Ejai 3 - Maktub Ta Kumkajir

Bɨraɓe a gangta dɔ Judat kɨ ɓebo Jerusalem

¹ Oon Bɨraɓe, Bɨraɓe Ngekoosɨg nya Jerusalem kɨ Juda kɔ, nyangomro kɨ nya kɨkad tɔg tɔ, ad i nyasa tube kɨ mankãi tube tɔ

² nya gõɗɔɔg kɨ ngéɗɔɔ, kɨ ngégangta, kɨ ngékelta kɨ ta Luwaht, kɨ mboolig kɨ ngahtɔgg,

³ kɨ bɨradɔ dɔ degt kɨdɔmi, kɨ ngégangta, kɨ ngékad kɔj kɨ ngegoosɨ ɗa kɨla, kɨ mbooli ngegoosɨ ger nya.

⁴ M'a mad de kɨdɔdug kad in ngarg lod, na ngan kɨɗoig a õnɓe dɔdt.

⁵ Deg a dan kumna ndo, de mad a da kum kɨmad ndo, dekɨɗen ɔsɨ ta madɓen. Ngon kɨdɔdu a kid ngahtɔg, na de kɨpãbe a kid de kɨ sumba kɔsɨgon.

⁶ De mad a hɔ ngonkõn kam kujt lo bɔwɨn, a ela an: I ndɨ kɨ kubji, a ĩ kɨbo loj, un nya kɨtuj 'nten jiit.

⁷ Kam ndɔat'n non kɨmad a ko an: Mĩ ngeyoot de al, kɨta nyasa ke kub goto ɓe lom. Ot ndam kɨbo dɔ degt.

⁸ Jerusalem tuj, Juda so, kɨta ta lod kɨ kɨlaɗad ndoorɨn Bɨraɓe, na kidɨn maj kooa kɨtɔitɔi.

⁹ Takumd manaj ndoord in kɨɓeg, ɔjɨn majal lod kɨtɨga kɨkanj ya dɔ tit Sodom be. Beto lod kɨtɔ majal ndɨ ɗe kɨ nya kɨ to dɔdt.

¹⁰ Elɨn kad de kɨdenesew, maj a urra kɨta a sa kand kɨlaɗan.

¹¹ Beto lo de kɨmajal, kõ a i dɔat kɨta a ngah kɨgo kɨlaɗant.

¹² Aa. Deg lom, nge da kumdeg ndo i ngon kɨdu, na dekɨdẽg õnɓe dɔdt. Aa, deg lom, ngékɔrri ta ɗob lain mut, kɨta tujɨn ɗob ndiasɨ.

¹³ Bɨraɓe ɔj ron kɨta gangta, duba kɨta gangta dɔ degt lon.

¹⁴ Bɨraɓe mbagɨr gangta dɔ kɨbogt, kɨ mbaiɓeg lo deg lon, an: Ĩn la san ndɔɔ nduu ye; nya lo ngéndog'n ɔin i kam kujgt losɨ.

¹⁵ Kɨtɔɗi i ɓan ne dɔ deg lom kɨ ber a? I tɔsɨn takum ngéndog i retɨn njɔtnjɔt a? Kel Bɨraɓe Luwah Ngekoosɨg.

Bɨraɓe a gangta dɔ ngan kɨdẽgt kɨ Siõ

¹⁶ Bɨraɓe el an: Kɨtɔ ngan kɨdẽg kɨ Siõ ɗan dɔngang, ndian kɨ ta kɨ ɓa kɨ dõ, elɨn na ta majal kɨ ɗa kɨ kum kɨ nda sepsep, na ndia ndek ndek, adɨn ningag kɨ njadt kon kengkeng;

¹⁷ Bɨraɓe a ad ngorwoi sa dɔ ngan kɨdẽg kɨ Siõ. Bɨraɓe a ɔrr nyakutdɔ rod ad rod sɔld.

¹⁸ Ndɔt'n non Bɨraɓe a ɔrr ninga pare kɨ njadt, kɨ nyahɔ bisɨdɔ, kɨ nyapare kɨ taana kɨ nah,

¹⁹ kɨ ningambi, kɨ ngan ningaji, kɨ takub dɔɔ dɔ kɨ kub dulo dɔ

²⁰ kɨ kadmul, kɨ ninganja, kɨ ndardɔɓo, kɨ ku yib kɨkootmbĩ, kɨ gaj kɨdɔ rot,

²¹ kɨ ninga kɔsɨdɔnya kɨ jit, kɨ ninga kɨ la kont,

²² kɨ kub kɨmajmaj, kɨ kubji, kɨ kub kɨ ga kɔt, kɨ ɓɔl kɨ jiit,

²³ kɨ kutram, kɨ kub lẽ kɨ sɔl lom lom, kɨ kub dulo dɔ, kɨ kub kut takum.

²⁴ A i titbe: Nya kɨ ndum ga goot yib kɨkootmbĩ, kɨla kɨkari ga goot ndar dɔɓo, dɔ ngɔ ga goot bisɨdɔ kɨ hɔ nomnom, kub kɨlagum ga goot kubji kɨmaj, kuro dɔ ga goot majkoo.

²⁵ Dekɨdɨngãg loi a son ta kiyaɗɔɔt, na kɨrãɗɔɔg loi a son ta ɗɔɔt.

²⁶ De kɨbog ngéndɨ tabitgt kɨ Siõ a nõ'n rod, hɔn ndo a ndɨn ber dɔningt kɨ ro kɨ kil yolel.