Ejai 1 - Maktub Ta Kumkajir

Bɨraɓe kun Ejai

¹ Nyakookamndilt lo Ejai ngon Amots ĩn oo dɔ Judat kɨ ɓebo Jerusalem. Kaglot lo Ojias kɨ Jotam kɨ Akaj kɨ Ejekias, ngarg kɨ Juda.

² Dɔrã, oo dɔ. Dɔning, i nel mbii. Kɨta Bɨraɓe elta an: M'to ngang mad tɔgɨn, na taamɨn ɗɔɔ.

³ Bɔw mang ger ngeen, korro tɔ ger sund sanya lon ro ngeent. Na Israel gerɨn al, deg lom gerɨn nya al.

⁴ Aa. Girrdeg kɨ ngéɗamajal kɨ ngeɗagootal kɨngãi, koh deg kɨ ngéɗamajal, ngan ngétujnya, nyan Bɨraɓe kɔ, Kidɨn Ngekunjɗang lo Israel, tɔrrɨn rod, telɨn kɨgog.

⁵ I ndigɨn kad ndasɨn gog ɓaitɔ, kɨta taaɗɔ losɨ kɨdɔtdɔt a? Dɔ kɨtaagbe i mõi, ngarkam kɨtaagbe i kɨ koi siw.

⁶ Mbagɨra danjaat mbã kɨ dɔt, nya mad kɨ to soot goto. Dog, kɨ dò nda mbukɨmbukɨ, kɨ dobaig kɨ tee ɓi, kɨ tad to tag kɨkanj dɔ, urrɨn yibt al tɔ.

⁷ Dɔning losɨ i gootɓe, ɓebog losɨ tɔ horr õ. Mbahg taan dɔning losɨ nõsɨt, i ɓe losɨ i tit nya'n mbahg nujɨn nẽ.

⁸ Ɓebo Siõ ndɨ tit kujkam ndɔɔ nduut, tit kujkam i ndɔɔ kosɨt, tit ɓebo kɨ ngéɗɔɔg gugɨn dɔa.

⁹ Kanj Bɨraɓe Ngekoosɨg'n nya ndeg deg sĩ adj al a ne, ni j'a jĩ tit Sodom, kɨ Gomor be tɔ.

Luwah kun deg kɨ Juda kɨ tɔrrɨn ndid

¹⁰ In ngarg kɨ Sodom, oon dɔ ta lo Bɨraɓe. In deg kɨ Gomor, i nelɨn mbisɨ kɨdɔ tat lo Luwah loj:

¹¹ Kadkari losɨ kɨngãi ye, m'a m'ɗan ɗi a? Kel Bɨraɓe. Kamm ndan kɨ kadkari bal batg losɨ kɨlahorrt kɨɗaibe, kɨ mbool ngan mangg kɨ to mbulmbul. M'a m'ɗa ronel dɔ mosɨ bɔw manggt al, ke mosɨ ngan batg, ke mosɨ bal bĩãg.

¹² Lon i ɗan nomt ye, nõ ndɨjesɨ kad i ɓan natlo lom kɨ njasɨ a?

¹³ Ot ɗen kɨ kadkari pãbe kɨndang, mbikam losɨ kɨkootmbĩ i nya kɨyerr romt. Kij nah kɨ ndɔ taakò, kɨ kun deg kɨ lo kawnat: m'asɨ kad m'ndɨ dɔ ɗagootal kɨ kawna dɔ ɗa naht al.

¹⁴ M'mbet kij nahg losɨ, kɨ ɗa nahg losɨ kɨ gangɨn ndɔd. In nya kɨ kɔi dɔmt, m'ɔrr rɔkɨ dɔ todt.

¹⁵ Lon i lan jisɨ kɨ dõ i kɔmɨn ne nya a ne, m'a m'ut takum'm dɔsɨt. Ke neni i kɔn kɨ njanatnat kaa, m'a m'oo dɔ al, jisɨ ɗoosɨ kɨ mosɨ.

¹⁶ I ndoogɨn man, arɨn rosɨ. Ɔrrɨn kɨlaɗasɨ kɨmajal takum'mt kɔ. I nyan ta ɗamajal.

¹⁷ I ndoon ɗa maj. I sahn go ɗa denesew. Ɔgɨn dɔ nyaɗa kɨ lo ngetɔgt. I gangɨn ta lo ngon hal ad i goɗobat. I gangɨn ta lo ngengawkoi ad i goɗobat.

¹⁸ I ɗen, kel Bɨraɓe, ad kɨ majna ta. Ke majalg losɨ tit'n kɨ nya kɨkɨre kaa ne, a telɨn kɨnda ngũng tit bul be; ke majalg losɨ i kɨkɨre pirɨr kaa, a telɨn kɨnda tit bĩ bat kɨ nda be.

¹⁹ Ĩla i ndigɨn, na i telɨn rosɨ goot a ne, a i san kand kɨmaj kɨ dɔningt'n ɗan:

²⁰ Ĩla i mbetɨn, na i taan ɗɔɔ a ne, a tɔlsɨn kɨ kiyaɗɔɔ, kɨta ta Bɨraɓe elta.

Bɨraɓe a gangta dɔ ɓebo Siõt kamla a badɔa

²¹ Titbãi ɓebo kɨro tel kaya dekɨdẽ a? In maɗi ɗoosɨ kɨ nyaɗa kɨgoɗobat. Maɗi nyaɗa kɨdenesew i kamat, na tajigla ngétɔldeg la ndɨnt.

²² Arjã loi tel kĩ nar, kasɨnduu loi tɔ burɨna kɨ man.

²³ Ngarg loi in ngétaaɗɔɔ, ĩn madna kɨ ngéɓoogg, dekɨɗen ndɨg kadkari, na ãin ngɔd go nyabajit. Gangɨn ta lo ngon hal ad i goɗobat al, takɨgang lo ngengawkoi tee rodt al tɔ.

²⁴ Kɨtɔ 'nten, Bɨraɓe Ngekoosɨg, Bɨraɓe Ngetɔg lo Israel, an: Aa. M'a m'tɔl kon wong lom dɔ ngéndoorɨmt, m'a m'nda ngɨra dɔ madngétaamt.

²⁵ M'am la jim kɨdɔit m'ndoorɨn, m'a m'teli kɨ kart kɨ kat, majalg loi a telɨn man, m'tari dɔ majalg loi tube na m'a m'ɔrr yɨrog loi tube kɔ.

²⁶ M'a mad ngéngangtag loi gangɨn ta goɗobat tit kɨkete, na ngékɔjtag loi a ĩn tit kɨmaɗi. Goot gog a kunɨn ɓebo kɨdenesew, ɓebo kɨro.

²⁷ A ban dɔ ɓebo Siõ kɨta nyaɗa kɨgoɗobat; na ĩgɨn telɨn kɨromt tɔ, a ban dɔd kɨtakul nyaɗa kɨdenesew.

²⁸ Na ngétaɗɔɔ kɨ ngéɗamajal a nujɨnd, na ĩgɨn tɔrrɨn rod kɔ ro Bɨraɓet ye, a goton tɔ ho.

²⁹ Rosɔl a ɗasɨ dɔ kag dil yogt losɨ'n i tarɨna ngãi, na a i ɗan rosɔl kɨta ndɔg losɨ.

³⁰ Kɨtɔ a in tit kag dil kɨ mbia ndulo, ke ndɔɔ kɨ man gotot.

³¹ Dekɨngang a i tit mũ be, na kɨlaɗaa tit ndõ horr be, horr a õd tujoo, de kɨ asɨ tɔl horra goto.