Ejai 2 - Maktub Ta Kumkajir

Bɨraɓe a õɓe dɔ dɔningt kɨtaagbe kɨ lapia

¹ Ta'n Ejai ngon Amots oo dɔ Judat kɨ Jerusalem laten:

² Kaglo mad a ɗe nõ, kam ndɔgt kɨdɔboit mbalbo'n kuj lo Bɨraɓe ɗa dɔt, a ngal tɔi tasom mbalbog tube, a tɔi doorlog. Girrdeg kɨ dang dang tube a awɨn kɨroat.

³ Koosɨdeg a awɨn, a elɨn anan: I ɗen, ad j'awɨn mbalbot lo Bɨraɓe, j'awɨn kuju lo Luwah lo Jakob, kɨtakad ndooj goɗobg lon, kad kɨ ndia dɔ ɗobgt loa. Kɨtɔ nyandoo a tee ko ɓebot kɨ Siõ, ta lo Bɨraɓe a tee ko Jerusalemt.

⁴ A gangta ku girrdegt kɨ dang dang, a i ngekoogo ta lo girrdeg ngãibe. A ɔin kiyaɗɔɔg lod, a hɔn kɔsɨ ndɔɔt, ningag lod tɔ, a ɗand ngorongt, girrdeg madg a ɔin kiyaɗɔɔg ɗɔɔn ne girrdeg madg al, nẽbe kɨnõt a ndoon ɗɔɔ al.

Bɨraɓe a gangta dɔ ngédɔngangt

⁵ Ngékɨɓe lo Jakob, i ɗen, ad kɨ ndian kam kunjt lo Bɨraɓe.

⁶ Kɨtɔ i nya deg loi kɔ, ad i ɓe lo Jakob, kɨta ɗoosɨn kɨ mboolig kɨ ɗen ko loɓakàdt, in ngéndõteg tit Pilistiag be, na lan kɔd nat kɨ mbahg tɔ.

⁷ Dɔning lod ɗoosɨ kɨ larjã kɨ lɔr, nyamajg lod dum tɨda. Dɔning lod ɗoosɨ kɨ sɨndag, pusɨg lod tɔ dum tɨda.

⁸ Dɔning lod ɗoosɨ kɨ yog, ɔsɨn dɔd ber nõ kɨlaɗa jidt, kɨ nõ nyat kɨ ngan jid ɗa.

⁹ Titbe deg a lan dɔd kɨber, a sɔlɨn dɔd tɔ. Ot nyàgo majal lod kɔ.

¹⁰ I ya roi kam mbalgt, i yaroi kam buningt, nõ nyat kɨkootɓool lo Bɨraɓe kɨ nõ nyẽr majt loa kɨtɔitɔi tɔ.

¹¹ De'n ɓa tan kɨ dõ, Bɨraɓe a la dɔa kɨber, a sɔl dɔ ngédɔngang tɔ. Ndɔt'n non Bɨraɓe kɨ kɨɗanbe la a i kɨ tɔi kɨ dõ ye.

¹² Kɨtɔ ndɔ lo Bɨraɓe Ngekoosɨg a ɗe dɔ ngédɔnganggt, kɨ ngeɓa tad kɨ dõ, kɨ de kɨɗen kɨ ngetɔi dɔn kɨ dõ, kad la dɔa kɨber.

¹³ Kɨ dɔ kag sedɨrgt kɨ ngal kɨ dõ, kɨ dɔning Libãt, kɨ dɔ kag dilgt kɨ dɔning Basan,

¹⁴ kɨ dɔ mbalbogt kɨ ngal tube, kɨ dɔ doorlogt kɨ ngal tube,

¹⁵ kɨ dɔ kuj ngomdɔɓet kɨ ngal kɨɗen, kɨ dɔ ndogbɔrrt kɨngang kɨɗen,

¹⁶ kɨ dɔ too kɨbogt tube kɨ Tarsis, kɨ dɔ toogt kɨmajkoo.

¹⁷ De kɨ ngeɓa tan kɨ dõ, Bɨraɓe a la dɔa kɨber, a sɔl dɔ ngedɔngang tɔ. Ndɔt'n non Bɨraɓe kɨ kɨɗanbe la a i kɨ tɔi kɨ dõ ye.

¹⁸ Yog tube a goton.

¹⁹ Deg a andɨn bulombalgt kɨ ɓegang kɨ dɔningt kad kɨ n'ãin na ta wongt kɨkootɓool lo Bɨraɓe, kɨ nõ nyẽr majt loa kɨtɔitɔi, lon a ɓai kad kɨ n'nda ngéndɨ dɔningt ɓoolt.

²⁰ Na yo larjãg kɨ yo lɔrg in deg ɗand kɨ n'ɔsɨn dɔd ber nõdt, ndɔt'n non a tɨland kɔ adɨn yegg kɨ dowg.

²¹ A andɨn bulombalgt kɨ mbɨna mbalgt kɨ riya, kad kɨ n'ãin nõ wongt kɨkootɓool lo Bɨraɓe, kɨ kɨ nõ nyẽr majt loa kɨtɔitɔi, lon a ɓai kad kɨ n'nda ngéndɨ dɔningt ɓoolt.

²² I nyan ta ɓakul de'n a taakò kɨ kõnɨn, kɨta ndaa i ɗi a?