Daniel 12 - Maktub Ta Kumkajir

Kaglo kamkɔl tɔi, na kaglo majkurr ɗe

¹ Kaglot'n non la Mikael, bɨrangekõɓe kɨbo'n non, in ndɨ ngomdɔ girrdeg loi, a ɓai. Kaglo'n non a i kaglo kamkɔl kɨbobe; kɨtit sia goto bat maɗi lon girrdeg ndɨn ne dɔningt mbã kaglot'n non; na kaglot'n non ye, a ugɨn girrdeg loi ɔrrɨnd ad i dekɨɗen, in ngahn tɔa i kɨndang kam maktubt.

² Koosɨ deg ngãibe ku ĩgɨtɨn to ɓin kam buningt ye, a ndoolɨn, kɨmadg kɨta kumkajir kɨ mbãkɨnõt, na kɨmadg kɨta rosɔl kɨ kid kɨ mbãkɨnõt.

³ Na ngényager kɨmaj a unjɨn ɗang tit nyẽr kunj dɔrã be, na ĩgɨn ndoon deg ngãibe nyaɗa kɨdenesew a unjɨn kɨndɔgndɔg tit kɨmẽg be mbãkɨnõt.

⁴ Na ĩ Daniel, i ngom tag 'nten kɨ lomundt, ut maktub'n non, na uta taa kɨ nyatɨnya ta maktub mbã kaglo kɨdɔboit. Deg ngãibe a awɨn ho a telɨn ho, na nyager a bɨla kɨdɔtdɔt.

Kaglo kɨdɔboit i nya kɨmund

⁵ Kamla mĩ Daniel m'nɔl lo, na m'oo deg joo tee ɗan dõ, kɨkɨɗa ɗa dɔ kongɨr baht kɨkɨɗa, na kɨmad ɗa dɔ kongɨr baht kɨmad.

⁶ Na kɨkɨɗa kudt el de'n aw kɨ kub lẽ ront, in i dõ dɔ man baht'n non, an: Ɗɨngãt nyag'n non a tɔlɨn kond a?

⁷ De'n aw kɨ kub lẽ ront, in i dõ dɔ manbaht ka nõ, la jikõn kɨ jigelɨn kɨ dɔrãt dõ, na m'ooa dɔ ta'n el an: Kɨ yo kɨ nda kam tɔ Luwaht kɨ Ngéndɨ kɨnõt nyag'n non a ɗan nya ɓal mɨta kɨ nusɨ, na a tɔlɨn kon nyag'n non tube, lon tɔg girrdeg kɨjaɓat lo Luwah tɨgan.

⁸ Mĩ Daniel m'oo dɔ tag'n non, na m'ger girra al. Kamla m'el m'an: Bɨraɓe lom, dɔboi nyag'n non ye, a i titbãi a?

⁹ El an: Daniel, i aw lo loi, kɨta tag'n non ĩn kɨ yadɔ, ĩn kɨ kut kɨ nyatĩya ta maktub, a to mbã kaglo kɨdɔboit.

¹⁰ Deg ngãibe a arɨn rod, telɨn kɨnda ngũng kɨta nánd kam nya nágt, na ngéɗamajalg a asɨ gerɨn girr nya 'nten al, a ɗan kɨgo majalt lod'n ndɨ ɗan nõ. De kɨɗa ku ngéɗamajalgt kɨ a ger gira goto, na ngenyager kɨmaj la a gerɨn gira ye.

¹¹ Na ɓai dɔ kaglot'n non a ɔgɨn dɔ kadkari kɨlahorrt kɨndɔgndɔg, na a udɨn nya kɨyerr kɨ ngenujɓe ad ɗa dõ ye, a i ndɔ dubkɨɗa kɨ ɓujoo kɨ dɔjikɨɗa.

¹² Ngéronelg la in deg'n a ɗan bijir mbã teen ne ndɔgt kɨdubkɨɗa kɨ ɓumɨta kɨdɔmɨta gidaimi ye.

¹³ Na ĩ Daniel, i hɔtɔgi bá mbã dɔboit. A i taakò, na a i ɗa dõ kɨtakad i taa nyabaji loi kaglot kɨ dɔboit.