Deteronom 30 - Maktub Ta Kumkajir

Majkurr a ɗe go tɔrrndit

¹ Lon nyag 'nten tube a teen dɔit, majkurr kɨ ndɔlɨn nda nõit, ĩla i ga kami dɔ tat 'nten ku girrdegt'n m'tuɓai dandt,

² ĩla i tel kɨ ro Bɨraɓe Luwaht loi, na i tel roi go tat loa kɨ ngarkami tube, ĩ kɨ nganig, go nyag tube'n m'ndai mbera ɓone a ne,

³ Bɨraɓe loi a tel sei ɓert, a oo kumtondo loi, a tel kawi kɨnat ku girrdegt tube'n Bɨraɓe Luwah tɨnda tĩnsɨ kudt.

⁴ Ke deg loi'n tɨnda tĩnd mbã dɔngoi dɔrãt kaa, nu la Bɨraɓe Luwah loi a kawsɨ kɨnat, ko nu tɔ a ɔrrsɨ ɗe sesɨ.

⁵ Bɨraɓe Luwah loi a ɗe sesɨ kam dɔningt'n bɔwsɨg taan kad i taan ho. A ɗa sei maj, na a adi i bɨla kɨdɔtdɔt mbã tɔi bɔwig.

⁶ Bɨraɓe Luwah loi a ar ngarkami kɨ ngarkam ngakai kad i tar Bɨraɓe Luwah loi kɨ ngarkami tube kɨ roi tube'n i ndɨn kɨ dɔi dõ.

⁷ Bɨraɓe Luwah loi ad ndɔlg'n non tube son dɔ madngétaigt'n ɔsɨn ta, na dan roi ndo.

⁸ Na ĩ, a i tel roi go ndi tat lo Bɨraɓe gog, a i ɗa kɨgo mberkɨndat loa tube'n m'ndasɨ ɓone.

⁹ Bɨraɓe Luwah loi a ad maj urri kɨ dumbit dɔ kɨlaɗa jiit tube kɨ ngan kami kɨ ngan nyakulg loi kɨ kand dɔning loi kɨta Bɨraɓe a ɗa ronel gog dɔ majkurr loi tit'n ɗan ronel kɨ bɔwi kɨ maɗi,

¹⁰ ĩla i tel roi go ndɨ tat lo Bɨraɓe Luwah loi, i ngomgo mberkɨndag loa kɨ takɨ gang loa'n ndangɨn taa kam maktub mberkɨndat 'nten, ĩla i tel kɨ ro Bɨraɓe Luwaht loi kɨ ngarkami tube kɨ roi tube.

Ta i roit nderbe

¹¹ Mberkɨnda'n m'ndɨ ndai ɓone, a tɔi tɔgi al, i sãi sei al tɔ.

¹² I kam dɔrã al kad el an: Nõ a aw dɔrã kad ɗe sia rojt, kad j'oo dɔ na kɨ ɗagoot a?

¹³ I gid bahbot al tɔ kad el an: Nõ a gang bahbo kad ɗe sia rojt j'oo taa, na kɨ ɗagoot a?

¹⁴ Ta i roit nderbe, ta i kam tait, i ngarkamit kad i hɔ ɗagoot. I kɔt kumkajir.

I kɔt kumkajir

¹⁵ Oo, ɓone m'nda kumkajir kɨ majkurr kɨ koi kɨndɔl nõit.

¹⁶ M'ndai mber ɓone kad i tar Bɨraɓe Luwah loi, i ndia kɨ go ɗobgt loa, i ngomgo ndikung, kɨ mberkɨndag loa, kɨ tagkɨgang loa kɨtakad i ndɨn kɨ dɔi dõ, i bɨla kɨ dɔtdɔt, na kɨ Bɨraɓe loi ad maj urri kam dɔningt'n i ndɨ andt kɨta taa nyakagɓet.

¹⁷ Na ĩla ngarkami nyàgoa, ad oo dɔ ta loa al, ad de mad gooli mbã ɔsɨ dɔi ber nõ yogt, i ɗa ɓer lod,

¹⁸ m'elsɨ m'tɔsɨ wakɨsɨ, rota a i nujɨn, a i ɗa ndɔ ngãi dɔningt'n i ndɨ gangɨn bah Jurdẽ kɨta kandt kad i taan.

¹⁹ Ɓone m'kun dɔrã kɨ dɔning kad manaj dɔsɨt, m'nda kumkajir kɨ koi ho, m'nda majkurr kɨ ndɔl ho nõit. I kɔt kumkajir kad i ndɨn kɨ dɔi dõ, ĩn kɨ ngakai,

²⁰ kad i tar Bɨraɓe Luwah loi, i tel roi go ndɨ tat loa, i tĩnyan na sia. Kɨtɔ telrogotat'n non i kumkajir loi, kɨ ndɔig kɨngãi. Titbe la a asɨn ndɨn kam dɔningt'n Bɨraɓe un kɔn kɨ'n ad bɔwig: Abraham, Isaak kɨ Jakob.