Daniel 2 - Maktub Ta Kumkajir

Daniel ɔrr girr nii lo Nebukadnesar

¹ Kam ɓalt kɨkõjoo lo kõɓe lo Nebukadnesar, ngar Nebukadnesar nii, ad kama daa ta pa, na ɓi hɔ kuma al.

² Kamla ngar ndamber kad kunɨn mboolig kɨ ngéndɔndilg kɨ ngéyog kɨ Kaldeag, kad ɔrrɨn girr niig'n nii nõ. Lon deg'n non ɗe ɗàn nõ ngart ye.

³ Ngar eld an: M'nii ad kamm gang man, m'ndig kad ɔrrɨmɨn girr nii'n non admɨn m'ger.

⁴ Kaldeag elɨn ngar ta kɨ ta ɓe Aramea anan: A ngar, kɨ i ndɨ kɨ dɔi dõ mbãkɨnõt. El nii'n i nii nõ, ad ngékɨlaɓerg loi oon, kamla a ɔrrɨn girra adɨn oo ye.

⁵ Ngar tur Kaldeag an: Ta tee tamt woi. Ĩla i elɨm nii'n non al ho, i ɔrrɨn girra ad m'oo al ho a ne, m'a mad gangsɨn njikɨtinjikɨt, na kujg losɨ a telɨn ɓirbit.

⁶ Na ĩla i admɨn m'ger girr nii'n non a ne, m'a m'adsɨ kadkarig kɨ nyabajig kɨ kɔsɨgon ngãi. Kɨtɔ 'nten admɨn m'ger nii'n m'nii nõ kɨ kɔrr girra tu.

⁷ Deg'n non turɨn ta kɨkõjoo anan: Ngar kɨ ndɨjei kad elj jĩ ngékɨlaɓerg loi nii'n i nii nõ, na j'a kɨ j'ɔrr girra jadi.

⁸ Ngar ɓa wong, na eld an: M'ger ɓet ndɨ i sahn ɗob kad i ngahn kaglo sĩ dɔt ɓaitɔ. Kɨtɔ i oon ta'n tee tamt woi.

⁹ Ĩla i admɨn m'ger nii'n non al a ne, takɨgang kɨ kɨɗa'n non i dɔsɨt tube, kɨta i ndan tasɨ nat kad i elɨn tag kɨbal kɨ tag kɨngom, ngoon ne kad kaglo tɔi. Kɨtɔ 'nten elmɨn nii'n m'nii non. Titbe la m'a m'ger kad in deg kɨ asɨn kɔrr girr nya kɨ lo mundt ye.

¹⁰ Kaldeag turɨn ta ngar anan: De mad kɨ dɔningt ne kɨ asɨ ɗa nya'n ngar ndɨje ye goto. Kɨtɔ lon nu na ngar mad kɨbo, ke ngar mad kɨ ngetɔg kɨngãi kɨ ndɨje nya mad kɨ titbe mbooli, ke ngendɔndil, ke Kaldea goto.

¹¹ Kɨtɔ nya'n ngar ndɨje i nya kɨ tɔi dɔ, de kɨ asɨ kɔrr ngar girra goto, na luwahg tã, ĩn londɨd i nat kɨ deg al.

¹² Wong tɔl ngar sɔkɨr dɔ tat'n non, ad kuma il kirir, ndamber kad tɔlɨn ngéterrg tube kɨ Babilont.

¹³ Taa tee ad lan mbera kad tɔlɨn ngéterrg, na sahn Daniel kɨ namag kad tɔlɨnd ho.

Luwah tee kɨ girr nii ad Daniel oo dɔ.

¹⁴ Kamla Daniel elta kɨ kumtɔg kɨ terr kɨ Arjok, bɨradɔ ngéngom dɔ ngar, kɨta Arjok tee aw kɨta tɔl ngéterrg kɨ Babilon.

¹⁵ Daniel el Arjok an: Kɨtɔɗi takɨngang lo ngar in kɨ ngang ngãi titbe a? Na Arjok ɔrr go nya'n ɗa nya ad Daniel oo.

¹⁶ Tajigt Daniel aw ro ngart ndɨjea kad adɨn kaglo sĩ kɨtakad n'ɔrrɨn girr nii loa n'ada oo.

¹⁷ Goot gog Daniel aw kam kujt lon, elta'n non namɨng ad i Hanania kɨ Misael kɨ Ajaria

¹⁸ eld kad kɔn Luwah kɨ dɔrãt dõ kad oo kumtondo lod, na ɗa sed dɔ tat kɨmund'n non kɨtakad tɔlɨnd nat kɨ ndeg ngéterrg kɨ Babilon al.

¹⁹ Kamla ta kɨmund'n non i kɨ tee dɔ kad Daniel ndɔ kam nyakookamndilt. Daniel ɔsɨgon Luwah kɨ dɔrãt dõ.

²⁰ El an: Kɔsɨgon kɨdɔ tɔ Luwaht. Mbã kɨ kohgt lo kohg kɨta ĩ la terr kɨ tɔg ĩn loa ye.

²¹ Ĩ la ndɨ mbel kaglog kɨ dɔnahg, Ĩ la ndɨ ndah ngarg dɔ pong kõɓegt ye, na ĩ tɔ la ndɨ ɔrr ngarg kɔ tɔ ho ye, ndɨ ad ngéterrg terr lod, ndɨ ad nyager ngégoosɨ ger girrnya,

²² Ĩ Luwah la ndɨ tee dɔ girr nyag kɨwo kɨɓing, kɨ nyag kɨ kɨmund, ĩla i ger nya kɨ kam tilt, kɨta kunj tube i roat.

²³ Ĩ Luwah lo bɔwmg, m'ndɨ m'tɔii kɨ dõ, m'ndɨ m'ndubi kɨta i adɨm terr kɨ tɔg, na adɨm m'ger nya'n kɨ ndɨjei, tit kan i teen dɔ ta kɨmund lo ngar adj.

²⁴ Goot Daniel aw ngah Arjokt'n ngar ela kad tɔl ngéterrg kɨ Babilon kɔ, ela an: Ot tɔl ngéterrg kɨ Babilon kɔ. Aw sem ro ngart, na m'a mad ngar ger girr nii'n nii nõ.

²⁵ Tajigt Arjok aw kɨ Daniel ro ngart, el ngar an: M'ngaa de mad ku degt'n hɔnd ɓert kam dɔning Judat, kɨ asɨ kɔrr girr nii loi ad i ger.

Ɓakumta de'n nja ĩ kɨ ɗa kɨ hanj kɨ lɔr

²⁶ Ngar ndɨje Daniel'n tɔa i Beltasar an: I asɨ kadɨm m'ger nii'n m'oo nõ kɨ kɔrr girra tɔ ɔ?

²⁷ Daniel tur ngar an: Ta kɨmund kɨ ngar ndɨje ye, ngéterrg, ke ngéndɔndilg, ke mboolig, ke ngéyog ngéndɔndil dɔ kɨmẽgt, asɨn tee dɔa kad ngar ger al,

²⁸ na Luwah nge tee dɔ girr tag kɨmund i kam dɔrãt dõ, a ad ngar Nebukadnesar ger nyag kɨ a ɗan nya kam ndɔgt kɨdɔboit. Nii loi kɨ nyag kɨ i oo kam ndilit lon i to dɔ tɨraɓiit laten:

²⁹ Ĩ ngar, lon i to dɔ tɨraɓiit ye, takɨga loi ɗe ɔj dɔ nyag kɨ a ɗan nya gog go kaglot 'nten, na nge tee dɔ girr tag kɨmund la adi i ger nyag'n ɓet a ɗan nya.

³⁰ Na mĩ ta, ta kɨmund i kɨ tee dɔ romt kɨta terr lom tɔi ndeg deg ngéndɨ kɨ dɔd dõ al, na i kɨtakad ad ngar ger girra, kɨtakad i ger girr tagahig kɨ kamit.

³¹ Ĩ ngar, i oo ɓakumta de kɨbobe. Ɓakumta de'n non i kɨbo ngãi, ndulo ngẽingẽi, ɗa dõ nõit, kooa i nya kɨkootɓool.

³² Dɔ ɓakumta de'n non, i lɔr kɨjanjoi, gua kɨ jia ĩn larjã, kama kɨ bɨngaa ĩn ningakasɨ,

³³ kasɨ njaa tujoo ĩn hand, nusɨ njaa tujoo i hand na nusa mad i hanj.

³⁴ Lon i nɔl nya'n non ye, gaj mbal mad gang kɨkanj kad ji de ɔda, ɗe nda nja ɓakumta de kɨ hand kɨ hanj'n non, tɔɔd kɔsɨkɔsɨ.

³⁵ Kamla tɔɔ hand kɨ hanj kɨ ningakasɨ kɨ larjã kɨ lɔr'n non tube kɔsɨkɔsɨ mbã telɨn tit kɨ tisa kɨdɔ gar ndah nyakot kaglo ɓalndɔt be. Nél ɔid kɔ ad ngahn gootd kɨ nãi al bat. Na mbal'n non tel mbalbo kɨbo ngãi, ta lo kɨtaagbe dɔningt.

³⁶ 'Nten la i nii loi ye, tajigla m'a m'ɔrr girra mad ngar oo.

³⁷ Ĩ ngar, ĩ ngar dɔ ngargt tube. Luwah kɨ dɔrãt dõ adi kõɓe kɨ tɔg kɨ ngang kɨ tɔko.

³⁸ La ngan deg jiit, kɨ dãg kɨmut, kɨ yelg kɨ dõ kɨ kam lot kɨɗen kɨ ndɨnt, adi ĩ ngekõɓe dɔdt tube. Ĩn la ĩ dɔ lɔr'n non ye.

³⁹ Gog goit a ne, kõɓe mad kɨɗang a ɓai, na a asɨ kɨ kɨ loi al, kamla kõɓe kɨkõmɨta kɨ i ningakasɨ a õɓe dɔ dɔningt kɨtaagbe.

⁴⁰ Kõɓe kɨkõsɔɔ kɨ ngang tit hand be ye a ɗe goot, kɨta hand a tɔ nya kɔsɨkɔsɨ, a tet nyag tube ɗelɗel. Titbe la kõɓe'n non a tɔ kɔsɨ, a tet kõɓeg'n non tube ɗelɗel.

⁴¹ A i kõɓe kɨ gangna joo, kɨta i oo njaa kɨ ngan njaa nusa kɨ kɨɗa i hand, na nusa kɨ mad i hanj lo ngeɓajo, na kõɓe'n non a aw kɨ tɔg sĩ, tit kan i oon hand i kɨ burɨna kɨ hanj lo ngeɓajo.

⁴² Tit'n ngan njaa ĩn nusɨ hand kɨ nusɨ hanj ye, titbe tɔ la kõɓe'n non nusa a i kɨngang na nusa a i kɨngang al.

⁴³ Tit'n i oon hand i kɨ burɨna kɨ hanj lo ngeɓajo ye, titbe tɔ la a burɨn na kɨtakul tanag kɨ girrdeg kɨ dang dang, na a tĩnyana al kɨta hand asɨ tĩnyana kɨ hanj al.

⁴⁴ Kaglot lo ngarg'n non ye, Luwah kɨ dɔrãt dõ a ɓai kɨ kõɓe mad kɨ a dum nuj kɔ, na tɔg kõɓe'n non a so ji girrdeg madgt kɨɗang al tɔ. A tɔɔ kõɓeg'n non tube kɔsɨkɔsɨ ad goton, na ĩ kɨɓe kɨ dõ la a ɗa loɗant mbãkɨnõt,

⁴⁵ tit kan oon mbal mad i kɨ gang ko kam mbalbot kɨkanj kad ji de mad ɔda, na ɗe tɔɔ hand kɨ ningakasɨ kɨ hanj kɨ larjã kɨ lɔr kɔsɨkɔsɨ. Luwah kɨbo ad ngar ger nyag kɨ a ɗan nya go nyagt'n non. Nii'n non i nii kɨjeje, kɔrr girra'n m'ɔrr m'adi i kɨɗubag tɔ ho.

⁴⁶ Kamla ngar Nebukadnesar so kɨ takumɨn ningt nõ Danielt, ɔsɨ dɔn ber nõat, na ndamber kad lan kadkarig nat kɨ mbikam kɨkootmbĩ adɨna.

⁴⁷ Ngar el Daniel an: Rota Luwah loi i Luwah dɔ luwahgt kɨ Bɨraɓe dɔ ngargt, nge tee dɔ tag kɨmund kɨta i asɨ tee kɨ dɔ ta kɨmund 'nten ad m'oo.

⁴⁸ Kamla ngar tɔi Daniel kɨ dõ, ada kadkarig kɨngãi kɨ kɨbobe, na ndaa ngekõɓe dɔ gaj dɔningt kɨ Babilon kɨtaagbe kɨ bɨradɔ ngéterrg kɨ Babilon tube.

⁴⁹ Daniel ndɨje ngar, kamla ngar nda Sadrak kɨ Mesak kɨ Abed Nego dɔ kɨla kõɓet lo gaj dɔning mad kɨ Babilont. Na Daniel tel ngekadkɔj ngar, ndɨ natɓet lo ngar.