Deteronom 4 - Maktub Ta Kumkajir

Moij ad kɔj ngan Israelg

¹ Tajigla Israel, oo dɔ mberkɨndag kɨ tagkɨgang'n m'ndɨ m'ndoosɨ. I hɔn ɗagoot kɨtakad i ndɨn ne kɨ dɔsɨ dõ kad andɨn, i taan dɔning'n Bɨraɓe Luwah losɨ ad bɔwsɨg nyakagɓet.

² Ot lan ta mad dɔ tat'n m'ndasɨ mbera, ke ɔrrɨn ta mad kamt kɔ kɨtakad i ngomɨn go mberkɨndag lo Bɨraɓe Luwah losɨ'n m'ndɨ m'adsɨ.

³ Oon kɨ kumsɨ nya'n Bɨraɓe ɗa Baal Peort, Bɨraɓe Luwah loi nuj deg tube kɨ ngékaw go yo Baal Peor,

⁴ na ĩgɨn i tĩnyan na kɨ Bɨraɓe Luwah losɨ ye, in tube i ndɨn kɨ dɔsɨ dõ ɓone.

⁵ Oon, m'ndoosɨ mberkɨndag kɨ tagkɨgang tit'n Bɨraɓe Luwah lom ndamɨn mbera kɨtakad i hɔn ɗagoot kam dɔningt'n a andɨnt kad i taan nyakagɓet.

⁶ A i ngomɨn go na i hɔn ɗagoot kɨta a i terr losɨ kɨ nyager losɨ takum degt'n a oon dɔ ta lo mberkɨndag tube na a elɨn anan: Rota, girrdeg kɨbobe'n ɗan i girrdeg kɨ ngéterr kɨ goosɨ.

⁷ Kɨtɔ girrdeg kɨbo kɨ ɗah hã aw kɨ Luwah lon nderbe tit'n Bɨraɓe Luwah loj in sej nderbe ndɔ kɨɗen'n kɨ kon kɨdɔat a?

⁸ Girrdeg kɨbo kɨɗah hã aw kɨ mberkɨndag kɨ tagkɨgang kɨdenesew tit mberkɨndag tube'n m'ndad nõsɨt ɓone a?

Luwah ad girrdeg lon gerɨnɨn

⁹ Nya kɨɗa laten: Oo go roi maj, i ngom roi maj tɔ ho, na ɓeta kami oi dɔ nyag tube'n oo kɨ kumi kad goton ngarkamit al. I ndoo ngani kɨ ngan nganig.

¹⁰ I ga kami dɔ ndɔt'n i ɗàn nõ Bɨraɓe Luwah loi dɔ mbalbo Horebt lon Bɨraɓe elɨm an: I kaw deg kɨnomt. M'ndig kad oon dɔ tag lom kɨtakad ndoon ɓoolɨm kɨ kaglo kɨɗen kɨ ndɨn ne kɨ dɔd dõ, dɔningt na kad ndoon ngandg tɔ.

¹¹ Kaglot'n non la i ndɔt'n, na i ɗan dõ kad mbalbot. Mbalbo õ horr na ndõ horr aw mbã kɨ ngawden rãt. Til diw, kilndii kɨ lo kɨdiw kirir.

¹² Kamla Bɨraɓe elsɨ ta ngawden horrt, i oon dɔ ndɨ tag, na oon ɓakumtanya mad al, i oon dɔ ndɨ ta koon.

¹³ Bɨraɓe tee dɔ kunkɔ lon adsɨ, elsɨ kad i ngomɨn go mberkɨndag kɨkɨlah na ja dɔ bar mbalgt kɨjoo.

¹⁴ Kaglot'n non Bɨraɓe ndam mbera kad m'ndoosɨ mberkɨndag kɨ tagkɨgang kɨtakad i hɔn ɗagoot kam dɔning'n a andɨnt kad i taan nyakagɓet.

Luwah ndáng ngan Israelg dɔ yot kɨ ɗa

¹⁵ Oon go rosɨ maj kɨta oon ɓakumtanya mad al dɔ ndɔt'n Bɨraɓe elsɨn ta ngawden horrt dɔ mbalbo Horebt,

¹⁶ na ɓeta i tujɨn rosɨ kɨlo tɔsɨ ɓakumtanya mad, ad i ɓakumta dekɨdɨngã ke dekɨdẽ,

¹⁷ ke ɓakumta dã mad kɨdɔningt ne, ke ɓakumta yel mad kɨ ngekɔrbɔgɨn dõ,

¹⁸ ke ɓakumta dã mad kɨ ngekɔrrkɔdber, ke ɓakumta kanj mad kɨ kam mant girr dɔningt.

¹⁹ Oo go roi maj, na ɓeta i un kumi kɨ dõ oon kad kɨ nah kɨ kɨmẽg, koosɨg tube kɨdɔrãt, na nyag'n non awɨn sei ad i ɔsɨ dɔi ber nõdt, i ɗa ɓer lod kɨta Bɨraɓe Luwah loi ndahd ad girrdeg tube kɨ girr dɔrãt.

²⁰ Na ĩn ta Bɨraɓe ɔisɨ, tee sesɨ kam horrt kɨ ngenyẽ hand, ad i dɔning Ejipt't kɨtakad ĩn girrdeg nyakagɓe loa tit'n ĩn ne ɓone.

²¹ Na Bɨraɓe ɓa sem wong kɨtatɔsɨ, nda yo kad m'gang bah Jurdẽ m'aw kam dɔningt kɨmaj'n Bɨraɓe Luwah loi adi nyakagɓet al.

²² Mĩ taa m'a m'oi kam dɔningt'n ɗan, m'a m'gang bah Jurdẽ al. Na ĩn a i gangɨn bah, a i taan dɔning kɨmaj nyakagɓet.

²³ Oon go rosɨ maj, na ɓeta kamsɨ oi dɔ kunkɔt'n Bɨraɓe Luwah losɨ un sesɨ, na ɓeta i ɗan ɓakumtanya mad kɨtɔsɨ ĩn Bɨraɓe Luwah loi ɔgi dɔ,

²⁴ kɨta Bɨraɓe Luwah loi i horr kɨ ngekõ mugɨj, kɨ ngejang.

²⁵ Lon a ooj ngang, na ngani oojɨn ngang tɔ ad i ndɨn dɔningt'n non kaglo ngãi, ĩla i yerrɨn kɨ rosɨ, i tɔsɨn ɓakumtanyag kɨ taan na kɨ nya mad, ĩla i ɗan nya'n i kɨmajal takum Bɨraɓe Luwaht losɨ kad i sɔkɨn ne wong loa a ne,

²⁶ m'a m'kun dɔrã kɨ dɔning kad ĩn ngémanaj dɔsɨt ɓone kad i nujɨn kɔ tentenbe kam dɔningt'n a i taan gid bah Jurdẽt. A i ɗan ndɔg ngãi al, na a i nujɨn kɨtaagbe.

²⁷ Bɨraɓe a tɨnda tĩsɨ ku degt, ndegsɨ a nãi tẽbe ku girrdegt kɨdangdang'n Bɨraɓe a aw sesɨ dandt.

²⁸ Nu la a i ɗan ɓer lo yog'n kag kɨ mbal'n de tɔsɨ kɨ jin, ĩgɨn asɨn ko lo, ke koo dɔ ta, ke sanya, ke koot nya al.

²⁹ Kam lot'n non tɔ la a i sah go Bɨraɓe Luwah loi na a i ngaah ĩla i saha kɨ ngarkami tube kɨ roi tube.

³⁰ Ndɔ kamkɔlt loi lon nyag'n non teen dɔit kam kaglot kɨdɔboit, a i tel kɨ ro Bɨraɓe Luwaht loi, a oo dɔ ndia,

³¹ kɨta Bɨraɓe Luwah loi i Luwah kɨ ngekõkam a nyài kɔ al, a nuji al, kama a oi dɔ kunkɔt'n un kɨ yokɨnda ad bɔwig al tɔ.

Majkurr lo Bɨraɓe kɨta Israel

³² Tajigla i ndɨje ta dɔkaglot kɨ tɔi kete nõit mbã ndɔ'n Luwah ndan de dɔningt ne, i ndɨje ta ko dɔngoi dɔrãt mad mbã kɨmadt oo ke nya mad kɨbo kɨ titbe ɗa nya nja kɨɗa a?

³³ Ndɔ kɨɗa girrde mad oo dɔ ndi Luwah ela ta dan horrt tit'n oon dɔ ndia, na ndɨ kɨ dɔ dõ kari a?

³⁴ Ke Luwah mad i nõ'n kɔt girrdeg kɨta ɗɔɔn ku girrdegt kɨɗang kɨtakul nyaná kɨ nyakɔj kɨ nyag kɨyaya kɨ ɗɔɔ kɨ ji kɨngang kɨ tɔg ji kɨ la kɨ dõ kɨ kɨlag kɨbobo kɨkootɓool tit'n Bɨraɓe Luwah ɗan kɨtɔi Ejipt't takumit a?

³⁵ Ĩla adɨn kɨ oo nyag 'nten tube kɨtakad i ger Bɨraɓe i Luwah, kɨmad goto.

³⁶ Ko dõ dɔrãt adi oo dɔ ndia kad ndooi, kɨ dɔningt tɔ adi oo horr loa kɨbobe, ko kam horrt'n non to i oo dɔ tag loa.

³⁷ Kɨtɔ tar bɔwig na kɔt ngekad kɨgodt. Ĩ kɨdɔn tee sesɨ ko Ejipt't kɨ tɔgɨn kɨbobe,

³⁸ tuɓa girrdeg kɨ dang dang nõit, girrdeg kɨbo kɨ tɔgd tɔii, kad and sei kam dɔningt lod na adi nyakagɓet tit'n i ndɨ oon ɓone.

³⁹ Kɨtɔ 'nten, ɓone i ger nya 'nten na i ngoma kamit: Bɨraɓe i Luwah kam dɔrãt dõ kɨ dɔ dɔningt kɨber, kɨmad goto.

⁴⁰ I ngom mberkɨndag loa kɨ tag loa'n m'ndai mbera ɓone kɨtakad i ngahn ronel, ĩn kɨ ngani, kad ndɔig bɨlan kɨdɔtdɔt kɨnõt kam dɔningt'n Bɨraɓe Luwah ndɨ adi.

Moij kɔt ɓebog mɨta kɨtakad ĩn longomro

⁴¹ Kamla Moij kɔt ɓebog mɨta gid bah Jurdẽt ko loɓakàdt,

⁴² kad ĩn longomro kɨta ngetɔlde'n tɔl madɓen kɨ kamndig al, na i madngétaa kete al tɔ. A ãin kɨ kam kɨkɨɗat ku ɓebogt'n non kɨta kaj ron,

⁴³ ad i Beser kam dɨlalot kɨta Rubeniag, Ramot kam dɔning Galaadt kɨta Gadiag kɨ Golan kam dɔning Basant kɨta Manaseag.

Dɔning lo Israel gid Jurdẽ

⁴⁴ 'Nten la i mberkɨnda'n Moij nda nõ Israelagt.

⁴⁵ Ĩgɨn ten la ĩn najkɨmag kɨ mberkɨndag kɨ tagkɨgang'n Moij eltaa Israelag go teed Ejipt't kɨtɨga,

⁴⁶ ko gid bah Jurdẽt kam hollot kɨ sumba nõ Bet Peor kam dɔningt lo Sihõ ngar lo Amoriag'n ndɨ Hesbon ĩn Moij kɨ Israelag tetɨna ɗɔɔ go teed Ejipt't kɨ tɨga.

⁴⁷ Taan dɔning loa kɨ kɨlo Og, ngar kɨ Basan, ngarg kɨjoo lo Amoriag'n ndɨ gid bah Jurdẽt ko lo ɓakàdt.

⁴⁸ Dɔning loa mbagɨr Aroer kad bah Arnõt mbã mbalbo Sirion, ad i Hermõ,

⁴⁹ nat kɨ dɨla mbo tube kɨ gid bah Jurdẽt ko loɓakàd mbã bahbo kɨ dɨlalo kɨ kad Pisgat.