨ ngekoron majal a ne, deg tirɨn nyag loa pur. Bɨraɓe oo nya'n non, na nela al, kɨta takɨgang kɨgoɗobat goto.

¹⁶ Bɨraɓe nɔl oo, na ngah de al, ta yaa kɨta de mad kɨ ɗa mbɨnant kɨ deg goto. Kamla ji Bɨraɓe aja, denesew lo Bɨraɓe ndɨna goa kɨ dõ tɔ.

¹⁷ La denesew tit kub hand gunt, nda jɔg kaj dɔnt. La ndangɨra ront tit kub be, na jang ut roa tit kubji tɔ.

¹⁸ A ba dekɨɗen kɨgo kɨlaɗaat, a baji ngéndoorɨn kɨ wong kɨtɨngabil, na a baji madngétang kɨgo kɨlaɗadt titbe, a ad doorlog titbe tɔ.

¹⁹ Deg a ɓoolɨn tɔ Bɨraɓe ko lokudkàdt, a ɓoolɨn tɔko loa ko loɓakàdt ho. Bɨraɓe a ɗe tit bah kɨ nũ kɨ tɔgɨn be, in nélbarwãi kɨ ɓai kokɨro Bɨraɓet a ɔsa pɨkapɨka.

²⁰ Ngebadɔ a ɗe Siõt kɨta kaj ngékɨɓe lo Jakob, in a nyan ta ɗa majal, kel Bɨraɓe.

²¹ Bɨraɓe el tɔ an: 'Nten la i kunkɔ kɨ m'un sed ye Ndilɨm i dɔit, kɨ tag lom kɨ m'nda tait a nyan tai al, ke goton ta nganit, ke ta ngakait, titbe la i takel Bɨraɓe, tajigla kɨ mbãkɨnõt.