Ejai 5 - Maktub Ta Kumkajir

Terrta dɔ ndɔɔ nduut

¹ M'a m'ɔsɨ pa kɨta ngetar lom, ad i pa lo ngetar lom kɨdɔ ndɔɔ nduut loa: Ngetar lom aw kɨ ndɔɔ nduu dɔ door lot kɨmaj ngãi.

² Ndɔɔ lo, tɔrr mbalg, hɔ nduu kɨmaj tit, ɗa kuj ngomlo kɨ ngal tit, ɗa lo ɓa nduu kamt, nda kamɨnt kad n'ngah kand kɨmaj, na and kand nduu kɨmajal.

³ Tajigla in ngéndɨ Jerusalem kɨ deg kɨ Juda, kɨ i gangɨn ta mbɨnajt kɨ ndɔɔ nduu lom.

⁴ Nya mad nãi nõ kad m'ɗa kam ndɔɔ nduut lom in m'ɗa, al ɓaitɔ a? M'nda kammt kad tee kɨ kand nduu kɨmaj, na tee kɨ kand nduu kɨmajal kɨtɔɗi a?

⁵ Tajigla m'a m'ɔjsɨ nya'n ɓet m'a m'ɗa kɨ ndɔɔ nduu lom. M'a m'ɗa ba m'tɔrr kɨnga loa, kad nyag san. M'a m'ɗa burrolo ndogbɔrrat, na a ɓana kɨ njad.

⁶ M'a m'tela got ndɔɔt, kad a jan takõna ke ndɔɔn kama al. Kõn kɨ ngár a ɓan tit. M'a m'ɔg kilndii kad man a ed dɔt al tɔ.

⁷ Kɨtɔ ndɔɔ nduu lo Bɨraɓe Ngekoosɨg i ngékɨɓe lo Israel; deg kɨ Juda tɔ in nya kɨ hɔ kɨ nela. Ndɨ ngoo takɨgang kɨgoɗobat, na i mosɨ kɨ kũ kɔ. Ndɨ ngoo nyaɗa kɨdenesew, na i tõn ɗusɨɗusɨ.

Nya kɨ to a so dɔ ngéɗamajalgt

⁸ Beto lo ngeɗa kuj kadnat nat, kɨ ngéla ndɔɔ kad nat, mbã lo mad kɨ to kari goto. Na a ndɨn kɨ kɨɗad dɔningt 'nten.

⁹ Bɨraɓe Ngekoosɨg elta mbimt, Kɨ yo kɨnda an: Rota kujg ngãibe a telɨn gootɓe; kuj kɨbobo kɨ kɨmajmaj, de a ndɨt al.

¹⁰ Ndɔɔ nduu hektar mɨta adɨn man nduu litɨr dɔmi al. De'n duw geme kilo ɓu a tet kilo kɨlah koon.

¹¹ Beto lo ĩgɨn ɓain kɨsĩ ritit, sahn go nyakãi kɨ kong, ndɨn ta kãi kasɨt mbã ndɔ, kasɨnduu ɗad ad rod tɨngabil.

¹² Kɨndeh kɨ kɨndeh ngo, kɨ kɔd, kɨ tow, kɨ kasɨnduu adɨnd ronel kam ɗa nahgt lod. Turɨn go kɨlaɗa Bɨraɓe al, oon kɨlaɗa jia al tɔ.

¹³ Kɨtɔ 'nten la deg lom awɨn ne ɓert kɨta nyager al. Ɓoo ndɨ tɔl kɨbog lod Koosɨg lod kɨnda man ɗad ad kɔd tut kãrɨm.

¹⁴ Kɨtɔ 'nten la holɓe, a tee tan, na a laa yalɨm, kɨ kɨse ronel kɨ yekɨtyekɨt.

¹⁵ Titbe Bɨraɓe a lan dɔ de kɨber. Ngégaɓuro a lan dɔd kɨ ber.

¹⁶ Bɨraɓe Ngekoosɨg i kɨ tɔi kɨ dõ kɨtakul takɨgang kɨgoɗobat loa, na Luwah Ngekunjɗang a ɔj ron kɨkunjɗang kɨtakul nyaɗa kɨdenesew.

¹⁷ Ngan batg a san nya nõbe tit lokuldt be, na nyakulg kɨ to mbulmbul a san nya gootlot kɨtuj.

¹⁸ Beto lo deg'n dɔnd lo ɗagootalt lod kɨ kɨla takɨbal godt, a ndɔrɨn majal kɨ kɨla pusɨ godt tɔ.

¹⁹ Deg'n non anan: Ada ɗa kɨla lon Kanag ad j'oo, ad takɔj lo Ngekunjɗang kɨ Israel ndɔt kɨrojt nderbe kad kɨ gera.

²⁰ Beto lo ĩgɨn ndɨ kunɨn majal maj, na kunɨn nya kɨ majal, maj mbelɨn til kɨ kunj na kunj mbelɨna kɨ til, nya katbang gan ne goot nya kɨnel, na nya kɨnel gan ne goot nya kɨ katbang tɔ.

²¹ Beto lo ngékoo rod ngéterrt. Oo a anan, n'in ngégoosɨ tɔ.

²² Beto lo deg kɨngang lo kãi kasɨt kɨ kong; na ɓan tɔg bur nyakãi kɨngang nat.

²³ Ndɨ ɔrrɨn ta dɔ de kɨ ngeɗamajalt kɨta kadkari, na ɔgɨn nya lo de kɨ ta goto dɔat logangtat.

²⁴ Kɨtɔ 'nten, tit'n horr õn bulmu na mũ kɨtut so lɔt dan horrt, titbe tɔ ngɨrad tel nya kɨndum, hutd tɔ ɓai tit bu be, kɨta mbetɨn ta nyandoo lo Bɨraɓe Ngekoosɨg, kidin ta lo Ngekunjɗang kɨnge Israel.

²⁵ Kɨtɔ 'nten Bɨraɓe ɓawong kɨ deg lon, la jin kɨdɔdt, kad n'ndad, mbalbog yeen, ad dɔnind to ɗobt tit ɓirɓit be. Be kaa wong loa oi al, jia ɗa kɨ dõ ɓaitɔ.

²⁶ Bɨraɓe un drapo kɨ dõ kɨta kunɨn koosɨ ngéɗɔɔg'n in sãi. A kund kɨ ngol kad ɗen ko dɔngoi dɔningt na. Ɗen kanangbe kɨ ro kɨ to pelpel.

²⁷ De mad kudt kɨ kɔr ɗaa, ke ga njan nyat goto, de mad kɨ tẽ ɓi ke to ɓi goto, de mad kɨ ndardɔɓoa tut, ke kɨla sa loa gang goto tɔ.

²⁸ Kɨrãg lod tube at pepep, jid i dɔ gãt lod, kɨngotinja sɨndag lod kongkong tit mbal be, na nja pusɨg lod tit nélbarwãi be.

²⁹ Ko lod i ko lo tubo, ko tit ngan tubo, a jan ɗɔɔ na a hɔn nya, unɨn tadt awɨn ne, de mad kɨ ta tadt goto.

³⁰ Ndɔt'n non kah ngéɗɔɔg a ko tit bahbo kɨ ko be. Lon de oo dɔning'n non, lo i til kɨ kamkil. Kunj a tel lo kɨ diw kɨtakul kilndii.