Ejai 10 - Maktub Ta Kumkajir

Wong lo Bɨraɓe kɨdɔ Israelgt

¹ Beto lo ngénda mber kɨgoɗobat al, kɨ ngéndang maktub mberkɨndag kɨgoot al,

² kɨta mbetɨn gangta lo de kɨdangtg goɗobat, kɨta taan nya lo ngéndog ku degt lom, tirɨn nyag lo ngéngawkoig, taan nyag lo ngan halg kɨ lo ngetɔgt.

³ A i ɗan ɗi ndɔ gangtat, lon nélndii a ɓai ko sãi a? A awɨn ro nõt kad i ngahn ngeɗasesɨ a? A i ɓon nyangah losɨ ɗah a?

⁴ Nya mad kɨ a i ɗan goto, na a i ɗugɨn ber nat kɨ ĩgɨn hɔnd dangait, na tuson ku ngékoit be kaa wong lo Bɨraɓe duba al, na jia ɗa kɨ dõ ɓaitɔ.

Bɨraɓe a nda ɔj Israelag kɨ ji Asiriag

⁵ Ɓebo lo Ngar kɨ Asiri, i gɔlkɔp wong lom. Kag kɨ jiat i wong lom kɨtɔlsɔkɨr.

⁶ M'a m'laa kad ɗɔɔ kɨ girrdeg, kɨ ngéɗa nya kɨgo lo Luwaht al. M'a m'ndaa mber kad ɗɔɔ kɨ deg'n wong lom i dɔdt, kad tɨr nyag lod pur, kad ɓad kɨber mbujmbuj tit bɔrr kɨdɔ ɗobt be.

⁷ Na nda kamɨnt titbe al, gah dɔt al tɔ. Tagaha i nuj nya, nuj girrdeg kɨ dang dang ngãibe kɔ.

⁸ Kɨtɔ el an: Kɨbog lom tube ĩn ngarg ale?

⁹ Ɓebo Kalno i tit ɓebo Karkemis ale? Ke Hamat i tit ɓebo Arpad, ke Samari i tit Damasɨ ale?

¹⁰ Ĩ la jia taa kõɓe lo yog, kɨ ɓakumta nyag lod kɨtɔsɨ tɔin ngé kɨ Jerusalem kɨ ngé kɨ Samari,

¹¹ M'a m'ɗa titbe kɨ Jerusalem kɨ yog loa al e? M'a m'ɗa titbe kɨ Samari kɨ yog loa ale?

¹² Na lon Bɨraɓe a tɔlkon kɨla lon tube dɔ mbalbot kɨ Siõ kɨ Jerusalem ye, a nda ngar kɨ Asiri kɨta dɔngang loa, kɨ burokɨga loa, kɨ taa kɨ ɓa kɨ dõ.

¹³ Kɨtɔ el an: Kɨtakul tɔg jim la m'ɗan ye, kɨtakul terr lom kɨta mĩ ngegoosɨ, m'tuj kɨ ɗobning lo girrdeg kɨ dang dang, m'tir nyamajg lod pur, Tit gõɗɔɔ, m'tɔsɨ ngarg ngéndɨ dɔ pong kõɓegt m'tɨlad

¹⁴ Jim hɔ nyamajg lo deg tit hɔ kuj yel. Tit nde a ɔin kaw kɨ nya kɔ, m'a m'kaw ngéndɨ dɔningt kɨtaagbe kɨnat, na de kɨɗa kɨ a yee bɔgɨn, ke tee tan kon goto.

¹⁵ Kɨnga a gaburo dɔ det'n gan nya a? Si a tɔi ron kɨ dõ dɔ det'n a jan nya a? Tit gɔlkɔp a yeen ngekunɨn, tit kag a ɔd ron ji det'n ɗa una be a?

¹⁶ Kɨtɔ 'nten Bɨraɓe, Bɨraɓe Ngetɔg tube a la nyem ku deg kɨ mongt. Girr kunjat kɨɗangeɗeng nya mad ndu õ tit horr õn be.

¹⁷ Kunj Israel a tel horr na Ngekunjɗang loa a tel horr kɨ a õ nyag, a õ kong, kɨ ngarg mugɨj ndɔ kɨɗabe.

¹⁸ Bɨraɓe a tuj maj lo kagg loa kɨ kam kút kɨ ndɔɔ kɨ tee kɨ nya ngãi, ro kɨ dãro tu. A i tit ngeroto kɨ roa lo haw.

¹⁹ Ndeg kagg loa kɨ kam kút a i tẽbe, ad ngon kɨdu kaa, asɨ da kɔrd tube.

Ta lo ndeg Israelag kɨ nãin

²⁰ Ndɔt'n non ndeg Israelag kɨ ngékɨɓe lo Jakob kɨ nãin kɨ dɔd dõ ye, a ndɨnan rod kad ngendadt gog al ta, na a ndɨnan rod kad Bɨraɓet, kad ngékunjɗangt kɨ Israel.

²¹ Ndegag kɨ nãin a telɨn kɨ ro Luwaht kɨ Ngetɔg.

²² Israel, ke deg loi in tit ngar kɨ bahbokat't, ndegag koon la a telɨn ye. Nujkɔ i kɨnda mbera kete woi, a da deg ɗa denesew lo Luwah.

²³ Kɨtɔ nujkɔ kɨ nda mbera kete woi, Bɨraɓe, Luwah Ngetɔg tube a tɔl kõna kam dɔningt kɨtaagbe.

²⁴ Kɨtɔ 'nten kel Bɨraɓe, Luwah Ngetɔg tube: A, Deg lom ngéndɨ Siõ, ot ɓoolɨn Asiriag lon ndasɨn kɨ gɔlkɔp, na unɨn kag kɨdɔsɨt tit'n Ejiptiag ɗan ne maɗi.

²⁵ Kɨtɔ nãi kaglo tẽ ɓaitɔ, wong lom kɨtɔlsɔkɨr dɔit a tɨga, na wong lom a tel kɨdɔdt, a nujd kɔ.

²⁶ Bɨraɓe Ngekoosɨg a ɓai kɨ ndeh kad ndadɨn tit'n nda'n Madiãg mbal Orebt be, na a un gɔlkɔp lon kɨdɔ bahbot, tit'n ɗan dɔning Ejipt.

²⁷ Ndɔt'n non a unɨn nyato loa kɨkɔi bɔgsɨt kɔ, na jug loa kɨ kɔsɨt a tet kɔ.

Ngéɗɔɔg kɨ Asiri ndɨ ɗen

²⁸ Ngar kɨ Asiri tee Ajat, tɔi Migron, ndah nyag lon Mikmas.

²⁹ Ngéɗɔɔg loa gangɨn mbɨna mbalbog, ton Geba ndɔ. Deg kɨ Ramat ndadɨn. Deg kɨ Gibea lo Sawul ãina.

³⁰ Kon kɨ ndid kɨbo, ɓebo Galim. In ngéndɨ Lais, oon dɔ.

³¹ Ɓebo losɨ in deg kɨ Anatot, ngé kɨ Madmena ãina. Ngéndɨ Gebim sun lui.

³² Na ndɔt'n non dɨban Nob, Lan jid ndoorɨn ne mbalbo, lo ngon kɨdẽ kɨ Siõ, doorlo kɨ Jerusalem.

³³ Oon Bɨraɓe Luwah, Luwah Ngetɔg tube a ga dɔj kagg gang kɨ lo ngetɔgt, kag kɨngalg a gangd kɔ, kɨ tɔi kɨ dõ a tetd kɨber.

³⁴ A gang lo kɨnder kɨ kam kut kɨ kɨnga, na dɔning Libã a so girr ji ngetɔgt.