Ejai 11 - Maktub Ta Kumkajir

Kõɓe kɨdenesew lo ngon Jese

¹ Dɔgɨnd Jese a ɓa, na dɔjia mad a ɓa ko ngɨrat.

² Ndil Bɨraɓe a ndɨ dɔat, ndil goosɨ kɨ terr, ndil kɔjta kɨ tɔg, ndil ger nya kɨ ɓool Bɨraɓe.

³ Ɓool Bɨraɓe a i kamat. A gangta kɨgo kot kɨ kum al, a elta kɨgo ko dɔt kɨ mbi al tɔ.

⁴ A elta lon denesew kɨ ro, kɨ ro ngendot kɨ dɔningt. A ndah dɔning kɨ gɔlkɔp ta kɨ tant, a tɔl ngéɗamajalg kɨ ko kɨ tant.

⁵ Denesew a i nyadɔɓoa, nyaɗakɨro tɔ a i nyadɔ girra.

⁶ Bisɨkolo kɨ ngon bat a hɔn londɨ nat, kag kɨ ngon bĩã a ton kad nat, ngon mang kɨ ngon tubo, a san nya nãt, na ngon kɨdu a ɔrrd ta ɗob.

⁷ Kõ mang kɨ urs a san nya lo kɨɗa, ngandg a ton nat lo kɨɗa, tubo ke mang a sa mũ,

⁸ Ngon kɨ ta mbat a ɗong ta holɓe yirt, na ngon kɨ mbet mba a la jin holɓe ngandamt.

⁹ A ad de dó ke, a tujɨn nya dɔ mbalt lom kɨjaɓat al, kɨta dɔning a ɗoosɨ kɨ ger Bɨraɓe, tit'n bahbokat ɗoosɨn gongɨrt be.

¹⁰ Ndɔt'n non ngɨrra Jese a i tit drapo kɨta girrdeg kɨ dang dang. Girrdeg kɨ dang dang a sahna kɔsɨgon, a i kam ndɔt loa.

Ndeg Israel a telɨn kɨ ɓe lod gog kɨ ronel tetɗɔɔ

¹¹ Ndɔt'n non Bɨraɓe a la jin kɨkõjoo, kɨta kɔi ndeg deg lon, ĩgɨn nãin dɔning Asiri kɨ dɔning Ejipt, kɨ dɔning Patros, kɨ dɔning Kus, kɨ dɔning Elam, kɨ dɔning Sinear, kɨ ɓebo Hamat, kɨ doorg kɨ kam bahbot.

¹² A un drapo kɨ dõ kɨta girrdeg kɨ dang dang, a ɔi Israelag kɨ tuɓa kɨnat, a kaw Judag kɨ tĩn na dɔkum dɔningt kɨsɔɔ.

¹³ Jang'n ɗa Epraimag a goto, ngédakum Judag ndo a tujɨnd, Epraimag a ɗaa jang kɨ Judagt al ta, na Judag a in madngéta Epraimag al tɔ.

¹⁴ A son gid Pilistiagt ko lokudkàdt, in tujoo a tirɨn deg kɨ loɓakàdt pur. A hɔn Edomag kɨ Moabiag, Amoniag kaa ne, a telɨn rod go tat lod.

¹⁵ Bɨraɓe a ad lo tɔ bahbo kɨ Ejipt't tut kurum, na a la jin kɨdɔ bahbot, a toan pu kɨ tɔg kò kɨ tant, na ɗaa ad tɔ ngan bah tanãimɨta, na deg a gangɨn kɨ sanjadt.

¹⁶ Ɗob kɨbo a tee kɨta ndeg deg kɨ nãin dɔning Asiri, tit'n ngahn ne ɗob kɨta Israel ndɔ'n teen ne dɔning Ejipt't nõ.