Deteronom 11 - Maktub Ta Kumkajir

Ta lo Luwah i kɨta ngomgo

¹ A i tar Bɨraɓe Luwah loi na a ngomgo tag loa kɨ mberkɨndag loa kɨ tagkɨgang loa kɨ Komãdɨmãg loa kɨndɔgbe.

² Ɓone maj kad i gerɨn kɨta m'ndɨ elta kɨ ngansɨg al ĩgɨn oon kɨ kumd al, gerɨn ndakɔj lo Bɨraɓe Luwah losɨ al, ke boa, ke tɔg jia, ke jia kɨla kɨ dõ.

³ Nyakɔjg loa kɨ kɨlag loa'n ɗa kam Ejipt't kɨdɔ Paraõt ngar kɨ Ejipt't kɨ kɨdɔ dɔningt loa tube,

⁴ nya'n ɗa kɨ ngéɗɔɔ lo Ejiptiag kɨ sɨndag lod kɨ pusɨɗɔɔg lod titbãi man bahbo kɨkɨre utɨn dɔd lon ndɨ tuɓan ne gosɨ, na Bɨraɓe nujd mbã ɓone.

⁵ Nya'n ɗa kɨtɔsɨ kam dɨlalot mbã tee sesɨ kam lot'n ɗan

⁶ nya'n ɗa kɨ Datan kɨ Abiram, ngan Eliab, girrkooj lo Ruben, tit'n dɔning teen tan urdɨn kɨ ngékɨɓe lod kɨ kujkubg lod kɨ nyag lod tube ku Israelagt.

⁷ Kɨtɔ kumsɨ oo kɨlag kɨbobo tube'n Bɨraɓe ɗad.

⁸ A i ngomɨn go mberkɨndag tube'n m'ndasɨ ɓone kɨtakad i ngangɨn kad aw i taan dɔning nyakagɓet losɨ,

⁹ na kɨtakad i ɗan ndɔ ngãi kam dɔningt'n Bɨraɓe unɨn kɔn kɨ yokɨnda ad bɔwsɨg kɨ n'ad'd, in kɨ ngandg, dɔning'n mbà kɨ tej ndɨ nũnt.

Kaw kɨkete lo Israelg kam tel ro go tat lo Luwah

¹⁰ Kɨtɔ dɔning'n i ndɨ awt kɨta taa nyakagɓet i tit dɔning Ejipt't kɨ i tee kamt kɔ al, lot'n i dub nyat, na a aw kɨ njai i la man dɔt tit ndɔɔ mbikamg be al.

¹¹ Na dɔning'n i ndɨ awɨnt kad i taan nyakagɓet ye, i dɔning mbalbog kɨ hollog'n man ndii kɨ dõ nyõma.

Dɔning'n Bɨraɓe nda kumɨn got

¹² I dɔning'n Bɨraɓe Luwah loi ndɨ oo go, Bɨraɓe Luwah nda kumɨn got kɨndɔgbe lo lagɨr ɓalt mbã dɔngoi ɓal.

Majkurr kɨ ndɔl

¹³ Ĩla i telɨn rosɨ go mberkɨndagt lom'n m'ndasɨ ɓone, ĩla i tarɨn Bɨraɓe Luwah losɨ na i ɗan ɓer loa kɨ ngarkamsɨ tube kɨ rosɨ tube a ne,

¹⁴ Luwah a ad ndii ed dɔningt losɨ kaglot kɨ sumbaa, ndii bɨna kɨ ndii kɨ dɔboit, a i kaw nyako loi kɨ man nduu loi kɨ yib loi.

¹⁵ M'a mad mũ ɓa kam gawgt loi kɨta nyakulg loi, a i sa, a i ndan.

¹⁶ Oon go rosɨ maj, na ɓeta ngarkamsɨ goolsɨ ad i tɔɔn ɗob, i ɗan ɓer lo yog, na ɔsɨn dɔsɨ ber nõdt.

¹⁷ Wong lo Bɨraɓe kɨtɔlsɔkɨr a so dɔsɨt ad ut ta dɔrã kad ndii ed dɔning tee kɨ kandɨn, a i nujɨn kɔ tentenbe kam dɔningt kɨmaj'n Bɨraɓe ndɨ adsɨ.

¹⁸ Tag'n m'elsɨ, i ngomɨn ngarkamsɨt. A i dɔɔn jisɨt, kɨ nat nõsɨt.

¹⁹ A i ndoon ngansɨg tag 'nten, a elɨnd tag 'nten lon i ndɨn ne kam kujgt losɨ, lon a i ndian ne dɔ ɗobt, lon i ton ne ber ke lon i ɓain ne dõ dɔ ɓit.

²⁰ A i ndangɨn tag teen dɔ kag ta kuj losɨ kɨ dɔ kag ta ndog losɨ,

²¹ kɨtakad ndɔsɨ kɨ ndɔ ngansɨg in ngãi kam dɔningt'n Bɨraɓe ndan yo kɨ n'ad bɔwsɨg kɨ kaglog tube'n dɔrãg ĩn ne dõ dɔ dɔningt.

²² Kɨtɔ rota, ĩla i ngomɨn go mberkɨndag tube'n m'ndasɨ, i hɔn ɗagoot na i tarɨn Bɨraɓe Luwah losɨ, i ndian kɨgo ɗobgt loa tube, i tĩnyana sia a ne,

²³ Bɨraɓe a tuɓa girrdeg'n ɗan tube kɔ nõsɨt, a i taan lo lo girrdeg kɨbo kɨ tɔgd tɔisɨ.

²⁴ Lo kɨɗen'n i ndan danjasɨ tit a ne, a i losɨ. Ɗobnin dɔning losɨ mba girrɨn ko dɨlalot mbã kɨ Libã, ko bah Eprat't mbã kɨ bahbot ko lokudkàdt.

²⁵ De mad kɨ a asɨ ɗa nõsɨt goto, Bɨraɓe Luwah losɨ a ad ɓool kɨ rondad so dɔ dɔningt tube kɨtatɔsɨ, ad i lo kɨɗen'n a i ndan njasɨt tit'n, unɨn kɔn adsɨ.

²⁶ Oon, ɓone m'nda njangdɔ kɨ ndɔl nõsɨt.

²⁷ Maj a urrsɨ ĩla i telɨn rosɨ go mberkɨndagt lo Bɨraɓe Luwah losɨ'n m'ndasɨ ɓola,

²⁸ ndɔl a i dɔsɨt ĩla i telɨn rosɨ go mberkɨndagt lo Bɨraɓe Luwah losɨ al, ĩla i tɔ ɗob'n m'ɔjsɨ goa ɓone, ke awɨn go luwahgt kɨɗang'n i gerɨnd al.

²⁹ Lon Bɨraɓe Luwah loi a ad and kam dɔningt'n a i taa nyakagɓet a ne, a elta njangdɔ dɔ mbal bo Garijimt kɨ ta ndɔl dɔ mbalbo Ebalt.

³⁰ Mbalbog'n non ĩn gid bah Jurdẽt, gid ɗob kɨlokudkàdt kam dɔningt lo Kananiag ngendɨ kam dɨlalot kɨ sumba nõ Gilgal nderbe kɨ kag dilg kɨ More.

³¹ Kɨtɔ a i gangɨn bah Jurdẽ kɨta taa dɔning'n Bɨraɓe Luwah losɨ ndɨ adsɨ nyakagɓet.

³² A i ngomɨn go, a i hɔn ɗago mberkɨndagt kɨ tagkɨgang tube'n m'ndasɨ mbera ɓone.