Deteronom 26 - Maktub Ta Kumkajir

Kadkari kand kɨdasa

¹ Lon and kam dɔningt'n Bɨraɓe Luwah loi ndɨ adi nyandubat kad i taa nyakagɓet na i ndɨt,

² a ɔi kand kɨdasa tube kɨ tee dɔningt'n a i teet kam dɔningt'n Bɨraɓe Luwah loi ndɨ adi, a ũ kam jangt awɨn lot'n Bɨraɓe Luwah a kɔt kad nda tɔn dɔt.

³ A aw ro ngejanya mosɨt'n ndɨ ɗa kɨla ndɔgt'n non, a ela an: Ɓone m'ndɨ m'el Bɨraɓe Luwah loi kad m'and kam dɔningt'n Bɨraɓe nda yot ad bɔwjg kɨ n'adj.

⁴ Kamla ngejanyamosɨ a taa jàng jiit ndah nõ dɨngɨrt lo Bɨraɓe Luwah loi.

⁵ A un ta el nõ Bɨraɓe Luwaht loi an: Bɔwm i Aramia ngekaw kɨ njan dõ. Aw Ejipt't nat kɨ deg tẽbe na ndɨ mbah tit. Nu la tel girrdeg kɨbo kɨtɔg ngãi kɨ koosɨg.

⁶ Ejiptiag ɗajɨn taakò, dan kumj ndo na ndan kɨlaɓer kɨ ngang dɔjt.

⁷ Kamla kɨ ko kɨdɔ Bɨraɓe Luwaht lo bɔwjg. Bɨraɓe oo dɔ ndiji, oo danggt loj kɨ kɨlaɓer loj kɨ daiyog loj.

⁸ Na Bɨraɓe tee sej Ejipt't kɨtɨga kɨ ji kɨtag kɨ ji kɨla kɨ dõ kɨ ɓool kɨbobe kɨ nyakɔjg kɨ nyag kɨ yaya.

⁹ Ɗe sej kam lot'n ɗan, adj dɔning'n ɗan, dɔning'n mbà kɨ tej nũnt.

¹⁰ Oo, tajigla m'ɗe kɨ kand kɨdasa lo dɔning'n Bɨraɓe adɨm. A i ndaa kɨnõ Bɨraɓe Luwaht loi na a i ɔsɨ dɔi ber nõ Bɨraɓe Luwaht loi.

¹¹ Goot gog a i ɗa ronel nat kɨ nyamajg tube kɨ Bɨraɓe adi kɨ ngékɨɓe loi, ĩ kɨ Lebia kɨ mbah ĩgɨn ndɨn roit.

Kad gaj kɨɗa kam kɨ kɨlaht kam ɓalt kɨkõmɨta

¹² Lon a ɔrr gaj kɨɗa ku kɨkɨlaht lo kand nyag loi oi kam ɓalt kɨkõmɨta, ad i ɓal kɔrr gaj kɨɗa ku kɨ kɨlaht ye, a ad Lebia kɨ mbah kɨ ngonhal kɨ ngengawkoi san kam ɓegt loi ad ndenɨn.

¹³ Kamla a el kɨ nõ Bɨraɓe Luwaht loi an: M'ɔi nyag kɨ ndah kɔtkokɨɗa kam kujt lom mad Lebia kɨ mbah kɨ ngonhal kɨ ngengawkoi kɨgo tagt kɨ i ndam mbera. M'tɔi dɔ ke kamm oi dɔ kɨkɨɗa ku mberkɨndagt loi al.

¹⁴ Kaglo hɔndo lom, m'sanya mad kɨɗa al. Lon mĩ kɨyerr ye, m'un nya mad kamt al, mad nya mad kɨta ngekoi al, m'tel rom go ndɨ tat lo Bɨraɓe Luwah lom, m'ɗa kɨgo nyagt tube'n ndam mbera:

¹⁵ I nɔl lo ko londɨt kɨkunjɗang kɨ dõ, i njang dɔ deg loi Israel kɨ dɔning'n i adj tit'n i ndan yo ad bɔwjg, dɔning'n mba kɨ tej nũnt.

Israel i girrdeg lo Luwah

¹⁶ Ɓone Bɨraɓe Luwah loi ndai mber kad i ɗago mberkɨndag tagkɨgang 'nten, a i ngomd kad i hɔ ɗa kɨ ngarkami tube kɨ roi tube.

¹⁷ Ɓone i un kɔi ad Bɨraɓe kad i Luwah loi kɨtakad i ndia go ɗobgt loa kɨ ngomgo mberkɨndag loa kɨ Komãdɨmãg loa kɨ tagkɨgang loa kad i tel roi go ndɨ tat loa.

¹⁸ Ɓone Bɨraɓe manaj kad ĩn deg lon kɨkɔsɨdɔn tit'n elɨn. A i ngomgo mberkɨndag loa tube

¹⁹ kɨtakad tɔi i kɨ dõ dɔ girrdegt tube'n ndahd kɨ kɔsɨgon kɨ tɔko kɨmaj kɨtɔitɔi kad in girrdeg kɨjaɓat kɨta Bɨraɓe Luwah loi tit'n elɨn.